وش الحل مع زوجة اخوي/ قديم

الله يخليكم لي بنات ودي افضفض لكم وادري انكم ما تقصرون

وش الحل مع مرت اخوي بذكر ايجابيتها اول ما تزوجت كانت من اعز صديقاتي لدرجة انو بيننا اسرار وانا طيبه معها لدرجة انها دايم تشتكي من اخوي واوقف معها .... اتزوجت وهي الي كانت خاطبتني ومادحتني لواحد يقرب لها من بعيد بعيد مره ومره ...ومره بنتي ترقد بالمستشفى كانت تتصل علي وجت زارتني هي الوحيده من حريم اخواني الي زارتني غير كذا قالت لي ان بنتك فيها عين وراحت مسحت بيت حمولتي وانا ماطلبت منها هالشي وجابت لي المويه من غير ما يدري احد وفعلا بس روشت البنت فيه الحمد الله تعافت

المهم كنا دايم انا وياها سهرات وسوالف بدت تتغير على شوي شوي بدت تمون بالكلام وتقول كلام المفروض ما ينقال لاخت زوجها يعني بدت تنتقدني وكانها ملاك منزل من السما احيانا ارد وغالبا ما ارد لاني من النوع الي ما انتبه انها غلطت علي الابعدين بعد ما يفوت الوقت عجزت اعالج ها الصفه الي فيني مدري فيه احد مثلي ولا لا

المهم انا قلت ابي اخفف علاقتي فيها من باب( ابعد عن الشر وغني له وابي اريح راسي من القيل والقال) ولا اجلس معها ابد لحالنا يعني ما اجلس الا واهلي كلهم موجودين ولا اتكلم كثير معها رسميه بقوه لاكن مع ذالك ما فيه فايده ما افتك من كلامها الجارح غير هذا صارت تكبر الامور وهي صغيره وغير انها دايم تسب في اخوي مع انه مدلعها كنت اوقف معها قبال ما اتزوج لاني ما اعرف الرجال ولا الزواج بس يوم اتزوجت عرفت انها ملعه بس هي كفارة عشير صرت اذا اشتكت ما اعطيها وجه


مثل موقف... انا اعاني من امي في البيت ابي ازين البيت وكل ما اصلح شي في البيت امي تخربه لان امي نظيفه مره ولا تبي كثرة التحف والخرابيط... قلت لها هالكلام مجرد كلام عابر مو شكوى (وهي ساكنه فوق امي بدور معزول تمامأ عننا )قالت حتى انا مره حطيت فرشه عند الباب الحوش (والحوش مشترك بيننا )واخذتها خالتي لها وحطتها لحمامها وانا شاريتها باربعين ريال!!!!!!
انصدمت وسكت لاني ما انتبه الابعدين

الموقف الثاني عيالها داااااااااااااااايم عند امي وواحد الله يعافيه ولا يبتلينا نجس مره امبهذل بامي ولا يحترمها الله يصلحه وامي ما تقصر تضربه اذا اذاها لانه حتى الضرب يمد ايدينه علينا ومتحملينه ودايم امي تشتكي لاخوي منه لاكن ما يسوي له شي وامه فوق جا اخوي وقال لامي لاكن باسلوب لبق لاتضربينه ولا صارت تضربه ...الزبده اني انا يسافر زوجي واضطر انام عند امي كثير ويسمعون صوت بنتي تصيح بالليل وهي صغيره سنه عمرها وهو اول واحد انزلت لامي مره وانا مو موجوده قالت لها انو نسمعه بالبل يصيح امه ما تعرفله !!!!!! يوم قالت لي امي انقهرت صراحه يعني ولدها ما شالله الي مؤدب وولدها عمره 5 سنوات


والموقف الثالث وهو صاير قريب انو بنتي تعبانه في شي بسيط وابوها مطنش ما المهم اني انتظرته كثير عشان يوديها لاكن ما فيه فايده المهم اني استسلمت ووديتها انا لمستشفى حكومي وكم مره تسب في المستشفى قدامي وتقول انه سيئ بس قبل يوم كنت اعالج فيه كان زين بس خرب عقب و انا فعلا اشوف انه سيئ بس غصب عني اعالج فيه وهي قبل ما تتزوج كانت تعالج فيه واهلها بعد يعالجون فيه الى الان بس هي بعد ما تزوجت صارت ما تعالج الا بمستشفيات اهليه ومره وانا جالسه انا امي شافت بنتي كيف تتألم قالت ليش ما تودونها لمستشفى اهلي كل هذا عشان همكم الفلوس عطوني انا اوديها للزامل وهي ما هي جاده توديها بس كذا تقول (مع العلم انها بخيله مره مره مره لدرجة انها ما اهدت لي لزواجي ولا ولادتي حتى امي ما تهديها وتتعلث بأخوي تقول هو الي رافض اهدي لكم بس بحياتها العامه بخيله مره الا مع نفسها )
المهم كالعاده ما انتبهت الابعد ما خلص الموقف يعني هي طول عمرها تعالج عند نفس المستشفى يوم اخذت اخوي صارت تعالج عند اهليه


بصراحه صرت اكرهها وودي انتقم منها احسها بس تنتقد وشايفه نفسها ملاك


هل هي فعلا غلطانه ولا انا حساسه واذا هي غلطانه ولو لي وشورو علي بنات وش اسوي معها وكيف اتصرف معها لاتقولون ردي بوقتها لاني احاول اعالج نفسي كثير من هاناحيه انا ماني نبيهه مدري هو مرض او وش السالفه ولاني ضعيفه انا قويه الحمد الله انا من النوع الي احذ الحليم اذا غضب وماني بحاجتها الحمد الله ماني بحاجه اني ارجع علاقتي معها بس ودي افتك من كلامها الجارح وخصوصا انو اخوي من انوع لي يا ويل احد يتعرض لمرتي وانا ما ودي اخسره وتعرفون الرجال دايم يشوفون حريمهم هم الصح مهماكانت ظالمه

وخصوصا انو رمضان على الابواب وانا ما ودي يدخل وانا احل في صدري مشاعر سلبيه شورو علي وش سوي

واكرر هل انا حساسه ولا هي هي غلطانه لاني اشوف حمولتي لو اقولهم مثل هالكلام كان اكلوني بقشوري