ورق عنب بطريقتي... حامض وطري ويددوووخ.. وبالصور..!

السلام عليكم ورحمة الله وبركاته..

يسعد صباحكم / مساءكم..

//

..




اليوم ياحلوات وبناء على طلب اختي العضوة thepioneerm

قررت انزل طريقة ورق العنب ولكن بدون خطوات.. بس ماصورت غير النهاية.. السعيدة :hahaha:

كنت مأجلتها شوي عشان اصور الخطوات..

لكن بإذن الله متى ماسويت ورق عنب اوعدكم اصور خطواته.. قريبا..:cook:

..

وطبعا اللي بتجرب ورق العنب اللي اسويه..

هو حاااامض يمي يمي <<.. اموت بالطعم الحامض..

وطري..

والورق اللي استخدمته في هالصور هو حدائ كاليفورنيا.. صحيح حلو بس يتقطع

:06: دوخني وانا افككه..

عموما يمدحون العلالي بس ماقد جربته..

واحب على ورق العنب يكون فيه شوي من سايل الطبخ .. عشان يحافظ على طراوة الورق مهما بقى في الثلاجة..

..

نبدأ بإسم الله..

المقادير والطريقة مع بعض..


وطبعا ماسويت العلبة كامله يعني ممكن تزودين المقادير وتنقصينها على حسب رغبتك..

..

//

* ننقع كاستين رز مصري او امريكي في مويه حاره (مو لازم مده بس على بال ماتخلصين فرم وتقطيع)..

ثم تجيبين بصلة وسط وتقطعينها صغاار مره وطماطم وسط تقطعينها صغااار وعود بصل اخضر يقطع صغااار

ونص كوب بقدونس مفروم ونص كوب كزبرة مفرومة..

وربع كوب نعناع مفروم..ونص كوب زيت زيتون ونص كوب ليمون طازج معصور..

وملح على حسب الرغبة وشوي كمون شوي بهارات شوي فلفل اسود..وملح ليمووون وشوي سماق

واذا فيه دبس رمان حطي ملعقتين كبار ( بس وقتها ماكان عندي)..

وطبعا تكونين منظفة ورق العنب من مويته.. ومجهزته..

بعدها تجيبين الرز المنقوع.. وتصفينه من مويته.. وتخلطين كل المقادير فوووق مع بعض ..

( وهذي مقادير حشوتنا)..

وطبعا بعد الخلط بيكون في الحشوة سوايل وااااجد..

تاخذين الخلطة وتصفينها .. وتحتفظين بالعصارة حقت الخلطة على جنب..

..

ثم تاخذين ورق العنب وتبدين تلفين .. وبعد ماتخلصين لف .. تجيبين قدر تصفين في القاع شرايح بصل

وفوقها شرايح بطاطس.. وثم تبدين ترصين ورق العنب..

بعد الانتهاء..

تاخذين العصارة حقت الحشوة تصبينها فوق الورق عنب..

وتزيدين على ورق العنب نص كوب زيت زيتون + نص كوب ليمون مخلوط معاه ملح ليمون على حسب الرغبة <<..

عشان تزيد الطعم الحامض لورق العنب..

وتحطين برضو دبس رمان حوالي 2 ملعقة او على حسب رغبتك مو ضروري تحطينه..

وتجيبين حوالي اربع فصوص ثوم تدقينها مع ربع كوب نعناع مفروم.. وتحطين فوقها حبة ماجي وملعقتين صغيرة صلصة

طماطم وتحطين عليهم ماي مغلي حوالي كوبين.. وتحركين لين يذوب الماجي والصلصة..

وتحطين هالخليط على ورق العنب..

ثم ترصين ورق العنب بصحن يتحمل الحرارة وفوقه ثقل

واهم شي اهم شي يكون على ورق العنب ثقل عشان مايتفكك..

وبعدين تغمرين ورق العنب بالماي .. وتشغلين النار عليه وتكون نار هادية..

وتخلينه حوالي ساعة ونص او ساعتين لحد مايستوي..

ولاتفتحين عليه ابدا خليه يبرد تماما لانك لو عرضتيه للهوا قبل لايبرد راح يسود لونه..

وبعد مايبرد تماما..

جيبي لك صينية ورصيه فيها كامل وحطي فوقه شرايح البطاطس والبصل..

ولاتنسين تاخذين من السايل اللي بقى بعد طبخ ورق العنب وبيكون السايل شوي مدهن وثقيل

وصبيه على ورق العنب عشان يحتفظ بطراوته ويبقى فرش..

وغطيه بورق بلاستيك.. والى الثلاجة وكل ماجعتي طبي عليه..

//

..

ادري حوسه شوي..

بس اتمنى يكون واضح شرحي..

بس اوعدكم بإذن الله انزل الخطوات كااامله ومصورة قريبا..

//

,..