وشفيكم حبيباتي ...تراكم كلكم بخير .. ورجالكم بخير
والدنيا كلها بخير...
قريت مواضيع كثيره .. وكلها أفكار حلوه ..
بس انا متيقنه انها افكار حلوه بينا احنا يابنات حوا ..
يعني مسألة الورود تنثرينها ..والشموع تولعينها..تكسر الروتين .. وحركه حلوه
بس تلامس احساسك أكثر من انها تلامس احساسه هو وصدقيني يمكن يستقبل تعبك هذا بابتسامة مجامله .. لكن أبد والله مو هذا اللي يهمه بكثر مايهمه أشياء يفكر هو ويتمنى يشوفك تطبقينها وطبيعة الرجل الفطريه تبحث عنها,,
اللي يجذب الزوج..وياسلام لو يكون حظه في هالحريمه
اللي يجذبه
شي ثاني .... سبب ثاني.... صدقوني
كل الرجاجيل يدورونه
ويتمنونه في زوجاتهم .
حاجات تهمهم جدا
وبعضهم يحاول يوجه زوجته..
وبعضهم يخاف يزعلها
وماعنده قدره يوضح لها.. ويعتبر هذا نصيبه وحظه
ويسكت0
الخلاصه........ الزبده........
كل وحده فيكم جميله وخليني أقول على الأقل فيها لمحة جمال في اي شي في جسمها .. اذا ماشافوه الناس اكيد زوجها يشوفه .. وفيها ميزه تميزت فيها ومنحها اياه الله
بس لازم كل وحده تكتشف نفسها ..
وتكون واثقه أكثر في نفسها عشان تعرف تقدم لبيتها أكثر0
حبيبتي ..أختي.. وأمي .. وبنتي
أبكلمكم بكل عفويه وبساطه وحاولوا تطبقون بس لاتستعجلون النتيجه0
سواء بينك وبينك زوجك موده ورحمه (واحمدي الله كثير على هالنعمه والتوفيق)00
أو ان تكون علاقتكم ليست لهذه الدرجه من المحبه والسكن فلعلك بقيامك بتلك الواجبات أن يطرح الله محبتك في قلبه ولو بعد سنين (وشفت من هالحالات كثير ),اهم الشي الصبر0
صديقتي وأخيتي
افترضي تونا داخلين بيت الزوجيه ..
وأحلامك كلها ورديه
وكلها عطور فواحه نديه
ونعومه وملابس مخمليه
وسوالف ..اللـــــــه عليهــــــــــا غزليـــــــــــه
ويازينها حلو الليالــــــــــــي كلها قضيناها عسليــــــــــه
يااااااااااه
ياليت الزواج بهالصوره الخياليه
ورود.. وشموع
وانتي وهو واقفين فوق المروج الخضراء
وكل واحد ماسك خصر الثاني ومميلين روسكم على بعض وتتمايلون في جو رومانسي..
ياليت نعيش قصص الخيال
حياة سندريلا وسنو وايت
لكن
كل أسف وكل صدق وببالغ الأسى
أقولك
فركش
يمر الاسبوع والشهر والشهرين
طيب وبعدين...
تبدا الحياة جد والعذاريب والعيوب والطبايع تبين
وانت قلت كذا.. وليه؟ ومتى؟
وانت اللي بدأت وانت اللي سويت..
حبيباتي
الحياة الزوجيه والأسريه .. أساسها اثنين يبنون فيها حياتهم سوى
ولابد من الشراكه من الاختلاف والنقاشات
وهذا ايه.. وهذا لا
وهذا غلط وهذا صح
أبي أقولك عدة أمور أساسيه ولو شفتوني غلطانه صححوا لي
انا راعية سواليف وسعة صدر وصديقي من صدقني بالقول
أبي أقول لحواء الغاليه اللي تستحق السعاده بما وهبها الله من صبر وايثار وحب لاسرتها وعيالها
يصل أحيانا الى التضحيه0
-أكسبي راعي الدين والطاعات وأعينيه
والصلاة.. الصلاة وانتي الكسبانه عن الخيانه والشك والظلم
(ان الصلاة تنهى عن الفحشاء والمنكر)
ولو افترضنا انه على الرغم انه يصلي الا انه يرتكب شيء من المنكرات وقد يتعرض لشيء من الكبائر الا اني أطمنك انه مادام فيه خوف من الله ..ابشري مرده يرجع ويتوب
واصبري والله بيعوض صبرك خير
وهذا الشي في صالحك 100%0
وأنا شايفه أكبر قلق عند البنات في بيتنا منتدى حواء
هو الدشوش وبلاويها ومقارنة الزوجات بالبنات اللي بالقنوات0
وشرايك حتى لو انتي تبينها وتحبين تفرجين عليها .
. خذيها من باب (ومن يتق الله يجعل له مخرجا)
شجعيه يشيل القنوات اللي فيها فسق أكثروخلي شويه تتسلون فيها
وشوي شوي الين تستغنون عنه بحيل الله وقدرته..
وتراكم والله العظيم بتحسون براحه نفسيه انكم شلتوا هالبلوى من بيوتكم وخصوصا ان كان عندكم عيال0
وأضعف الايمان تفتكون من مشاكل الغيره والمقارنات0
-لاتكثرين الحنه والرنه على راسه واللت والعجن في المواضيع0 وخصوصا اذا كان فيه نقطه مختلفين فيها
يطفش الرجال ويشيل هم دندرتك ويفضل مره ثانيه مايقول شي ولا يطلب رايك في شي0
راعيه في ظروفه الماليه .
