وش الحل🙂

تخيلوا أنا وأختي للحين ما انخطبنا، أنا تعديت الثلاثين وأختي بآخر العشرينات.

قبل أكثر من سنة جونا صديقات أمي، وجلسنا نسولف، وبعدين مدري شلون انفتح موضوع الزواج. وحدة منهم قالت لي: “اي وعقبالكم يا فلانة، انتي وأختك.”

أنا رديت عليها بكل عفوية: “لا الحمد لله، إحنا كذا مرتاحين.” وقلت هالكلام لأني ما أبي أطلع قدام الناس إني متحسرة على الزواج أو إني أبي أتزوج بأي طريقة. طبيعي وحدة تعدت الثلاثين ولسه ما تزوجت تحاول تبين إنها راضية ومتطمنه، مو إنها تبغى الناس تشفق عليها أو تحس إنها تنتظر أي عريس.

المشكلة إن السالفة صار لها أكثر من سنة، وأمي للحين كل شوي ترجع تكرر السالفة وتقول: “هي كانت تلمح تبيك لولدها.”

طيب لو فعلًا كانت ناويه تخطبني، ليش ما صار أي شيء بعدها؟ ليش ما كلمت أمي؟ أو سألت عن الموضوع؟ أو فتحت الموضوع بشكل واضح؟ خصوصًا إنه مر أكثر من سنة وما صار أي تواصل.

وبعدين يا كثر الحريم اللي تزوجوا من رجال تقدموا لهم أكثر من مرة. رجال يخطبون، وينرفضون، ويرجعون يخطبون مرة ثانية، وثالثة، ورابعة. أما هنا، ما صار ولا محاولة، ولا تواصل، ولا حتى فتح للموضوع، مجرد كلمة “وعقبالكم” وانتهى كل شيء.

أنا أشوف إن كلمة “وعقبالكم” يقولها ناس كثير من باب الدعاء أو المجاملة، مو شرط يكون وراها تلميح أو نية خطبة. ولو كانت نيتها فعلًا تخطب ولدها، كان شفنا خطوة بعدها، مو مجرد كلمة وانتهى الموضوع.
عشان كذا أحاول أقنع أمي إن اللي صار كان مجرد مجاملة أو دعوة لطيفة، مو دليل إنها كانت تلمح لولدها.