الله ينصر دينك ايه والله اخوي وقفوا شوي نفس تفكيري..

والله مااحد ينبسط الا المعازيم..

قهوه وشاهي وحلى ورقص طول الليل والعروس واهلها والله مختبين مساكين..

يخافون شي ينقص ومايدرون متى تجي الكوافيره ومتى تجي المصوره..

ومتى الزفه..وتطلع البنت مع زوجها والله كأنها مخطوفه من أهلها..لاتهنت معاهم ولاشافتهم..

وفي النهايه مايسلمون من كلام الناس ان اقتصدوا قالوا وش ذا العرس ماحطوا شي..

وان تكلفوا..قالوا والله مايدرون وين يحطون الفلوس..ياربي لاتعاقبنا..

ومشكلتنا انه بعضنا الى الان فيهم عقدة النقص وتناظر بنت عمها وبنت خالها..الى متى؟؟!!!

الثقه والقناعه مزروعه بالنفس ومااحد يقدر يزعزعها..واهم شي نفسي مو الناس..

اهم شي وناستي..اتزين لزوجي مو للناس..وش ابستفيد منهم غير القيل والقال والعين والحسد

الله يوفق الجميع ويهدي نسائنا..الامهات قبل البنات لأن مشكلتنا الامهات..

شكرا لك أختي..

نفس الرأي بالضبط

حبيت اضيف شي :

العروس يمكن تاخذ ذنوب اذا لزمت على حفلة زواج كبيره

بتقولون كيف ؟

أولا : النعمه اللي بتفيض وين بتروح ؟ بالزباله ؟؟؟؟ إما ذبايح وصحون رز ماتنلمس بالذات عند النساء ، والا فواكه والا بوفيه مفتوح ومن كثر النعمه يعملون حساب الناس والناس ماتعمل حساب النعمه ثم تكب الله لايعاقبنا

ثانيا : بعض العوائل اللي بتحضر الزواج على قد حالها يمكن الأب مايقدر على مصاريف فساتين جديده لزوجته وبناته غير الكوافيره وباقي المستلزمات وصعب انهم يروحون كل مره بنفس الفستان بالذات البنات كل مره يبون فساتين جديده وموديل على الموضه ، وتلقين الابو يدعي عليهم الله لايبارك بهم وبعرسهم اللي مخسرني هالخساير انا على قد حالي والراتب يالله يكفي ناقص اخذ دين والا سلف

ثالثا : بعض الزواجات فيها معازف وآلات موسيقيه ، خوذي ذنوب وش كبرها ، الفلوس اللي دفعت للفرقه محاسبه عليها ، الناس اللي حاضرين الزواج ويسمعون كلهم أخذتي ذنبهم

رابعا : النساء اللي يلبسون عاري ، كله عشان زواجك يالعروس ، أخذتي ذنبهم بعد لأنك عطيتيهم فرصه يستعرضون اجسامهم في حفلتك

خامسا : النساء اللي بيروحون الكوافيره ويتجملون علشان الحفله بيحفون ويشيلون الحواجب عشان هالزواج ، ذكرتيهم بهالشيء ولاتقولين وش دخلني ، هم يتجملون لحفلتك

سادسا : الإنسان محاسب على ماله من أين كسبه وفيم أنفقه ، وين انفقتي المال وكم انفقتي ، هل له داعي كل هالفخفخه ؟ كم صرفتي في الحفل ؟ خلينا نقول 50 ألف مثلا ، لو قلت لك طلعيها صدقه كان قلتي كثيرررر خمسين ألف صدقه

أشياء كثيره لو تفكرنا فيها بنلقى فعلا ان العروس ماهي مستفيده من هالشيء أبدا بالعكس يمكن تكون هي الخاسره

السلام عليكم

اعتقد ان الأخت السائله وضحت واكدت في سؤالها ان الزوج يكون مقتدر ماديا ... يعني حفله الزواج بتكاليفها تكون في حدود طاقته ومقدرته بدون تكلف .

في هذي الحاله مافيها شي لو طلبت حفله في صاله ضمن حدود امكانياته مدام هو مقتدر والله منعم عليه ... ليش نشح على نفسنا والله فاتحها عليه .. والمسأله مو تباهي ولا تفاخر ولا شي ... لكن الله سبحانه اذا انعم على عبد يحب يشوف اثار نعمته عليه .. وهذا شي طبيعي في عرف الناس , كل واحد يلبس ملبوسه ويركب مركوبه . انا طبعا هنا ما اتكلم عن البذخ والاسراف اللي نشوفه في بعض الحفلات , لان هذي من اسوأ العادات اللي وقع فيها بعض المجتمعات , لكن اتكلم عن حفله راقيه ومحترمه ومرتبه تشرفك قدام معارفك وكل من يعز عليك .
هذي اذا الزوج مقتدر مافيها شي , وهي ليله وحده في عمرها وعمره كله , وكل بنت تحلم ان ليله عمرها تكون من احسن مايكون .
بصراحه ماني فاهمه ليش يكون الزوج مقتدر ماديا ومايحقق لها هذي الامنيه العاديه لأي بنت .

الا اذا كان عنده ظروف او سبب معين يستدعيه لهذا الشي .. ممكن اقتنع لكن طبعا لازم تعويض :27:

اما لو كان الزوج راح يتكلف فوق طاقته فلا يكلف الله نفسا الا وسعها .. ومافيها شي لو اقتصر الزواج على مقدار استطاعته .. حفل صغير او عائلي فيه البركه افضل من حفل كبير مايجيب لاصحابه الا الديون والتعب .

وعلى فكره انا اتكلم هذا الكلام من ناحيه الفكره , اما عني انا شخصيا .. بصراحه .. ماحب العروس ولا الحفلات , وما احب اروح الا للواااااجب والشديد القوي .