وصــــفه حــــلت لنا مشكله كبيره بالشعر < الله يجزاها خير راعيتها

السلام عليكم ورحمة الله وبركاتو






شلونكم يالربايع لا شان لونكم ..؟..





ان شاء الله افيدكم يالربع .. وتستفيدوون مني .. وتدعون لي عقب هالوصفه ولا تدعون علي ..






ولله ماني مصدقه اللي صار لختي << اطالعها وأسعبل من الصدمه .؟.





صااار شعرها تبارك الرحمن





ولا اقول لكم خلوني ابدى لكم من طق طق لين السلام علاكم .؟.



هذا الله يسلمكم .. عندي اخت عمرها 7 سنوات .. المهم قبل لا تدخل الروضه أي قبل سنتين يوم كان عمرها 5 سنوات



قامت تصيح وتبكي مابي اروح مابي ادخل الروضه



لا سألناها ليش



تقول شعري يضحك << المسكينه معقدينها ام شوشه



طبعا بنت صغيره وبسرعه تنجرح وماتبي تروح الروضه عشان مايضحكون عليها الورعان ويقول لها ام شوشه



الصراحه عجزنا فيها ... مافاد فيها لا استشوار وغيره مهما نسوي الشوشه شوشه وفوق هذا شعرها قصير حييل .. يعني مالك امل تلمينه بشباصه



لازم تخلصين علبة الشباصات على شعرها عشان يصير مرتب .. << يصير كرنفال بشعرها من كثر الشباصات ..؟..




المراد ماطولها



تعبتني معاها حيل رحت جبت لها من الخلطات الكثار هم مافاد صار شعرها ينشف اكثر واكثر ..؟.. لدرجه زيت الخروع ما يشبعه ويزيته



وتعرفون شعرت اختي السميكه الخشنه . يعني الله يعين



المهم .. وقبل كم سنه كنت قاريه موضوع لوحده اسمها (kathreen )




المهم



كانت تقول عن خلطه لبنات خالها .. عجيبه .. وتشكي معانتها لين عرفت الخلطه .. انا اللي شجعني اسوي هالخلطه لختى انها تقول بنت خالتها بالروضه تحط منها .. يعني تصلح للاطفال




ما طولها



شفت الخلطه وحفظتها عندي << والصراحه قلت صعـــــبه وين احصل اغراضها اصلن في شغلات ماعرفها ..؟.. فيها



مرت السنه ونسيت الخلطه واختي على حالها دوم تبكي وتدعي يارب تصير قرعه < اللهم لاتجعلها اكبر همنا



المراد وذاك اليوم رحت مع امي عند عطار (امي تعرفه ومتعامله معه بسنوات )


كانت تبي تاخذ منه دويات حق اختي نفاس





ماطولها



وانا تعرفون الله يخليني ملقوفه قمت احوس بالزيوت اللي عندي .. ولا يطيح بيدي زيت من الزيوت الخلطه اللي ماعرفه وانصدمت انه متوفر توقعت مالقااه



المراد سألت على كم قال بالسعر لفلاني



طرت على بالي الخلطه .. كان ارفع التليفون واتصل على اختي خزونه قلت افتحي الجهاز وروحي للمستندات .. تلقين صفحة نت محفوظه فيها خلطه ارسلي لي كل مكوناتها


لاني عند الحواج


قالت : اوكيك




دقايق الا ادوات الخلطه وصلت لي مسج ..




طبعا قمت اقولها للعطار وهو يجيب يقول موجود موجود وانا مستانسه .. ماتوقعت اني ألقاها



سبحان الله لاكان طاري علي اسوي هالخلطه ولا اصلن كان عندي مقاديرها سبحان اللي خلاني اروح مع امي وأتعبث ..




المهم خذيت الاغراض ورحت البيت ..؟..




فتحت اللاب توب .. واخذت الطريقه وسويتها هالكلام طبعا على 2006 يعني قبل سنتين ..؟..



المراد وقمت أحطها لأختي .. واستخدم معاه شامبو طبي راح اذكره لكم وحمام زيت



ولله يابنات شعر اختي طال حيييل اللحين واصل اخر ظهرها .. والمطبات اللي بشعرها خفت حيل .. و****لله تختفي مره وحده بعد .. وشوشتها طاحت قبل بس ناقزه


بس الكذب خيبه ماصار ناعم حرير .. بس صار سهل ان الواحد يمشطه قبل ايدي تنكسر وانا امشط شعرها ..؟..



المهم طولتها عليكم نجي للخلطه .. ترى اغراضها واجد بس الحق ينقال مضمونه





اولا : خلطه الزيوت ..




& المقادير &




زيت الخروع + زيت السنبله + زيت اللوز الحلو + زيت زيتون + زيت جوز الهند (ينفع براشوت الازرق ) + زيت الكثيره + زيت الشمطري + زيت الجرجير + زيت الصبار +زيت حبة البركه (الحبه السودا ) + زيت أملا دابر الهندي الاصلي مو التقليد الاخضر + زيت الحنان + زيت الاحلام + بودرة الشمطري (مو الزيت البودره ) + الكثيره تجي صلبه ولونها ابيض على شفاف + عشبة ساق الحمام > هذي كانت كاتبه زيت ساق الحمام بس دورت دورت كل من قلت له زيت ساق الحمام ضحك يقول مايجي منها زيت بس عشبه





** الطريقه **





تحظرين لك باديه وتصبين فيها مقدار سكانه (بياله ) من كل الزيوت اللي فوق + 8 ملاعق متوسطه من بودره الشمطري (لونها ترابي على برتقالي تجي مطحونه ) + ملعقه متوسطه وحده من الكثيره .. ( وهذي تجي صلبه قومي دقيها بالنجر ثم اطحنيها بالمطحاان لين تصير بودره هي ماراح تصير ناعمه مرره بس زينه ) أي ولاتكثرون منها بس ملعقه + ملعقتين من عشبة ساق الحمام < تراها حيل مفيده < تخلط جميعها مع بعض وتحطينها بطل (قاروره ) ماء صحه حجم كبير ..



الزيوت هذي بتجلس عندك مدة طويله واللي تبي تزيد بالكميه كيفها يعني تبي تحط قاروره الزيت كلها بدل سكانه شي راجع لها مافي اشكال ..





& طريقه الاستخدام &




تدهن يوميا مابين 6 الى 8 ساعات << وانا افضل قبل النوم ولا قمتي الصبح تغسلينها بشامبو ..؟..



راعية الخلطه تمدح شامبو سلفكرين بالحنه << وهو فعلا رائع


بس انا ماستخدمته على اختي < شريت لها شامبو ( فاست (FAST


هو فعلا غالي 14 دينار كويتي أي مايعادل 200 ريال ومافوق بس عن تجربه انا استخدمه بعد رووووووووووووووعه معاه بلسمه شي خيالي هو احسن شامبو لتطويل وعلاج مشاكل الشعر وسألو الصيدلي عنه < وماينباع الا بالصيدليات





· واتمنى وحده جربته تقول للبنات عنه بعد *





المهم ماخلصنا بعد جايكم الخير < خخخخخخخخخخ




ثانيا << ونهاية الاسبوع او أي يوم محدد تحطين فيه هالخلطة ..



تنقعين بنص كوب ماي ملعقتين حلبه بلدي حبوب لمدة يومين < انا افضل تحطين الحلبه بقاروره ماي صحه كبيره وترجينها وتاخين منها شوي على حسب خلطتك عشان وين كل اسبوع بتنقعين حلبه بتتعبين لا يكون منقع وخالص وجاهز عندج





أي نكمل





وتحطين في باديه عندك 10 ملاعق اكل حنه + 1 ملعقه اكل كثيره مطحونه + 1 ملعقه مايونيز + 1 ملعقه خل تفاح + 2 ملعقه سدر + ماي الحلبه تشخلينه وتعجنين المكونات فيها + 4 فصات ثوم مدقوقه + حزمة جرحير طحنته بفنجال ماء





تخلين الخلطه ساعتين او تسوينها بليل وتحطينها الصبح على راسك لمدة اربع ساعات .. ومره وحده الاسبوع < كانت راعيت الخلطه تقول 3 مرات بس تعب وموزين كثره الحنه مره وحده بالاسبوع كافيه




وبعدها تغسلين شعرك اما بشامبو فاست .. او شامبو سلفكرين بالحنه ..


وبالنهايه تحــطين حمام زيت فاشكول بلثوم << ركزوا الثوم احسن نوع .. لمده خمس دقايق ..



ولله مجرد ماتغسلين شعرك الريحه تروح وماتحسين فيها .. وحتى الزيوت صحيح ريحتها تحوم الكبد بس مجرد ماتحطينها عشر دقايق تختفي الريحه


واذا ضلت الريحه حطي على شعرك خميره وبخريه




** يمكن بنات يسألون ليه ما جربتيها وانتي تحطينها لختك يعني التعب واحد لاني بدي اصبغ شعري على عرس اخوي وموقفه عني الحنه والخلطاات وعلى الاقل يبون منك توقفين الحنه سنتين الله كريم ويقدرني على صبغه **




الرجاااء الدعاء لي والدعاء kathreen الله يجزاها خير على هالخلطه الرائعه وفقنا الله وأياها





ملحوظه:


اللي قرى خلطة كاثرين قبل بيلاحظ بعض الاختلافات في بعض الشغلات مافهمتها من راعيه الخلطه فا انا بدهيا سويتها من عندي مثل الثوم كانت تقول اعصريه ماني فاهمه كيف اعصره قمت طحنته وظفته



واللي بعض الشغلات ماهي عارفتها ابد روحي للحواج اي العطار وهو بيعطيها لك مثل الشمطري ماكنت اعرفه بس هو الله يجزاه خير ورانياه وعرفته



ودمتم بودي وخيتكم شقيح الشقحقوح