أنا هذا اللي خايفة منه

بس الشكوى لله والله ما عندي دليل غير ان ربي يشهد اني صادقة

الشغالات سفرتهم والسفر معروف اللي يروح للدول المعروفة بالفساد ليش يروح حسبي الله ونعم الوكيل وبس


طيب يابنات بغيت أسألكم يصصلح أطلب الطلاق من المحكمة وأنا عنده في البيت ؟؟ يعني مارحت لأهلي أو لبيتي الجديد أكون عنده في بيته وأطلب الطلاق من المحكمة اللي تعرف ترد علي تكفون ؟؟؟

ربي. يصلحكم

اختي انا شفت برنامج عن هالامور مع الشريان الثامنه لو تقدرين تشوفينها يوتيوب تفيدك
تكلموا في هالنقطه تقدري تطلبي الطلاق وانتي عنده بس مو من صالحك لانك ببيته الحين انا اشوف لو انتظرت قليل لين تنتقلين للبيت وتستقرين عشان تطردينه طردة كلب
وتقولي للقاضي كل مصايبه الله لايسامحه انا نفسك وامشي على نفس خطاك لان ماحد وقف معي ولانفعني عندي شغلتين بس انتظرها الاولى اكمل دراستي وادور وظيفه واشتري بيت بس كان مانعني اني ادرس تو وافق قبل سنتين وكملت انتساب يااارب استمر ومايمنعني يفصلني على قوله لاني حتى اذا لقيته على علاقه يقول اسكتي والا مافيه جامعه تخيلي الوقاحه
والثانيه اولادي يكبرون عشان اسكن لحالي وعشان يوقفون معي وعشان يكونوا محرم لي لان اخواني نهائي مايبغون الوحده تسكن لحالها مصيبه عندهم

قصتك حزنتني بس اعطتني حااافز ماتتصورين قدايش حفزتني احقق املي انا نفسك ماعاد اطيق اشتكي لاهلي لانهم يحلون الموضوع ويرجعوني اكيد اش يبغون من وحده معها اربع اطفال ومره اخوي كلمني لانه كان مسافر قال شوفي ماتبغين تعيشين معاه انا اتولى الموضوع واطلقك بس عيالك مالنا شغل فيهم احنا جوزناك وحيده وترجعين لحالك وانا من بكره اجيب ورقتك جلست ابكي وصبرت ورجعت انا احسه مو اهل عشان يربيهم واخاف على بنتي بعد يضيعها والله ادعيلي

بداري يا قلبي

شوفي يا قلبي :

أنا تأخرت كثييييير بهالخطوة لكن ما أقول الا لله حكمة أكيد ومحسنة الظن بربي ولا بصراحة زوجي ماينصبر عليه ابدا ابدا
ورب الكعبة الحين دخل الشهر الثالث وهو ما يكامني وميت قهررررررررررر يوم حس اني بطرده من حياتي لأنه هو يبي يخون ويضطهدني وبنفس الوقت اعيش تحت رحمته ,,, أنا بححاول اتحمل هالسنة ما أسكن بيتي بسبب الديون الكبيرة ع راسي كل راتبي يروح فما أقدر أغامر بحياتي وحياة عيالي لين ع الأقل يخف بعض ديني والقى ع الأقل شي أصرف منه وناكل !!

تبين الصدق صحيح اني الحين تعبااااااااااااااااااانة مرة لأني متزوجة بالأسم قدام الناس ولا أنا من ثمان سنوات مطلقة بمعنى كلمة من غير ورقة طلاق لكن بنفس الوقت من يوم حسيت اني بديت أمشي بموضوع الأنفصال احس الفرج قرب وان الله بيحلها وافتك من ضيمه وقهره ومغازله وحعشقه للحريم وسفره وتعذيبه لي

ابد وانا واختك واصلي واول شي تسوينه بعد الوظيفة سوي لك بيت ترى انا بعد 20 سنة توي اشتري وصصبرت ع ضيم وقهر وذل ما يعلمه به الا ربي فانت استفيدي من تجارب الاخريات سواء انا ولا غيري وما عليك من اللي يقولون المرأة ما تقدر تعيش من غير رجل والله شوفي انا ذريتي بنات ولد مريض عقليا ومع ذلك متوكلة ع ربي اشد التوكل وربي ما يضيعنا هو اللي خلقنا وهو اللي يرزقنا مب ذا الرجال اللي اسقونا الذل والمر
بس خططي بسكات لا يدري فيك لانه لو درى والله ان يقلبها عليك ويخلي حياتك جحيم لا ن الرجل موته يحس ان مرته مستقلة وممكن تعيش حياتها من غيره
الله ييسر لي ولك ولكل مظلومة

حسبي الله ونعم الوكيل الله يفرج همك ويكون بعونك

اذا رحتي للمحكمه بيعطونك موعد بعيد يعني بعد 6 او 7 شهور
والشيخ يشوف اقوالك ثم يسوي جلسة او جلستين للصلح
يحاول فيكم ترجعون لبعض
عشان كذا لازم ومهم جدا تقولين البلاوي اللي يسويها واثر هالشي عليك وعلى بناتك
حتى يفكك منه بدون عوض يعني ماترجعين له مهره
ولو تبين ممكن الشيخ يطلب من زوجك يسوي تحاليل

يارب يكون حظك مع قاضي حبيب ومتفهم

ايه صح اتوقع زوجك مايحضر الجلسات .. اذا ماحضر الجلسه الاولى ولا الثانيه
خلاص يطلقونك منه في الجلسه الثالثه
او انهم يوقفون بطاقته الصراف او يطلبونه في عمله يعني يجيبونه غصب

الله يعينك قضايا الطلاق عندنا طويله توقعي تنتهي في حدود السنه
الله يعوض صبرك خير ويرزقك بر عيالك يارب