ورق عنب من يديني لعيون ام عبوود 💜

السلام عليكم ورحمه الله وبركاته


يسعد مساكم حبايبنا


ام عبوود الغاليه قد طلبتني طريقتي بورق العنب


واسفه على التأخير بس والله مريت بظروف صعبه ومافضيت اكتبها فعذريني ي قلبي


واليوم جيت وبحط الطريقه كامله بين يدينكم ويارب تعجبكم


اول شي ورق العنب المعلب انواع كثيره فيه منه يجي مقطع وفيه الي يجي قاسي وفيه الي نوعه ردي جداً

انا جربت انوع كثيره منها وقليل الي اعجبني
العلالي .. وحدائق كاليفورنيا .. ورنا .. وبنده .. والرايه .. وقودي .. واورلاندو .. وشتوره


افضل نوع العلالي( ونادر تلقينه ) وبعده واورلاندو وبعد شتوره ( ونادر جداً تحصلينه)


المهم يطلع الطعم حلوو واللف مزبوط 👌


مقادير الحشوة /
كاستين رز مصري مغسول

نص حزمة بقدونس مقطعه ناعم مقدار كفين

نص حزمة كزبرة مقطعه ناعم مقدار كفين

٢ طماطم مجروشه

٢ ملعقة صلصة

١ بصل مفروم ناعم

٣ ثوم مهروس او اكثر (حسب رغبتك)

ملعقتين اكل دبس رمان

ملعقة صغيرة ملح ليمون

ملح

فنجان قهوة عصير ليمون او حسب رغبتك في الحموضة

فلفل اخضر حار مفروم ( ممكن تستغنون عنه )


ملعقةبهارات + فلفل اسود

فنجان قهوة زيت زيتون

( ممكن تزودي في المقادير او تنقصي اي شي حسب طريقتك المعتادة في حشوة ورق العنب)


..


طريقه عمل الحشوه /
نجيب قدر نكشن بـ البصل والثوم ونحرك شوي

ونحط الطماطم المجروشه والمعجون ونحركها

وبعدين نحط الرز المغسول ونحرك كمان

حطي المقادير الي باقي وصبي عليها شوي مويه ( لا تخلين الرز ينضج مرة يكون شوي قاسي لانه راح ينضج بعدين )

بعد م تنشف مويه الرز نحط الحشوه بصحن ونخليها تبرد ونبدأ نحشي ورق العنب


..


ملاحظه /

فيه ناس يحبون يحشون ورق العنب بدون م يطبخون الحشوه ..
انا م احب احب الرز يأخذ طعم المقادير وكل وحده والي يريحها تسويه


..


طريقه الطبخ /


* بعد م جهزنا الحشوه نفرش بطاطس شرائح في قدر الضغط ونفرش بصل شرائح فوقه
* نبدأ نلف الورق ونرصها فوق شرائح البصل والبطاطس
* نسخن مويه ونأخذ منها تقريبا 3 كاسات نذوب فيها
^ مكعب ماجي
^ وملعقة دبس رمان
^ ونص كاسه الشاي ليمون
^ ونص ملعقة صغيرة ملح ليمون
^ وملعقة زيت زيتون
^وملعقة صلصة
^ وفلفل اسود او شطة رنا ( اختياري)
( ونصبها على ورق العنب في القدر شوي شوي
و زيدي ماء حار لين يغطي ورق العنب بشوي

وحطي غطاء داخل قدر الضغط يغطي ورق العنب
وحطي ثقل فوق الغطاء وسكري القدر وركبي الصفيره
وحطيه على النار واذا سمعتيه بدأ يطلع صوت نزلي عليه النار على الوسط
واحسبي له ربع ساعة وافتحي اذا احتاج اكثر رجعيه مرة ثانية
زودي موية اذا ناقصة لين تشوفين ان الورق بدأ ينهرس والحشوة استوت
واذا جهز خلاص صبي عليه زيت زيتون مقدار فنجان قهوه وسكري عليه القدر ولا عاد تفتحينه الا اذا برد تماماً )

وبالهناء والعافية ياارب ادعولي من قلوبكم اذا اعجبتكم ..