وشلون أنتم مبسوطين؟

ما أعرف وشلون أبدا.. قلت اسجل واكتب شي هينا أفضفض عن نفسي

أعاني هالأيام من إكتئاب شديد واقضي يومي كله نوم واكل وافتح الكمبيوتر اتفرج على الشاشة وبكذا ينتهي يومي ماعندي شي اسويه بحياتي بالإضافة اني محاطة بمشاكل إجتماعية كثيرة مخليتني ما احب اطلع من البيت
احس بضعف ورغبة أن الحياة تنتهي أحس اني غريبه ومغتربة بوسط ديرتي إن جيت أطلع مدري وين اروح؟ إن مسكت التليفون مدري على مين اكلم ولا لي خلق اتكلم؟ إن جيت باكل مالي نفس اكل؟
حتى الوظيفة برا البيت عجزت ألقى وإن لقيت مالقيت احد يوديني وإن بغيت ادرس نفس الشي من يوديني محد فاضي لي كل الناس مشغولين

استغرب احياناً وشلون الناس عايشين بهالديره! كل شي الحرمه لا لا لا
بعذر الحريم مايفكرون إلا بالحمل والولاده لأن مافيه شي نقدر نسويه.. كل شي ممنوع عندنا الرجال يروحون ويسافرون ويجون واحنا قاعدين .. الرجال يسيرون على بعض ويطلعون كافيهات ومطاعم واحنا قاعدين طلعتنا صعبه ومواعيدنا صعبه... الرحال متوظفين ولهم رواتب زينه واحنا ان توظفنا الراتب يادوب يكفي حق السواق الي تتعاقدين معه لمشاوير الوظيفه وفوق هذا انواع الإهانات بهالوظيفة
ومليت من الصديقات بنات هاليومين مايعجبوني وتفكيرهم سطحي وأسواق ومشتريات وموضه وملابس وأنا ما احب ذا الخرابيط
احترت بنفسي وش اسوي فيها ماقدرت اشتغل بتجاره ولا وظيفة لي 5 سنين احاول احاول
يوم تزوجت حاولت احمل قلت يمكن أوجد هدف بحياتي وبصراحة شي تمنيته من قبل الزواج أني أصير أم ..لكن إرادة ربي فوق أي شي بهالدنيا لي 4 سنين وماحصل شي وسوينا فحوصات كلن يقولنا سليم سليم.. طيب والسواة ؟

بديت من 3 ايام اني استغفر اكثر من 100 مره واصلي الوتر واداوم على الدعاء وأتحرى أوقات الإستجابه ويارب الفرج..

تعبت والله من نفسي والي يتعبني زياده عندي إكتئاب شديد وما ابي اطفش زوجي معي ولا اقدر اروح طبيب نفسي احس اني وصلت الحضيض من المعاناة .. انهار دايم ان دخلت الحمام بكاء لين يدمي قلبي .. ما ابي اصير مصدر حزن أو شؤم على الآخرين ما ابي احد يحس اني اعاني ابي كل الناس تحس اني مبسوطه ودخلتي تجيب البهجة وابي زوجي يكون مبسوط ما ابيه يتعب معي ولا ابي انقله شعور حزني ما ابيه يحس اني وصلت مرحلة صعبه من حياتي ماتخيلت اني اوصلها
جبت حيوانات عندي بالبيت تونسني حاولت حاولت احس اني تعبانه! ما اشتهي اكل ما اشتهي اتكلم وما ابي احد يسأل عني واعجز أمثل اني مبسوطه معد اقدر
احب افرح الناس وحاولت اني ابذل جهدي واسوي أشياء للباقين .. وكنت انبسط بس مؤقتاً وبعدين ارجع للبيت وافكر وبعدين وش بسوي بوكرا وبعدو وبعد بعدو؟
وشلون انتم عايشين وشلون؟ مشا الله وشلون صابرين ومستحملين؟

الله يخليكم ادعوا لي ان الله يرزقني بالذرية الصالحة وانشغل بتربيتهم واونسهم ويونسوني ويبعدون عني هالوحشة والوحده الي خانقتني .. كثير بنات منكم فيهم الخير ودعائهم مستجاب.. يمكن دعوة وحدة فيكم يستجيب لها ربي لا تنسوني بصلاتكم اليوم احس أني مخنوقه وصوتي أختفى ومافيه سبب يخليني اعيش لين بوكرا!