وش الحل مع الزوج اللي كذا ؟؟؟؟

السلام عليكم
والله تعبت من زوجي يابنات لي ٨ شهور ومتزوجته وكانها ٨ سنين كل شوي سالفه جديده ومشكله جديده او اكتشف عن شي ، بس مشكلتي الازليه معه شخصيته يابنات ضعييييييفه بشكل ماهو طبيعي والله ماهو طبيعي لدرجه افكر ان عنده مرض ، يعني اهله متحكمين فيه ماله راي عندهم ..
ولما نتناقش انا اتكلم اتكلم اتكلم واقول وجهة نظري واسكت !! انتظر رد مافيه بح واقوله ليش ساكت يقول مدري!
غير كذا احسه يخاف مني 😂 والله مايتجرا يقولي لا او يقول ابي اسوي كذا او نسوي كذا ، كله براحتك وبكيفك ، احيانا اتعمد استفزه او اغلط بالكلام ابي ردة فعل ماحصل احسني بنجلط منه غير انه يقلدني بكل شي ويحط من عطوراتي مستحيل يشتري عطر ينتظرني اشتري ويحط معاي متخيلين😂! وابدا مايغار لما نكون فالسياره اكشف وجهي ابي اشوف يقول شي او يتكلم او لما نروح السوق واتكلم مع الكاشير احسه مزهريه واقف مايتكلم !! هذا غير انه يمشي وراسه فالارض مستحيل يرفع راسه ، واحنا الحريم مهما كان الوحده مننا تحب اللي شخصيته قويه ومو شرط يكون يضرب او يقل ادبه بس يكفي انه يحسسها انه سند وتعتمد عليه ، انا احس اني الرجال .. وش الحل مع هالزوج اللي كذا تتوقعون يحتاج طبيب نفسي ؟ وع فكره اهلي راضين فيه يشوفونه عادي لانه ماختلطو فيه كثير وانا فتره ملكتي كانت قصيره عشان كذا ماعرف عنه كثير.