وش تفسير هالتصرفات برايكم؟

السلام عليكم مساء الخيرات 🌸
يابنات صاير شي ابي اخذ مشورتكم ورأيكم فيه يمكن في احد منكم قد صار له كذا مع عيالكم وتفيدوني
الموضوع ومافيه ان بنتي دايم تسولف لي لمن ترجع من المدرسه عن معلمه عندهم تصرفاتها معها غريبه
اول مره جت عندي قالت لي ماما فيه معلمه اول مره تدرسنا قالت لنا نقولها اسماءنا عشان تتعرف علينا وقلنا لها بعدين وصلت عندي وقلت لها اسمي قالت انتِ قد درستك قبل كذا صح؟ قالت بنتي لا اول مره تقول ماصدقتني قلت لها عادي يابنتي هي تدرس دفعات اكيد مشبهه او ملخبطه او تشابه اسماء اقتنعت بنتي بالبدايه مع انها الله يصلحها فضوليه وتحب تفهم وتستكشف ماعلينا،
تكرر نفس الشي كانت تجي من المدرسه تقولي ماما المعلمه الي سولفت لك عنها غريبه اقولها ليه غريبه وش سوت تقول تناظرني لمن نكون برا بس وقت الحصص ماتطالعني وحتى يوم تشرح تطالع البنات كلهم الا انا ويوم تسأل سؤال محد يعرف يجاوب وانا اجاوب عليه ماتطالع فيني بس تسمع صوتي وتقول اذا شافتني لوحدي تطالع فيني بس اذا كنت مع صديقاتي وطالعت بالمعلمه تقول تسوي نفسها ماتشوفني
نصحتها بانه لا تدققين بتصرفاتها وووالخ وحاولت انسيها وازيل الشك من راسها بس كل مره ترجع تسولف لي عن موقف غريب
يقولكم موقف زياده مره قالت لي هذه المعلمه ما تمدح احد ودايم تنتقد ولا يعجبها اي شي نسويه واجب او عمل او اي شي تطلع أخطاء وملاحظات وتطلب نعدل بس مره جتني بنتي مبسوطه تقول مدحتني قدام البنات كلهم حتى البنات انصدموا
ولمن جت بنت تتناقش معها عن شي تقول سمعتها تقول لا شوفي فلانه سوت كذا وكذا وتمدحني حتى مره شافتنا انا وصديقتي طلعت من  الغرفه حقتها سلمت علينا ورجعت دخلت 😀!
واغرب موقف قالته لي انه طلبت منهم يحلوا ع السبوره فرفعت بنتي يدها تقول طالعت فيني المعلمه وانا اطالع فيها ابيها تأذن لي اقوم جلست بس تطالع ف عيوني ماشالتها بعدين قامت بنت بدون استئذان تحل تقول انا شفتها قامت نزلت يدي خلاص بعدين قالت المعلمه انتِ بعدها لاني شفتك رفعتي يدك وتقول كانت تضحك؟؟

قلت لبنتي خلاص اذا مدحتك عشان تشجع البنات وتشجعك بس لا أكثر ولا أقل لا عاد اشوفك تدققين ف حركاتها او كلامها وتجاهليها مافيها شي وادرسي انتِ ولا عليك من احد وجلست افهمها بس بنتي مصره ان المعلمه غريبه معها اسألها قالت لك شي تقولي لا انا الاحظ حركاتها وتصرفاتها غريبه مو زي باقي المعلمات
قولوا لي وش رايكم بالله ف احد قد حصل معه زي كذا؟ ولا بنتي تبالغ؟ووش تفسيركم لهذه التصرفات؟ ووش تنصحوني اسوي؟