ياهلا وغلا بكل الصبايا الحلوين ..
طبعا اللي في الرياض معظمهم يعرفون الجوهرة اللي تسوي حلويات وفطاير وتبيعها وشغلها يجنن ماشالله عليها
المهم فيه حلى متميزة فيه يجنننننن اسمه الاعشاش واخذت طريقته من وحدة وقررت اسويه مع انه متعب شوي ويبي له طولة بال وطلع وربي نفسسسس الطعم والشكل مايفرق عنه ولا بشي وانتو سووه واحكموا
نجي للمقادير والطريقة واللي هي :
- شوكلاتة جالكسي ( اللي بـريالين ) طبعا اي عدد تبغين على حسب الكمية سواء 10 حبات او 20 او حتى كرتون كامل ، انا استخدمت 20 حبة
تذوبينها بحمام مائي الين تصير سايلة مره وحركيها زين عشان تتأكدين انه مافيه قطع ماذابت وبعد كذا خليها تبرد شوي
( ممكن تستبدلين الجالكسي بشوكولاتة ملكيتا تشبهها ولا تستخدمين الجالكسي السائل اللي يجي بعلب لانه ماينفع ابد ابد ولا يجمد )
بعد كذا جيبي البالونات الصغار مره اصغر حجم ( بالونات الموية ) وانفخيها صغار بمنفاخ خاص للبالونات والا ترى بتطلع بلاعيمك وانت مانفختيها هههههه
والبالونات ومنفاخها تلقونها عند ابو ريالين او اي بقالة ومحل العاب المهم تأكدو انها جديدة يعني ماهي ذايبة من حرارة المحل عشان تقدرين تنفخينها زين وماتنفقع
وهذي البالونات ..
جيبي صينية وغلفيها بقصدير (ورق المنيوم ) ودخليها الفريزر لمدة 3 دقائق حتى تبرد وبعدين وغمسي قاعدة كل بالونة بالجالكسي الذايب وتأكدي ان حرارته عادية والا ترى بتنفقع البالونة
طبعا التغميس بس للقاعدة يعني لاتوصلين حتى نص البالونة وغمسيها مرتين عشان تصير طبقتين ومثل ماتلاحظين بالصورة اذا سحبت البالونة يطلع جالكسي زايد كنه ذيل ههههه هذا مهم عشان تثبيت البالونة بالصينية
بعد كذا ثبتي البالونة بالصينية شوي شوي ولاتضغطين عليها الين تلمس البالونة الصينية ..يعني حطيها وانتي متأكدة انه فيه طبقة جالكسي تحت
طبعا بين فترة وفترة وانتي تشتغلين ارجعي دخلي الصينية الفريزر عشان تبرد البالونات والصينية تحتفظ ببرودتها مثلا اذا سويتي عشر حبات دخلي الصينية الفريزر لمدة 3 دقائق وطلعيها وكملي
واذا خلصتي دخليها الفريزر لمدة لاتقل عن ساعتين
اذا حسيتي انها جمدت طلعي الصينية وجيبي دبوس وفقعي البالونات من فوق عشان يطلع الهوا بالتدريج يعني اضغطي بالدبوس من عند ربطة البالونة
وخلي الصينية تقل حرارتها شوي وبعدين ابدي اسحبي البالونات بعد ماتنفقع ويطلع كل الهوا الي فيها واذا حسيتي ان الكاكو جامد لاتسحبين البالونة لان راح يتكسر الكاكو ويخرب شكله انتظري حتى تخف برودته شوي
هنا صورة الصينية وفيها البالونات بعد التغميس ولو تلاحظين يمين الصورة فقعت بعض البالونات وشلتها وتكونت قاعدة من الكاكاو
وهذي صورة اقرب
بعد كذا حطي في الخلاط الحشوة :
- 15 حبة بسكويت اوريو الغامق
- علبة قشطة ( التاج او المراعي .. الخ )
- خمس ملاعق شوكلاتة هيرشي السائلة
وحطي بكل قاعدة ملعقة صغيرة من الحشوة واذا خلصتي ارجعي دخليها الفريزر عشان ماتذوب
بعدين كسري شوي شعيرية باكستانية لقطع صغيرررة 2سم ( الشعيرية الباكستانية تكون رفيعة مررررة كنها شعر وتجي طويلة << ماتعرف توصف خخخخخ ) طبعا تحمرينها بدون زيت بس شوي الين يتغير لونها
حطيها بصحن وصبي عليها شوووي حليب نستلة وبعد كذا حطي فوق كل قاعدة شوي شعيرية .
وهذا الشكل النهائي ...
ملاحظة .. ممكن تسوين كمية كبيرة وتحطينها بالفريزر مع حشوتها واذا زاروك ضيوف طلعيها بوقت عشان تذوب وجهزي آخر طبقة (الشعيرية + الحليب المركز) وقدميها ،، بالنسبة لي انا استخدمت 20 حبة جالكسي وكفت 70 بالونة ..
اسمحولي ادري طولت عليكم بالموضوع بس لو بختصره مره بتجيني اسئلة بالكوم فعشان كذا احاول بقد ماقدر اني اوضح حتى لو كثرت حكي
جربوها ترى وربي تجنن ويبين انها متعوب عليها يعني حقت كشخة والا ضيوف خاصين ،، وبالعافية يارب مقدما ..