وش أفضل طريقه للتعامل مع حرمه الأخ

السلام عليكم ورحمة الله
أنا من زمان يدور في بالي هالموضوع
ولما اشوف المواضيع اللي تنطرح عن أهل الزوج احتار وأحزن في نفس الوقت لأَنِّي أحط نفسي مكان بعض أهل الزوج اللي البعض ينصح عليهم


أنا من عرفت الدنيا سمعت عن قصة جدتي مع أهل زوجها بحكم انها من برى العايله تعرفون البعض كيف يتعامل
تحكيها لي لحد اليوم هذا فيها كميه الم وقهر اتضايق كثير لما اسمعها مع ذلك جدتي قايمه على عمانها وشالتهم حتى في مرضهم وتحملت كل العذاب والاضطهاد اللي من حولها والضلم رغم ان جدي كان عارف بس كان يصبرها ويتحملها اذا حطت حرتها فيه
جدتي يوم كبروا بناتها كل حمواتها يتسابقون عليهم لأنهم عارفين اصلها وتربيتها
طلعت امي وخالاتي كل وحدة لبيت زوجها ونفس الشي أشوفهم وأسمعهم يقولون أحنى متحملين البيت والمسؤوليه مع باقي حمواتهم عمري ماسمعت جدتي تقولهم لاتسون ولاتحطون ولاتشتغلون بالعكس تقول الحرمة السنعه تراعي عمانها وتقوم فيهم وامي وخالاتي نفس الشي ومع الزمن الطويل ويوم كبرت وكبروا عيال خالاتي كل وحدة استقلت في بيت وعلاقتها مع أهل زوجها سمن على عسل ومثل الخوات ومابالغ بهالكلمة ؟؟؟وطبعا ماقول حياتهم مثاليه أكيد يصير فيها مشاكل واختلافات وأنتم تعرفون الحريم كيف


طيب وش السر أنا ابي اعرف

الحين في هالوقت نشوف الحرمة تبي بيت لحالها ومن حقها الكامل بعد ؟؟بس اللي قدر الله عليها تسكن مع أهل زوجها كيف تتعامل معهم وكيف يتعاملون معها
أنا زوجه أخوي معنا ساكنه لان ماعندة قدرة ماديه وهي من اول أسبوع دخلت طلبت بيت لحالها رغم والله ماجى منا شي وهالشي صدم اخوي يقول مالك الا أسبوع مايمديك حتى أنا اشوفك تضحكين معهم ومندمجه وعلاقتكم طيبه قالت ماتدري بكرة وش يصير بعدين حتى لو انهم طيبين أنا ابي بيت لحالي 👍حقها ماقول شي
بس دام الضروف ماتسمح قدر الله وجلست معنا بصراحه اول شهر كانت طيبه وكنت أقول الحمد لله أن ربي وفقنا بوحدة تفهمنا ونفهمها

بقولكم طريقتنا اول مادخلت عندنا
استقبلناها قعدت شهر ماطلبنا منها تدخل المطبخ حتى اول زواجهم كان اخوي يجيني يقول فلأنه مستحيه تروح تحط لها اكل وهي جوعانه اروح أحط معلبات طبعا ياعصر يامغرب واجيبها لها بطريقه أني أنا بعد جوعانه واعزمها وانا أصلا مابي

يوم خلصت اجازته وراح بعد شهرين
قبلها جى لامي وطلب منها تعلم حرمته اماكن الاغراض وكيف النظام وكدا امي ماقصرت قالت لها كل شي وقالت النظام إنتي اختاري وش يناسبك تبين يوم كامل او تبين وجبه اختارت وجبه متابدله غدا وعشاء يعني اذا اليوم عشاء بكرة تأخذ غداء واختي عشاء اما الفطور لا علي بحكم أني ادرس الفطور انسب لي بدينا نشوفها مب ملتزمه بكلامها نتفاجئ اخوي يجي يهزئ ليش امي تطبخ وانتم جالسات تطلع نايمه وإلا ساحبه هي وياه مع بعض أنا كنت أقول معاريس جدد واعذر بس اختي بدت تتضايق
اذا كان عليها يقومنا نشيل معها ونغسل واحنا عادي متعودات لان هذي طريقتنا من قبلها وهي اذا علينا ماتحرك ساكن ابد تجي تجلس وتسولف علينا في المطبخ وإذا خلصنا طلعت معنا

بعدها حملت ولا عاد شالت شي ليوم ولادتها.

