وش الافضل موظفة او ربة بيت

السلام عليكم ورحمة الله وبركاتة

اخواتي ودي اشاوركم بموضوع وماابي الاراي اهل الخبرة والحكمة .
عمري في الثلاثين معلمة من ثمان سنين . تقدم لي شخص فية كل المواصفات دين واخلاق ووظيفة واستخرت الله ووافقت علية .كلمني عن طريق طرف ثالث قبل الخطوبة وسالني وش شروطي وتكلم عن نفسة وقال طبعي كذا واحب كذا ومااحب كذا 0 وقال لي ادري انك موظفة بس انا اهم شي عندي راحتي وبيتي وعيالي. قال ان ان اصحابة متزوجين من موظفات ومو مرتاحين يااما انة مقصرة معاه او مع عيالة او بيتة وكلامة واقعي وشي اشوفة حتى في زميلاتي.
قال لي بصراحة عندك استعداد تتركين الوظيفة . وانا ماراح اقصر معاك .
بصراحة انا ماقلت لاهلي عشان مايقولون يلعب عليها من اولها . بس والله في كلامة كلامة منطقي وواقعي .
الحين وانا بنت وفي بيت اهلي والله العظيم حتى لو امرض او اجوع او احتاج فلوس مااحد يصرف علي ريال واحد من جيبة . ولا قدرت اجمع مبلغ زي الناس او اشتري حتى ارض .الله يسامح اهلي بس. ومالقيت من الوظيفة غير هاتي فلوس وقروض ودين وامراض .
لدرجة لو اتخاصم انا واخواني على شي تافة يحلفون مايودوني المدرسة . وربي هذا اللي صاير معي .
انا محتارة اتمسك بالوظيفة والا فية .
خايفة ومحتارة شوروا علي اذا وافقت وتركتها وش اشرط علية او اذا تمسكت فيها كيف حافظ علية وعلى بيتي وعيالي .