نفس مشكلتك .. بس بنتي اصغر والحمد لله ما عندي دوام
واقول الحمد لله خيره من الله .. علشان لا تاخذ الصناعي ما شاء الله تبارك الله
بس زي ما قالوا لكـ البنات.. مالكـ الا الاكل .. والله يعينكـ يااااااا رب .. ..
الصفحة الأخيرة
حبيبتي أشفطي الحليب و خليه في التلاجة ..
و لمن بنتك تجوع خليهم يدفوه لها و بعدين يرضعوها هو ..
لأنه سبحان الله الحليب ينزل من الصدر دافي عشان كدة لمن يبرد في الرضاعة
ما تستسيغه ولا ترضى ترضعه لكن لو دفي حتقبله ..
بس كدة أفضل من إنك تعطيها حليب صناعي ..
و إنتي براحتك ..
و لا تجوعيها مرة عشان لا تعصب لأنها لو عصبت ما عاد حترضى ترضع
و لا تجرب تمص ولا تقبل أحد غيرك ..
و فيه رضاعات ماركة (ميديلا) هادي مشابهة للحلمة و مصممة بمواصفات الصدر
يعني شكلها و طراوتها و ما تدخل هواء لبطن الطفل و تسوي غازات زي الرضاعات التانية
و كمان ما تصب الحليب بسرعة زي الرضاعات التانية إللي تخلي الطفل يقبل الرضاعة
عشانها تشبعه بسرعة و يرفض الصدر .. و تطلع لها الحليب بنظام الصدر شوية شوية ..
و يقبلوها الأطفال جربي أشتريها تلاقيها في الصيدليات أو في مبنى اليونيسيف ..
هي شوية غالية أظن سعرها 140 ريال أو شي زي كدة بس مرة تريحك ..
حتى شفاطات الصدر من هادي الماركة ممتازة و فيه منها الكهربائية صاحبتي تستعملها
و تمدحها تقول مرة ممتازة و مريحة و عملية و ترضع ولدها بهادي الطريقة تشفط
و تعبي في الرضاعة و ترضعه ماشاء الله تبارك الله لا قوة إلا بالله ..
و تلاقي من نفس الماركة أكياس بلاستيك أو قوارير بلاستيك عشان تعبي فيها
الحليب و تجمديه أو تحطيه في التلاجة ..
و ترى ما دامها متعودة عالطبيعي ممكن ما تكون مسألة جوع قد ما تكون
مسألة ( خرمة ) زي ما يقولو .. فخلي قطعة من ملابسك عند خالتك ..
و خليها تغطيها بيها أو تحطها جنبها و هي نايمة عشان تشم ريحتك و تنام ..
أو تشم ريحتك و ترضى ترضع الحليب إللي في الرضاعة ..
بالنسبة للأكل لازم تتأكدي أول إنه بنتك ما عندها حساسية سواء من الحليب
الصناعي أو القمح أو أي شي تاني لا قدر الله ..
و تبدأيه بالتدريج ما تعطي وجبة كاملة فجأة إذا إنتي ما قد أكلتيها ..
و الفواكه ما تنسلق لأنها تفقد قيمتها الغذائية ..
و أنا أقولك طريقتها ..
جيبي تفاحة أبشريها و بعدين حطيها في الخلاط و أخلطيها ألين تسير
زي المهلبية .. يعني أخلطيها بعصيرها مو تحطي عليها موية ..
و بعدين أكليها منها ملعقتين بالعدد ..
و أستمري كدة بهادي الكمية و بعد 2 - 3 أيام أديها ربع التفاحة ..
و كمان كم يوم على ربع التفاحة و بعدها أديها نصها .. و زي كدة ألين
ما تاكل التفاحة كاملة و هادي وجبة ..
و نفس الشي بالنسبة للفواكه التانية ..
و اللبن الزبادي بنفس الطريقة بس دفيه لا تعطيها هو بارد ..
و الخضار و الفواكه لازم تبدأي لها كل نوع لوحده لا تخلطي عشان لا يسبب لها
حساسية ..
و طبعا تراقبيها و تشوفي إذا ظهرت عليها علامات حساسية من أكل معين
على طول وقفيه و أرجعي للدكتور ..
و غالبا تبدأي بالبازيلا و الكوسة و الجزر و التفاح و الكمثرى ..
و البطاطس آخر شي تعطيه للطفل لأنه لو أكل البطاطس
ما حيرضى ياكل أي نوع خضار تاني :09:
و الخضار تعطيها كل نوع 3 أيام لحاله .. يعني 3 أيام بس بازيلا ..
و بعدين 3 أيام بس كوسة .. و زي كدة ..
و الخضار إللي تسبب الغازات زي الكرنب و القرنبيط و الفاصوليا و البروكولي و غيرها
بلاش منها في هادي الفترة خليها بعد 8 - 10 شهور أفضل عشان أمعائهم
ما تستحملها و تسوي لهم مغص و تلبك ..
و البيض بس تعطي الصفار و قبل السنة ما تعطيهم البياض ..
و الصفار كمان بالتدريج شوية شوية ألين ما تعطيها الصفار كامل ..
لأنه البيض من الأشياء إللي تسوي الحساسية فلازم تنتبهي منه ..
و الرز و المكرونة بس تحطيها مع شي زي خضار مثلا أو شوربة مو لحالها ..
و بعدين شوية شوية تبدأي تخلطي الخضار و تسوي لها زي شوربة المسلوقة
بالخضار و اللحم أو الدجاج و تخلطيه بالخلاط و تأكليها هو زي أكل الأطفال الجاهز ..
و طبعا عندك الميلوبا بالرز و القمح و السيريلاك بالرز و القمح و أنواع كتيرة
و البسكويتات ..
و عندك النعناع و اليانسون و شاي ميلوبا كلها سوائل مفيدة يقدرو يعطوها هي
طول ما إنتي مانتي فيه و تهديها ..
و الأفضل إنك تاخدي مشورة دكتور بالنسبة للأكل عشان يفحص بنتك و يتأكد
من إنه ما عندها حساسية و يعلمك كيف تطبخي لها و تقسمي الوجبات ..
و الله يوفقك :)
ما شاء الله تبارك الله لا قوة إلا بالله ..
يا رب تكوني أستفدتي و لو شوية و دعواتك يا قمر :)
تحياتي ..
جــــداويــــــــة