رجعت عقب الاربعين متغيرة مب خويتنا الاوليه قالبه رغم أني احس جواتها طيبه
بس مادري وش السبب من تقعد تمسك الجوال تحسين كان احد يشيشها
كنت أنا وهي نجلس وتسولف علي واسولف عليها تعلمني بخلطات واعلمها افضفض لها وتفضفض لي يعني مثل اختي صارت تخبي صارت تحاول انها تسحب مني بس مُّاتقول
صارت عصبيه اخوي صار عصبي متغير علينا جت وقالت فلان يقول لاتشتغلين وانا أقول مايصير وكدا عقبها جى اخوي وقال فلأنه تقول ظغط ماابي استلم سكتنا وبلعناها وهي كلها وجبتين متبادله عزايم ماتتدخل فيها ولاحتى قهوة او شاي او تصبها لآصرنا بالمطبخ. اي مشوار لنا مع اخونا يضايقها كانت اختي تراجع مستشفى كل أسبوعين كانت تروح معهم أو اذا اختي طلبت السوق تروح طبعا اخوي عنده عادة سيئه ماحب كثر المشاوير يعني تبين شي والسيارة مآشيه روحي مرة كانت هي طالبه تروح وأختي طالبه تروح مادرت عنها زعلت وأصرت على اخوي ماتروح اختي استغربناها وحزت بخاطر امي لانها هي اللي طلبت منه يأخذ اختي قال لا مالها لزوم كل مشوار تروح بعني بطريقه انها تطابن حرمته رغم أنى عارفين اخوي هو حاط نفسه بوجه المدفع لان الرفض منها وانا هنا اقول لكل وحده خصوصيتها بس لو هالكلام من الاول عقبها صدقوني مر علينا عيد ماقضينا وهو موديها ورفض يودينا يقول مب لازم تخيلوا عيد من غير ملابس جديده وهو يتفاخر ان لَبْس عياله التشيرت بس بسبع ميه أنا ماالومها هنا انفجرت اختي وحطت اللوم عليها رغم أني ألومه هو لانه الرجال حتى لوهي اسائت لو مالقت منه استجابه ماسوت كذا. تخيلوا نجلس نسولف مرة في مسلسل وحدة شريرة وجميله ويحبها زوجها وهي حيه من تحت تبن المهم المسلسل كل العايله تتابعه حتى اخوي وكلنا نكرها قاعدين نتناقش قلت أنا بكرة بسوي كذا امزح امي زعلت مني وقامت تهاوشني قلت بالعكس أنا و صديقاتي معجبنا قوتها واسلوبها مع زوجها طبعا زوجها غير قالت اختي بأكثر من بيقلدها في الجيل هذا وقمنا نضحك وهي معنا تضحك الا بعد فترة جاي اخوي لامي يقول صدق فلأنه تقول كذا هي تبكي عندة تقول تقصدني قسم انقهرت المشكله ان امي قالت هي قالت الكلمه بس ماوضحت ان حرمه اخوي بعد مشاركة معنا وانى نضحك تقول خفت انهم يتهاوشن وقعد اخوي سنه مايكلم اختي ويقول أنتم تغارون منها أنا ماهمني كلامه كثر ماانا قاعدة أدور السبب عمرنا ماتدخلنا فيها حتى ادا قصرت بشغلها نسكت ونقوم فيه احيان تسوي لنفسها اكل وتجي تنزل مواعينها وتروح أنا كنت اغسل علشان ماتصير مشاكل بينها وبين خواتي
بس خلاص زهقت غير كذا الحين ماتسوي الا غداء تخيلوا امي وش تخليني أسوي اطلع دجاجتها وتحطها بمويه وإذا مالقت كذا تزعل طبعا أنا اخذه الفطور وأحيان اجهزة بدري واحطه بغرفه لأَنِّي أكون مواصله فامي تغسلهم وتطلع لها الدجاجه
اذا كانت امي مب موجوده توصيني أني لازم اطلع الدجاجه حقت الغداء او اللحم لانه مايستاهل انها تقوم من النوم علشانها أجي ألقى مواعيني على شكلها حتى علبه الحليب والاشياء اللي تخرب لو طولت برى على شكلها أنا انقهرت صراحه على الاقل شيلي هالأشياء