في فصل الصيف بالذات بتكتر شكوي البنات من حدوث مشاكل بسيطة في عينهم زي مثلا حدوث احمرار والتهابات في العين أو وجود انتفاخات في جفن العين أو ظهور الهالات السوداء حوالين العين.
وبصراحة السبب في الشكوى دي قد يكون نتيجة التعرض المستمر لأشعة الشمس أو نزول العرق في العين وبالتالي حدوث حرقان ودموع واحمرار وبالتالي التهابات...
أو قد يكون نتيجة السهر طول الليل قدام التليفزيون خاصة وإن فيه بنات كتير قوووي ما بتصدق تاخد الأجازة وتقضيها سهر طول الليل ونوم طول النهار لغاية الساعة 3 عصرا...
وبالتالي لما تقوم من النوم تلاقي فيه انتفاخات في جفون عينيها.
أكيد دلوقتي بتسألي نفسك طيب إيه الحل في المشاكل دي يا ترى هفضل طول الصيف قاعدة كده مش عارفة أعمل إيه وكل يوم والتاني أروح لدكتور؟؟؟
لو عايزة حل أكيد وسريع للمشاكل دي..
يبقى لازم تسمعي النصائح دي...
***
النصيحة الأولى
اغسلي عينيك قبل ما تنامي
شوفي يا ستي ياريت إنك تغسلي عينيك كويس قبل ما تنامي بمية باردة وده علشان تتخلصي من آثار الماكياج اللي ممكن يكون لسه موجود فيها...
النصيحة التانية
نامي كويس
لازم تكوني عارفة حاجة مهمة قووي وهي إن العين أكتر حاجة حساسة في جسمك وأكتر حاجة بيبان عليها الإرهاق والتعب علشان كده لازم تاخدي بالك وتنامي كويس بالليل وبلاش موضوع السهر ده.
النصيحة الثالثة
اهتمي بنظرك
لو كان نظرك ضعيف ياريت إنك تهتمي بيه عن طريق الكشف الدوري عند دكتور العيون مرة كل ستة أشهر... واوعي تستخدمي قطرات للعين بدون استشارة الدكتور.
وياريت كمان تستغني عن العدسات اللاصقة في الصيف وتلبسي بدلا منها النظارة الطبية ودي حاجة أنا عارفة إنها بتضايق بنات كتير بس معلش تعالي على نفسك شوية والبسيها في الصيف...
النصيحة الرابعة
ابعدي عينيك عن حرارة وضوء الشمس
حاولي على قد ما تقدري إنك ماتعرضيش عينيك للحرارة وضوء الشمس بشكل مباشر...
علشان كده ياريت إنك تلبسي نظارة الشمس وده لأنها بتساعد على حماية العين من تأثير الأشعة فوق البنفسجية المضرة جدا للعين.
وخدي بالك إن نظارة الشمس اللي هتلبسيها تكون ماركة معروفة وبلاش موضوع نظارات الشمس اللي بتتباع في الشوارع دي لأنها بتضر العين جدا ومش بتفيدها وده لأنها مصنوعة من مواد بتسمح بمرور الأشعة فوق البنفسجية اللي بتضر العين وبتسبب ضعف البصر.
وياريت تتجنبي الانتقال السريع من الحرارة إلى البرودة أو من الظلام إلى النور لأن الموضوع ده بيتعب العين قوووي.
النصيحة الخامسة
ريحي عينيك على قد ما تقدري
ياريت إنك تريحي عينيك على قد ما تقدري وبلاش تجهديها بالسهر قدام التليفزيون والكمبيوتر.
وخدي بالك إن لو كانت طبيعة عملك بتخليكِ مضطرة إنك تقعدي لفترات طويلة قدام الكمبيوتر أو إنك تقرأي كتير يبقى ياريت إنك تدي لعينيك فترة من الراحة يعني مثلا بين كل ساعتين تغمضي عينيك لمدة عشر دقائق وبعد كده ترجعي تكملي شغلك تاني خاصة كمان إذا كنتِ لابسة نظارة فياريت أنك تقلعيها كل شوية وتغمضي عينيك بين وقت للتاني...
وياريت كمان تاخدي بالك من مصدر النور إنه يكون جاي من اليسار لا من اليمين ولا أمام الوجه.
النصيحة السادسة
اهتمي بالأطعمة المفيدة للعين
طبعا هتسألي نفسك دلوقتي وتقولي إيه علاقة الأكل بالعين..
هقولك ياستي فيه نوعية معينة من الطعام مفيدة جدا للعين زي الجزر اللي بيقوي النظر... ما تضحكيش فعلا الجزر بيقوي النظر وده لأنه غني بالفيتامينات اللي بتحتاجها شبكيّة العين...
وخدي بالك كمان إن أكل الخضار ممكن إنه يقلل من خطر الإصابة بضعف البصر.
النصيحة السابعة
مارسي التمارين الرياضية
دي بقى معلومة فيه ناس كتير مش عارفاها وهي إن ممارسة الرياضة بتساهم في الحفاظ على صحة الشرايين وبالتالي الحصول على دم نقي ومغذي للعيون ولكل أعضاء الجسم...
النصحية الثامنة
ما تفركيش في عينك
فيه حاجة غلط بنات كتير بتعملها وهي إنها لما تحس إن فيه حاجة دخلت في عينيها تروح على طول فاركة في عينيها علشان تطلع اللي دخل فيها...
بس في الحقيقة الحركة دي بتساعد على تثبيت الحاجة دي جواها...
علشان كده ياريت لو حسيتي إن فيه حاجة في عينيك إنك تقفلي عينيك لغاية ما تدمع وتخرج منها الحاجة دي مع الدموع أو إنك تجيبي كوباية مية وتحطي عينيك فيها...
بس يا ستي دي كانت النصائح اللي لو عملتيها يبقى إن شاء الله هيعدي الصيف من غير أي مشاكل...
وتعالي نشوف مجموعة من الماسكات الطبيعية المفيدة للعين
للأمانة منقووووول
جات في وقتها
يسلموووو
جزاك ربي الفردوس الاعلى