وزني الزايد😔

وعليكم السلام ورحمة الله وبركاته
ما وضحتي لنا نوع نظامك الغذائي عشان نعرف السبب
لكن في جميع الاحوال حاولي ان طبخك يكون صحي بدون مقالي ودهون وزيوت
وجربي كلي من طبخ البيت لكن النشويات مثل الخبز والمعجنات والمكرونه والرز اغرفي لك نص الكميه اللي متعوده تاكلينها فقط
وخذي معاه قطعة بروتين من اللحوم قد كف اليد او نصه + وممكن جنبه تاخذين خضار غير نشويه مثل كوسا باذنجان لوبيا باميا فطر بروكولي قرنبيط كل يوم نوع الكميه مفتوحه لانك راح تحسين بالشبع لما تاكلينها
واهم شي طبق سلطه خضراء الكميه مفتوحه يعني سواء طبختي خضار او ماطبختي السلطه لازم تكون شي ثابت مع وجباتك حتى الافطار كلي معاه لو خياره او شرايح خس او طماطم عشان يحسسك بالشبع
وبس خففي السكريات والحلويات وحاولي تبعدين عن اكل المطاعم والمايونيز والطحينه والبطاطس والذره
وجهزي لك اكل لوقت الجوع والنقنقه عباره عن سلطه جاهزه بالثلاجه او فوشار بالمايكروييف بدون زيت او شوربة خضار
وكل ما ابتعدتي عن السكريات وقللتي نشويات في اكلك بتحسين ان شهيتك توازنت وان اكلك يقل لان السبب اللي يخليك تاكلين ورا بعض هو الانسولين بالجسم لما يرتفع بسبب الاكل المليان سكريات ونشويات
وبخصوص انك تحسين ماعندك طاقه ودايماً مرهقه ومافيك قوه اكيد النوم له دور لكن برضو التغذيه لها دور كبير
انصحك اول ماتصحين من النوم اشربي كوب الى كوبين كبيره مويه
ثم خذي نوعين او ثلاثه ورقيات خضراء مثل بقدونس كزبره كرافس جرجير سبانخ من كل نوع بحجم قبضة اليد او نص كوب + خياره صغيره + عصير ليمونه + ممكن تضيفين طماطم صغيره اذا حبيتي واضربيه بمحضرة الطعام الى ان يصير مره ناعم واجلسي اشربيه مثل الشوربه بتحسين بالشبع وبنفس الوقت هذا المشروب غني بالفيتامينات والمعادن وبيعطيك طاقه ونشاط
ولا تشربين قهوه او شاي او غازيات او اي مشروب فيه كافيين بعده مباشره انتظري ساعتين عشان الجسم يمتص الفوايد اللي بالمشروب

وهذا المشروب مو شرط كل يوم تشربينه تقدرين يوم ورا يوم او كل يومين ولا تقولين اكل سلطه بدال العصر اقول لك الامتصاص يفرق كثير لما تاخذينه معصور الجسم يمتصه اسرع مايحتاج وقت للهضم
وجربي تأكدي من فيتامين د بجسمك يمكن عندك نقص هو اللي مسبب لك كل هالحوسه واللخبطه والخمول
وفي بالصيدليه فيتامين د خفيف اسمه فيدروب اللي يصرفونه للاطفال تقدرين تاخذينه بشكل وقائي احتياطي
اول اسبوع اشربي قاروره كامله مع مويه او عصير وبرضو ثاني اسبوع نفس الشي
اما ثالث ورابع وخامس وسادس اسبوع خففي الجرعه الى نص القاروره كل اسبوع ولا تخافين لان الجرعه تعتبر خفيفه بعكس الحبوب الاسبوعيه قويه وماتقدرين تقللينها

وبخصوص الرياضه لازم تخصصين لك وقت باليوم تهرولين فيه او تمشين سريع مع اخذ شهيق من الانف وزفير من الفم لو ربع ساعه الصباح وربع ساعه بالليل مو شرط نص ساعه متواصله
وجربي حطي بنتك في عربيه وألبسي شوز رياضي مريح واطلعي امشي بها بحوش بيتكم او السطح او اذا تقدرين اطلعي برا البيت خذي لك كم لفه مشي سريع وارجعي بتلاحظين نفسيتك تتحسن
اما بخصوص النوم الله يكون في عونك كل الامهات مثل وضعك واذا اهلك قريبين منك خليهم ياخذونها ساعتين ثلاثه وانتي ارتاحي حاولي تنامين لان صعب يومياً قلة نوم على نفسيه تعبانه ومرهقه وضغوطات الوزن تحتاجين احد يساعدك ويخفف عنك الضغوطات وكله مأجوره عليه