. يعني أكيد تجي على الواحد فترات يكون مطفر فيها وتقل السيوله عنده ..
حسسيه انك معاه وقولي له( يدي على يدك وبيفرجها الله انشاالله وتعوض علي بأحسن شي)0 <<< كلمة تعوض علي باحسن شي مهمه عشان مايمسك خط ويتعود على الاقتصاد ومسكة اليد0:(
الحاله النفسيه للزوج ولابد على الواحد تجيه لحظات غلق وماله خلق على أحد.. سواء بسبب ولا بدون سبب وسعي صدرك عليه وهم في هالحاله عباره عن 3 حالات:
- اما انه يحب يفضفض بس عشان يرتاح ومايبغى اي حلول منك.. قدري واستمعي وانت ساكته وأحسني الاستماع0
-اما يحب يفضفض وخليه على راحته وبعدين يحب يسمع منك.. ساعتها ريحيه بحلول منمقه
وما تركبينه الغلط اذا كان غلطان في وجهه مباشره .
يعني تستعملين كلمة .يمكن ..أتوقع .. يبدو أن.. وشتتوقع السبب...
وتراعين فيها نفسيته عشان مايندم انه حكى لك
-اما انه يحب يجلس لحاله وما يبغى احد يقعد معاه<< وهذا طبع اختكم كبسوله0
معليش لاتزعلين انه مايبي أحد معه .. ريحيه بصمتك وتأدبك واطلعي من الغرفه الين يطيح اللي براسه وبعدين يطلع لكم0
وفي كل الأحوال الثلاثه ضفي العيال عنه وخلي عندك مرونه في تقبل اي وضع وصدقيني راح يكون ممنون على تقديرك له وانك فاهمته صح0
اذا أقبل زوجك ولا طلع خليك مشرقه و مو متنكده ( مافيه مانع انت في الاول والأخير انسانه لك مشاعرك بس ماتصير التكشيره ميزه فيوجهك)
وتكوني مبتسمه ولا مانع من وجود الكلمات الترويحيه من جمل حافظنها اما كلمات غزل أو ترحيب تعبر عن شوقك له0
لما يجيب لك أغراض أو لبى طلبك في شي انت مشتهيته حتى لو هي واجب عليه يجيبها ماأحلاها لما تقولين له..
من ايد مانعدمها ... الله لايحرمني منك .. الله يخلي لي دلالي ...تعيش وتدلعني...
وماشالله عليكم يابنات المنتدى ماعليكم قاصر ذرابه0
باقي أهله.. داريهم وداري خواطرهم حتى لو ماعطوك وجه .. احتسبيها لله وابتغاء رضا الله ثم رضا الزوج0
اياك والغيره من البيوت الثانيه وترا ورا ورا كل باب سر .. ولا يغرونك الناس اللي أشكالهم مالكين الدنيا وما فيها ..
كلهم ولا بد عليهم شي قاصر بس يعرفون يدارون على انفسهم واحيانا لما يكونون فاقدين الشي يعوضونه بالمباهاة قدام الناس0
-باقي المهم والمهم جدا:
العاطفـــــــــــــــه
ترجميها له بكل صدق
أحسني عشرته في رغباته جددي معه في حاجاته الخاصه اللي بينك وبينه
نفذي وانبسطي معاه في كل شي يحبك تبادلينه معاه
تأكدي انه بينك وبين زوجك مافيه حيا ولا فيه عيب
وتأكدي أكثر ان هالنقطه اذا راعيتيها يكون نظرة الزوج لزوجته كلها اشتياق وحب ووله
كلمه أخيره وعابره يعني
انشاالله مافيه وحده بتقصر من هالناحيه لاتجوعينه ولاتهملين عيالك في أكلهم ولا لبسهم0
وبعد هذا كله ابن أمه لو لقى فيك عذروب.. ولو قصر في حقك يكون لك وجه تناقشينه ..ولو غلط بيندم لأن زوجته الحبيبه ماتستاهل يغلط عليها0
وكل البشر فيهم بذرة خير وخوف من الله والزوج فيه كل خير ومهما قسى عليك الا يرجع لأصله ودينه0
وبعض البنات يقولون اسوي كذا بس مافيه فايد ه..
أرد عليك وأقول لك اصبري .. الرجال يحس بكل شي بس بعضهم يعرف يشكر وبعضهم يدللون ويكابرون ويحتفظون بشعورهم جوا..جوا..مرره في المكان اللي مايطلع عليه الا الله0
ولا تقولين طيب ليه ..خلاص حبيبتي تقبلي.. كل انسان وطبعه واذا سلم الاساس الباقي مقدور عليه ....أهم شي ان الحياة تمشي
وبعد مايكون أخلاقك بهالجمال ماراح يلقى أبد سبب انه يقصر في حقك ... وراح يحس بالنعمه اللي هو فيها لما يجلس مع اصدقاه ويسمع شكاويهم عن حريمهم .. ويصير يشتاق للبيت أكثر .. أكيد لازم يشتاق اكيد مايعاف جنه وانت حوريتها0
وتسلــــــــــــمون لأخيتكم كبســـــــــوله
الله يعطيك الف عافيه:26: