ما اظن ان هالطريقة راح تأدبه ولا تمنعه لأن الواحد اذا يبي شي بيسويه بيسويه ماخاف من ربه تعتقدون بيخاف من الهيئه ؟؟
انا اشوف انك تواجهينه لأن مو حلوه ابو عيالك وزوجك يكون عنده سوابق في الهيئة !!
الشئ راجعلك انتي بالنهاية بس ما اظن الهيئة خيار حلو..

اذا تبي تتطلق صديقتك وعايفة حياتها خليها تبلغ

وش اللي تبلغ الله يهديكم وانتم تحطون الزيت على النار ؟؟

مايصير الكلام هذا ؟ولو تبي تفضح زوجها عند الناس فمعناته فضحت نفسها وفضحت بيتها

كل شي ينحل بالهدوء خليها تتناقش معه لو مانفع يصير تفكرفي حل بديل

من ستر على مسلم ستره الله في الدنيا والاخره

طيب ليش تسمينه هجوم حنا نتكلم بالمنطق والعقل..مانتهجم عليها وصدقيني حاسين فيها واحنا حريم ونعرف غيرة الحرمة وين توصل..بس مهما كان الله عطانا عقل ...تطفون النار بالنار هذا الحل.. برايكم...؟؟يعني تشوفين تصرفها صح.؟؟ اذا هي ماناقشة زوجها ولافكرة تتفاهم وياه وهو مايدري ان زوجته انها مجرد تشك فيه على طول .......... والله على الرغم من كرهي للرجال بس ما اتصرف بهالتصرف ابد...وماهي لوحدها بالعايلة يوم انها تفكر هالتفكير بكر حتى رجال ازواجها بيكشون من خواتها والله خليها تخاف على خواتها اذا ماهمتها نفسها نبهيها,,

