وزلادتى بابنى كانت ميسره الحمد لله

السلام عليكم ورحمة الله وبركاته

الحمد والشكر لله ولدت من اسبوعين يوم الاربعاء بتاريخ 21/10/2009 الساعة 12:15 صباحا والحمد لله ولادتى كانت ميسره جدا جدا بفضل الدعاء والصلاه وقراءة ادعية تيسير الولاده وسورة مريم والحمد لله ربنا رزقنى بمحمد

وهذه قصة ولادتى
قبل الولادة ب3أيام روحت للدكتورة وكشفت عليا وقالت الرحم مفتوح 1سم وقالتلى تعالى بعد يومين اعمل لك فحص والفجر اكتشفت انى فى دم نزل فقولت يمكن اما الدكتوره دخلت يدها وطول اليوم نازل افرازات بنيه وفعلا روحت المستشفى يوم الثلاثاء قبل الولادة بيوم وكانت الدكتوره عندها اجتماع فقولت ادخل الطوارئ اطمن وفى الطوارئ استدعوا الدكتوره وقبل متيجى الدكتوره بقليل حسيت بمغص شكل الجنين خاف من الدكتوره فبدأ ينزل والله ده اللى حصل فعلا وجت الدكتوره وعملت الفحص وقالتلى الرحم مفتوح 2سم وسألتنى تحبى تولدى دلوقت بطلق صناعى قولتلها لاء فقالتلى روحى وتعالى بعد يومين ان مولدتيش هولدك بطلق صناعى فسالتها ممكن اشرب زيت خروع قالتلى اوكى بس ربع كوب صغير

فتصلت باهلى قالولى متستعجليش ان شاء الله تولدى طبيعى وبطلق طبيعى فجبت كوب عصير برتقال وحطيت عليه معلقتين صغيرين زيت خروع وكان عندى الم بسيط وبعد شويه دخلت الحمام ورحت نمت لانى طول الليل كنت سهرانه مع بنتى(عمرها سنتين) وصحيت الساعه 6 واكلت انا وزوجى الغداء وحضرت كوب برتقال وحطيت عليه معلقتين زيت خروع وحضرت شنطة المستشفى وقولت لزوجى نزلها فى السياره فقالى ايه رايك نروح نتمشى فى ممشى الملك عبدالله قولتله موافقه قالى خدى معاكى تمر لانه بيسر الولاده واقراى ادعية تيسير الولاده فقرات الادعيه ونزلنا روحنا الممشى وانا بتمشى لقيت الطلق زاد وفضلنا ماشيل وباكل تمر والطلق يزيد لحد مخلصنا الطريق رايح فقولتله مش قادره لازم ادخل الحمام والحمد لله كان فى نهايه الطريق حمام فحسيت ان الافرازات البنيه زادت قوى وطلعت فقالى يلا نكمل مشى ونرجع وانا راجعه وصلت للكيلو 400 ومقدرتش اكمل قولتله مش قادره اكمل روح هات السياره وانا هقعد هنا وفعلا راح جاب السياره وانا دخلت السياره من هنا واذ الطلق زاد جدا بقيت اصرخ وقولتله ودينى المستشفى ودخلنا المستشفى وطلعونى قسم العمليات وحطوا جهاز تخطيط قلب الجنين الساعه 11:30 وقالولى مدة ساعة وان الرحم مفتوح 5 سم وكان الطلق زايد قوى مش قادره استحمل بس الحمد لله كنت بقرأ ايه الكرسى وبقول يا ارحم الراحمين ان رحمتك وسعت كل شئ ارحمنى وفجأه اذ الطفل ينزل ويستدعو الدكتوره والدكتوره مش مصدقه وتقول ولاده مش معقول لانى مكملتش 45 دقيقه من دخولى للمستشفى والحمد لله جه ابنى للدنيا والله يا اخواتى ولادتى كانت ميسره وذلك بفضل الدعاء والحمد لله رب العالمين وعقبال كل الحوامل يا رب