وش العمل....!!

السلام عليكم ورحمة الله وبركاته

عساكم إن شاء الله بأزين حال..


بنات انا عندي مشكلة ابيكم تشاركوني ارائكم كيف احلها لأنها مشكلة عاديه بس مشكلتي مااعرف اتكلم في المواضيع الحساسه...ودايم ابين اني انسانه قويه عند اهلي واخاف اتكلم معهم بذا الموضوع وابكي<<لاني ابكي على كل شي ويفكرون حاجه ثانيه فسمعوني صح

وياليت اللي عندها حل تدليني علية وجزاكم الله خير

المشكلة :
انها بنت عمري 21 اخر سنه بالجامعه وإن شاء الله بتخرج على السمستر الجاي والحمد لله عايشه مرتاحه وماني شايلة هم حاجة
ولا عندي مشكلة إلى الآن وحياتي ماشية طبيعيه
بس من تالي طلع في مشكلة عندي وهي اني انخطب دائماً من اني بثالث ثانوي بعد زواج اختي الكبيره وانا دايم انخطب كثير والحمد لله ودايم اللي يخطبوني ناس ماشاء الله عليهم وظايفهم مره حلووه ومؤهلهم ومستواهم المعيشي ممتاز
ولكن امي دائماً ترد الخطاب بدون سبب واذا لمحت لها ليه تقولي ذولا مهوب من مستوانا وانتي توك على العرس والشقا

المشكلة يابنات انا ماهمني العرس في الوقت الحالي كثر ماهمني حاجات اساسيه بالموضوع..
أن امي معتبره نفسها عيلة اهلها افضل من عيلة ابوي<<ودايم تمدح بعيلتها وتذم بعيلة ابوي<<لاتستغربون امي من النوع اللي ماخذه مقلب بنفسهم كثيررررررر
وكل ماانخطب تقول ذولا مهوب من مستوانا مع انهم من نفس المستوى

الحاجة الثانيه::اذا جت ترد الخطاب ماتقول ماحصل نصيب تقول بنتي ماتبي تتزوج رغم انها ماتشاورني في الموضوع

الحاجة الثالثه: ماتشاور احد على طول ترد اي احد يخطبني يعني تشووفون ام الولد تكلمها وتقعد تطفشها نتم من وين من وين عيلتك ومن وين بناتك ماخذين وكأنها تحتقرهم بأسلوبها بعدين تقول لا لا بنتي ماتبي تعرس الحين..

رابعاً: لمحت لها مره وقلت لها صديقاتي اكثرهم تزوجو وانا ماعدت صغيره اختي اللي اصغر مني صارت تتخطب الحين والمح لها أن البنت متى ماجاها انسان طيب ومحترم ومتدين ووظيفته زينه تتزوج تقولي انتي ماتنخطبين شي زين مدري وشلون حظك كل اللي يجونك مهوب حمايل زينه وتتمنى اني اتزوج اعيال عيلتها مع ان عيلتها ماعمرهم اخطبو مننا وانا مااحبهم لانهم متحررين زياده عن اللزوم

خامساً: من تالي اذا انخطبت ماصارت تقولي عشان مااقولها انا موافقه وتبلش فيني وصارت دايركت ترفض علي

وبس علموني شلون اتكلم مع امي..وخصوصاً انها تطنز على اي بنت طولت بيت اهلها ماتزوجت يعني مدري كيف اقولكم

:16:
انا معكم انها امي وتبي مصلحتي لكن امي ماتنظر إلى الولد واخلاقه كثر ماتنظر لإى الولد هذا وش عيلته ومن اهله
لدرجة مره وحده من قرايبنا خاطبها واحد والله مؤهلة متوسط وشغلته مسكين على قد حاله تدرون وش كانت تقول ماتستاهله فلانه ليته خاطب وحده من بناتي بس لانه ولد الفلان تخيلو
ولا بعد زوجت اختي غصب عنهاااااااا لأنها مهوب مقتنعه مره في الولد بس خالي لأنه هذا صديقه مدح فيه واجبرها وبالموت بعد ثلاث مرات اقتنعت

بنات تعبت نفسياً ماابي امي تصير سبب تأخري عن الزواج الناس ماراح تحط العيب فيها بتحط العيب فيني انا اني ماابي اتزوج

وشلون اتفاهم مع امي تكفون فهموني

انتظركم