حبيبتي خليها تتعوذ من الشيطان وتستهدي بالله ولاتتهور هذا زوجها مو عدوها... وكم صار لها مكتشفه الموضوع وكم صارلها متزوجة صديقتك... من اول مشكلة بتروح تفضح فيه... ثلاث ارباع الرجال يخونون ولو حل صديقتك هذا يجيب نتيجة لا بالله ماصار احد متزوج و الطلاق على فلس بيكون...
لاتتهوروانتي حاولي تهدينها خليها تتفاهم معاه و بشويش ... وش تقولين عني انا ... والحمدالله انحلت مشكلتي ... وشبيهه بمشكلة صديقتك... خليها تخاف على نفسها وعيالها ترى هي ماراح تفضح شخص واحد بتفضح ثلاث عوايل حرام والله وصدقيني هي انا ما الومها ... بس مو بهالسرعة وعلى طول هيئة ... من ستر على مؤمن ستر الله عليه يوم القيامة لاتفكر بنفسها وبس بدمر وراها ناس كثار بتصرفها اولهم سمعت عيالها اذا عندها عيال... لاتتهور عن تجربة اقولها لك.. صدقيني ..ترى مو سهل اللي بتسويه... ولاتقولين لي ماراح يدري انها هي... لا والله نبهيها نبهيها مليون الف مرة... لاتتهور ..وكل شي بالتفاهم ينحل.. وخليها واضحة معاه مادامها على حق اما انها بهذي الطريقة تتصرف بتندم والله... انصحيها حبيبتي ...انا اتكلم من واقع تجربة...وصدقيني انا من قبل فكرة تفكيرها لكني تعوذت من الشيطان وكلمت ابوي لأنه انسان فاهم الحياة وعارف نوعية الرجال وقلت له : يبه؟ قال : نعم بابا.. قلت: يبه بفضحه عند اهله؟؟ تدرين وش كانت ردت فعل ابوي مع اني بنته والرجال غريب والله شوي ويضربني صرخ بوجهي وامي نفس الشي عصبت علي قالت : انتي بتفضحينا يعني بتحلين المشكلة والا بتعقدينها اكثر... انهبلتي .. ماتبينه تطلقي منه مانتي لوحدك بالعايلة وراك خوات متزوجات , وراك اخوان اما انك تفضحين بالعالم انسي... وشيلي الافكار الهمجية هذي من راسك ... انتي بنتنا وعلى عينا وراسنا ماربيناك على تصرفات همجية حطي عقلك براسك وانتبهي تسوينها هذا وانتي دارسة وفاهمة ومثقفة هذا اللي تعلمتيه... صدقيني وعقبها الحمدالله بعقل ابوي ورزانته وحكمة امي انحلت المشكلة وهذا هو الحين مايناظر غيري... هذا جزء من القصة .. صدقيني من تجربة.. اتكلم معاك نبهيها لاتتهور...الله يهديه لها..امين يارب العالمين...وبعدين خليها تتأكد وحدة ثنتين عشر يكلم زوجها يمكن هذي وحدة من عشر اللي يكلمهن وتلقينها هذي اللي ردت عليها اول مرة تكلمه لاتتهور حرام عليها والله خليها تعالج المشكلة مع زوجها وتبعد عن بنات الناس وصدقيني البنت لو ماشايفة وجه من الزوج مادورت وراه بس ارجع واقولك خليها تتقرب لزوجها مو تلهى عنه وتشغل نفسها ومخها شلون تنتقم منه والعياذ بالله.. تشوف وش قصة هالبنت اول ومن متى معاه؟؟ وووووو؟؟ وتاخذه باللين مو كل شي صراخ... وفضايح.. خليها تتفاهم معاه وتشوف وش عنده... والله يهديه لها..وصدقيني المشكلة سهلة ولا اسهل من حلها..والله لو الحلول بهذي الطريقة كان كل بنات حواء مطلقات وحالتهم حالة..بسم الله علينا .. الله يهديها ويهدي اللي شجعها وصدقيني اللي شجعوها حتى لو خواتها مع احترامي بيجربون فيها بس لا اكثر ولا اقل..ويبون يصير زوجها فرجة وشهرة وعبرة لأزواجهم حرام والله وهي اللي بتضيع وبتندم لاتقولين لي ماراح تندم بتندم واخذيها مني هي الحين ماحاسة بشي مابراسها الا انها تنتقم وبس وعقب تطلع الاشياء..مافكرت بامه بابوه والله دعوة الوالدين مستجابة حرام.. عيالها . لاتتهور..يعني هي ظنها ماراح يدري انها مبلغة عنه والله مومهم بس اول من يدري امها وابوها وعقب راح يطلقونها منه بالقوة ليش؟ عشان السمعة وهي ماتقدر تتكلم انها هي اللي مبلغة والله بتصير الدعوة كلها مشربكة خليها تنظر لها من عدة جوانب مو بتسوي وبس... وانتي الله يهديك على اي اساس تشجعينها انتي وخواتها مخلين حياتها وحياة زوجها محط تجربة وعبرة لأزواجكم اتقوا الله في بيت البنت وبدل ماتحافظ عليه تبونها تهدمه وتشتت شمله... حرام والله...صدقيني ماراح ينضر الا هي وعيالها بيتشتتون..والله اني اتطلق ولا اتصرف هذا التصرف اصلاً شلون بعيش معه حتى لو ماعرف.. وش نظرة اللي حولي لي...وصدقيني تشجيعهم لها مؤقت اللي شجعوها عقب اصابع الاتهام راح تتوجه لها...

غريبة صراحة صديقتك اذا هي متعلمة ودارسة ومثقفة وكذا تفكيرها... واذا هذي اول مشكلة وماقدرت عليها وش بتسوي باقي حياتها ... خليها تنتبه صدقيني مو زين .. لها.. وهو مية حل وحل بيمشي معاه الحين هي ماناقشته ولاجربت اي حلول معاه على طول فضيحة ..حرام كذا...والله حتى مايدري عنها انها كشفته خليها تتقرب منه اكثر عشان يصير كتاب مفتوح قدامها...وصدقيني الرجل طفل كبير والحرمة هي اللي تكونه ...مثل العجين ...وصدقيني ترى الحرمة دايم بلحظة الغضب على طول تفكر بالانتقام... وتالي عقب ماتسوي اللي براسها تقعد تعض اصابع الندم.. وبتعيش بعذاب نفسي ماينتهي ابد معروووووووفة دراسة هذي والله مسوينها.........خليها تكون واضحه نصيحة وتبين له انها اكتشفت وبس لاتغدر فيه وتتصرف تصرف لاتحمد عقباه.. يمكن الرجال غافل تنبهه وتحسسه...تعوذوا من الشيطان.وخليها حول زوجها وتقوله انها درت وبس.. ومن كلامك اذا هو يخاف من كلام الناس بالعكس هذا معناته شخصية مرنة ويمشي بالتفاهم..اخذيها مني اذا يخاف من كلام الناس بيلين معها وبيفهم وبيقتنع من كلامها..وبيحس فيها..