
السلام عليكم و رحمة الله وبركاته
بما اني صايرة اموووت بالفلافل و زوجي مش ملحق علي ، قلت خليني اخفف عليه شوي و اعمله بالبيت ( مع انه يا ريت كل شي رخيص متل الفلافل ) بس لانه فلافل المطاعم مرات بوصلني بارد ، و مرات بكون مش معمول مزبوط فبصيبني مغص .. اليوم الصبح عملت شوي و قلت لازم حبايبي في حواء يشاركوني هالعجقة .. هي مو كتير عجقة يعني ما تخافو
الموضوع مو من منقول من لكِ بس عشان حملت الصور من هناك
بسم الله نبلش بالمقادير و الطريقة مع بعض
اول شي كاستين فول و نص كاسة حمص ، بننقعهم بالمي 12 ساعة او اكتر ..
تاني يوم او بعد ال 12 ساعة بنحضر بقية المقادير:
نصف ضمة كزبرة
ملعقتين بقدونس مفروم
ربع كوب خبز يابس مكسر
3 رؤوش ثوم ( رؤوس مش فصوص )
3 بصلات ( مو كتير كبار وسط)
و البهارات::
ملعقتين كبار ملح
ملعقة صغيرة فلفل اسود
ملعقة صغيرة بهار
ملعقة صغيرة كزبرة مطحونة
نصف ملعقة صغيرة كمون
نصف ملعقة صغيرة قرفة
ملعقة صغيرة كربونات الصودا
ملعقة صغيرة بيكنج باودر
بنصفي الفول و الحمص من المي منيح
بعدين بنطحن الفول و الحمص بمفرمة اللحمة يفضل عالناعم
بنضيف الثوم و البصل اثناء الطحن
بعدين بنضيف الخبز اليابس، كمان اثناء الطحن
بنفرم البقدونس و الكزبرة و بنضيفها عالخليط المطحون
بنخلطهم و بنفرم مرة تانية عالماكنة مرتين ورا بعض
بعدين بنضيف عالخليط البهارات و الملح و البيكنج باودر
بنعجن مزبوووط و بنغطي الخليط و بنخليه ساعة و نص لساعتين يتخمر
ممكن تشموا الريحة كلها بصل و توم بالاول .. بس بعد شوي بتخف الريحة و بتروح بعد اكتمال مدة التخمير
جهزي المعلقة الخاصة بالفلافل ، و بيجي معها معلقة مسطحة عشان تسوية الفلافل
و كمان جهزي صحن صغير في ماء بارد عشان بين كل حبة و حبة تغمسي المعلقة فيها حتى ما تلزق
سخني الزيت و حطي كمية من الخلطة في الملعقة و سويها بالملعقة المسطحة
نزلي الحبة بالزيت و اغمسي الملعقة بالمي بعدين كرري العملية لحد ما تعبي المقلاية ( انا ما لحقت اعبيها اول مرة لانه كان الزيت سخن خفت ينحرقو ) , وديييروا بالكم ما تكون المعلقة فيها مي حتى ما يطرطش زيت
قلبي الحبات حتى يتحمرو منيح ( ممكن يكون الزيت اصلا كتير و يغمر الحبات فما تحتاجي انك تقلبيه )
و هاد هو الشكل النهائي ( معلش كان عنا صحابنا و يااااا دوب خليت شوي اصورهم )
و بيتقدم مع سلطة الفلافل ( الطحينية ) و اللي طبعا ما لحقت اصورها بس اللي بتحب تعرف طريقتها من عيوووني
و صحتين و هنا
و سامحونا على شكل الصور اول مرة بنزل موضوع مصور