وصفة زين اﻷتات لعلاج الثالول بإذن الله (مجربة)

من تذكر زين اﻷتات كان يجي على قناة المرأة العربية زمان ؟


الوصفة هذي متندمة إني ما نشرتها من زمان وانا احتجتها و استخدمتها لما كنت بالمتوسطة قبل النت والأجهزة والثالول طلع لي مثل الكائن الغريب ما نعرف اسمه أو ايش هو ؟
و الثالول (بعيد الشر عن كل قارئ) هي حبة تطلع باليد حبة جلدية قاسية ما تألم وكلما مرت فترة تكبر وتكبر .. البداية تكون حبة وحدة اذا ماتعالجت تنتشر العدوى في اليدين بس تاخذ وقت وتطول تقريبا سنة او اقل قبل تنتشر الحبوب فأنصح تتعالج من البدااااااااية ..


وانا اﻵن فقط أتذكر هذي الوصفة وانا متحسفة وقلبي يعورني ما ادري كم واحد عانى معاناتي ومالقى حل وماصادف انه يسمع حلقة زين اﻷتات اللي ذكر فيها الوصفة فإلى كل مبتلى بهذا اﻷمر أقول لكم وقلبي يتألم سامحوني على التأخير والله يسامحني يارب ..


وترى أنا جربت الليزر (أظنه هو الكي) بس رجعت من جديد يعني هي جرثومة كانت موجودة و الليزر ما قضى عليها و سبحان الله ما أنهاها إلا الوصفة اللي نزلت من ربي و أنا في أشد حاجتي لها ...


هي الوصفة أمي محتفظة فيها الله يطول بعمرها هي اللي كانت تتابع زين اﻷتات وهي وصفة طبيعية مو منتج وموادها بسيطة و متوفرة .


وهي كاﻵتي :


قليل حلبه بودره
قليل حبوب بذر الكتان مطحون
قليل دقيق
قليل بياض البيض


اخلطيهم كلهم بالمعلقة حتى تصير عجينة ..
ثم خذي قطعة صغيرة وحطيه على كل حبة
وخلي العجينة حتى تنشف ثم شيليها
وكرري الحركة خذي من العجينة وحطي على الحبة .. كرري وكرري إلى ما تخلص العجينة ..


استخدمي هالطريقة يوميا وبتلاحظي الحبوب تصغر استعمليها حتى تختفي الثآليل تماما ..


الله يجزى الدكتور خير فعلا أحس إني مدينة له وأبغى أدعي له من قلب .. وأتمنى هذا الموضوع يطلع من اﻷوائل في محرك البحث لكل شخص يعاني و يبحث عن حل و الله يشفي كل مبتلى ..