ظلع @thlaa

محررة برونزية

وش اسوي

السلام عليكم
اولا انا بنت عمري 31 ماانخطب ابدا مع اني اهتم بنفسي ومقبولة الشكل واروح لم اجتماعات وبيتنا مايفضى من الضيوف ودائم اقاربي يعرفون من اصدقائهم وجيرانهم احد يدور ويذكرون له كذا بنت وانا ما كاني موجوده الى درجت اني سئلت امي هل بيني وبين اهل السعوديه رضاع المهم من سنتين بدئت اتصل على خطابات واهلي ما يدرون لانهم معارضين هذا الشي ولا يويدونه وهم والله صادقين ماالومهم تخيلو كلمت 40 خطابه وكل الي عندهم يا متزوج او مريض او فيه شي او عاطل او لعاب مره دقت على جوالي وحده قالت عندي امام مسجد وزين لا تفوتينه قلت طيب هذا رقمنا الثابت خليه يكلم على ولي امري طبعا كلم والناس تصلي المغرب قال وين امك امي ردت عليه على طول قال لها ابخطب بنتك وشكله يتمسخر وطلع لعاب ومره ثانيه دقت على خطابه ثانيه قالت عندي واحد وبعدين كلم على ابوي وطلع لعاب والله اني بغيت اروح في ستين داهيه ومره ثالثه دقت خطابه وارسلت لنا واحد واسئلو اخواني عنه وطلع سكير ورابع نفس الشي وطلع محشش واهلي مستغربين من وين يجوننا ذولا والغريبه كلهم بدو واخواني يتسائلون يعني كل مره يدق علينا بدوي ويطلع لعاب اويجينا ويطلع مو مضبوط المشكله اننا ما ندري من الي دلهم علينا وتبدى التسائلات في البيت وانا كاتمه السر لاني عارفه المصدر انا قلت بنفسي يابنت الحلال الباب الي يجي منه الريح سده وستريح خلاص بلا خطابات ولا هم جربت 40 وحده وكل الي عندهم المترديه والنطيحه هم صدق بعضهن حريم طيبات بس ما يصير عندهم الا الي مش ولابد فتركتهم وريحت راسي وتوجهت لربي والدعاء اخر اليلل واستغفار وتوكلت عليه والله اني شعرت براحه وانا واثقه به المشكله ان اليوم كلمتني خطابه على جوالي قالت لي عندي واحد بدوي خريج جامعه وامام مسجد وموضف لا تفوتينه وووما الى ذالك انا سئلتها هل هو الي يتصل عليك ولا اخته قالت لا هو ويوم سئلته وين امك وخواتك قال امي ميته وخواتي كل وحده لاهيه في بيتها انا قلت للخطابه عطيني يومين افكر وارد لك اواذا كلم لا يقول اني من طرف خطابه بس عطيني مهله انا يابنات محتاره اذا دق على اهلي بتبدى الاسئله تدور في راسهم هذا عاشر بدوي يجي ولا ندري من الي يجيبه حنا من القصيم وهو من الحدود الشماليه ولا الوم اهلي فعلا موضوع محير صراحه
والي انا مقلقني زياده ليش شاب مثله هو الي يكلم خطابه كانه مقطوع من شجره ووش الي حاده على الخطابه وبعدين يقول للخطابه ابي مجرد حرمه والسلام انا لو اني ولد ادور ولا اروح لخطابه ودفع الاف وخساير اعرف انكم بتقولون خليه يجي وسئلو عنه اقول هذا اكيد بس خايفه اخليه يتصل على اهلي ويطلع لعاب او ينسحب من اول اتصال مثل غيره او يسئلون عنه ويطلع مو مظبوط ومن ثم تيدى التسائلات ةالشكوك وما الى ذالك والله يا اخوات ان لو ان الي دله علينا جارنا او خالي او عمي او احد نعرفه ثم طلع لعاب او مو مظيوط كان عادي عندي واهلي ما يشككون لانه معروف مصدره
الي بتقول استخيري اقول لها انا بس كل شوي استخير وادعي بس ابي تشيرون علي

يلزم عليك تسجيل الدخول أولًا لكتابة تعليق.

تسجيل دخول

ظلع • 15 سنة

ابي ردود

مشاعر قلب • 15 سنة

يااختي شوفي انتي وش قصتك مع البدو ؟؟؟ عجبي ....

كل اللي خطبوك ماقلتي مشكلتهم مو مضبوطين وبس .. قلت والمشكلة انهم ( بدو )

يالغاليه حطي فبالك قاعده .. البدو والحضر كل منهم فيه الصالح والطالح .. ودامك تشوفين ( البداوه ) بحد ذاتها مشكلة

فارفضي الاخير حتى بدون ماتسألين .. لانه هالشي ماراح يريحك حتى لو انه بدوي مركز وقيمه والسبب

لانك تشوفين البداوه مشكلة ...

اما اذا كان قصدك انهم بعيدين عنكم .. ومايعرفونكم ابد .. فما ادري والله ..

عموما ياحبيبتي انا افضل انك تستمرين بالاستخاره وخلي الامور تسير على ماهي عليه ... وانتظري واصبري والحي على الله

بالدعاء والله انك ماراح تموتين الا مستوفيه رزقك اللي الله كاتبه لك ..

عموما الله يكتب لك الخير والصالح ..

ليييييييين • 15 سنة

الله يرزقك الزوج الصالح

كثري من الاستغفار بنية الزواج

واذا على هذا الخطيب خليه يجي ويسئلون عنه يمكن يكون فيه خير

واذا بدو يسئلون صرفيهم قولي من طرف صديقه لي وانا مااعرفه

واستخيري اهم شي والله يرزقك عاجل غير اجل يارب

~يمك دروبي~ • 15 سنة

انصحك نصيحه لا توافقين انو يجي يخطبك لان هالحركات صارت واضحه نيته
يتزوج من قبيله ثانيه عشان اقاربه مايدرون
حتى لو سوا حفله وبيطلع لك مية عذر عشان اهله ما يحضروون وفي النهايه الزواج ماراح يستمر

هالشي صار لوحده من صديقاتي وكمان وحده اعرفها من قرايبنا نفس الحركات والكلمات
والنهايه طلاااااااااااااااق بعد كم شهر

انصحك اتركي هالخطابات والله ما يجي من وراهم خير لان اغلب الرجال اللي يلجأون لهم ما يبون اهلهم يدرون

اصبري والله يعوضك خير ان شاء الله ويزقك بالزوج الصالح يارب اللي يصونك ويخاف عليك

ظلع • 15 سنة

انا ما اقول في البدو شي والنعم فيهم هم متطورين لا تفهموني غلط يا بنات انا ما اقول ان فيهم شي لا والله والي جونا مارفضناهم عشانهم بدو لا تخيلو بدوي وسكير بدوي ويحشش وبدوي وانسحب من اول اتصال والمشكله اذا كنتي من قلب نجد ويجيك 10 من الحدود الشماليه واهلك ما يعرفون مصدرهم بنات رجاء افهموني ولا ابي تدخل وحده وتهاجم تراني ماني ناقصه الي فيني مكفيني حتى يا اخوات لو انا من بدو الشمال والفخر ولا اقول فيهم شي وجاني خطاب ورى بعض من القصيم واهلي ما يدرون من وين مصدرهم ومن ثم يصيرون مو مضبوطين او لعابين اكيد بصير في دائرة الشك انا مقصدي اذا كانت البنت من ديره ويجيها ناس ورى بعض من ديره ثانيه ارجو انكم فهمتو