وش رأيكم في شخصية هالزوج اللي حيرت علماء النفس

السلام عليكم ورحمة الله وبركاته


زوج اختي هذا شخصيته غريبه اول ما تزوجوا قال لها في الخطبه ابيك تلبسين قفازات وعبايه على الراس وشرابات وترا ما احب النقاب ابي تتغطين قالت له ابشر طال عمرك طبعا اخذت فكره عنه انه انسان محافظ ومتدين وكبر بعينها وزياده سالنا عنه في المسجد وقالوا ما يترك ولا فرض واحنا فرحنا فيه
تفاجات لما تزوجته وسافروا للمدينة اللي يشتغل فيها انه ما يصلي وزياده على كذا يشرب بيره فيها كحول قالت له كيف تشرب كحول حرام قال لا هذا نسبته قليله قالت له ما كثيره حرام قليله حرام قال لها لا تصيرين نكديه ترانا بشهر العسل

صبرت وصارت تدعي ربها كل يوم ان الله يهديه لانه كان يموت فيها وهي تحبه وكانت بزر وما قالت لابوي انه ما يصلي


المهم تعرف على جماعه في الحاره كانوا ملتزمين وصار ملتزم قصر ثوبه وربى لحيته وصار يصلي كل الفروض حتى الفجر بالمسجد وهي انبسطت وزانت نفسيتها وحملت وجابت الولد وحياتهم كانت مستقره ومبسوطين

بعد فتره جا داخل عليها ومعه البنقالي بيركب دش وصار يشوف الافلام والمسلسلات شوي شوي صار يجيب افلام خلاعيه ويتفرج بمجلات اباحيه قالت له ليش تسوي كذا هذا وانت ملتزم صار ما يقعد في البيت ويقول انتي نكديه

بعد فتره عرفت انه متعرف على واحد من جنسيه عربيه ويروح عنده ويشوف هالافلام وهالخرابيط وشوي شوي شال اللحيه وتغييييييييييير 180 درجه حتى الصلاة معاد يصلي لا في البيت ولا المسجد

هي حاولت معه بس كان ما يبي احد يحاكيه يبي يسوي اللي يبيه راحت اختي وشكته لابوي وقالت ما يصلي ويوم درى انها شاكيه لابوي طلقها بس كانت حامل وقعدت عند اهلي شهر ورجعها ووعدها انه يتغير
ورجعت حياتهم استقرت

بعد فتره طاح بالسفر مع هالعربي ماخلى بلد ما راح له وطبعا يسفر العربي معه على حسابه
ورجع لشرب البيره واكتشفت انه يروح مراقص في اسفاره ويغازل بنات

هي فقدت الامل فيه صارت تهتم ببيتها وعيالها وقال لها ابوي خليه يسوي اللي يبيه واذا طاح اللي في راسه بيرجع لك

وفعلا بعد فتره تحسف وبطل تصرفاته ورجع يصلي مع الجماعه وترك صديق السوء العربي
وصار اي مكان يسافر ياخذها معه هي والعيال

يوم جابت ولدها الثالث انتقل من شغله وتعرف على شله هناك ورجعت ريما لعادتها القديمه تطنيش للصلاة واسفار وشرب وزياده على كذا اكتشفت انه متعرف على وحده بالخارج

بعدها طلبت الطلاق وطلقها بعد فتره رجعها وقال لها انا ندمان اني طلقتك وانا احبك ومستحيل اعش بدونك واللي تبينه يصير

الحين هي رجعت بس تقول خلاااااااااااص ما تثق فيه ما تدري متى ينقلب عليها وصارت تجيها تخيلات ووسواس حتى تقول بالليل احلم انه مع وحده او انه مخبي علي شي
وصارت تشك انه رايح للمسجد يصلي وكل ما جا تشمه تشوف هو شارب والا لا

يعني حياتها صارت قلق في قلق

وش الحل ؟