~~ وصلت الى أدنى درجات التحطيم ...انتظر النتيجة على أحر من الجمر وبالاخير؟~~

السلام عليكم


ودي افضفض عن شي كتم على صدري


بكاني لأول مرة من يوم دخلت في محنتي


اللي تابعني يذكر اني نزلت موضوع اني شاكة بورم طالع لي

وقال لي احد الاطباء كيس دهني

بس انا خفت وطلبت زيادة تأكد وقلت له ياخذ عينة ويحللها

قاعدة اعد الايام يوم يوم وساعة ساعة

اصعب واطول انتظار ممكن يمر على الانسان هو انتظار تحديد مصيرة

يا حميد أو خبيث

يا الحمدلله على السلامة أو يرحمك الله

دقايق تمر مثل السنين

خوف وقلق وترقب

قالوا لي انتظري عشرة ايام الى خمسة عشر يوم

سويت العينة يوم الاحد الماضي

اليوم يعتبر التاسع

اتصلت عليهم

قالوا لي ماوصلت النتيجة بس الدكتور مسافر في اجازة وماراح يرجع الا بعد اسبوعين
اااااااااااااااااااه طامة كبرى


انا الاسبوعين انتظرتهم على احر من الجمر

الحين بعد بنتظر اسبوعين

يعني شهر كامل

شهر كامل وانا في انهيار عصبي

لا حول ولا قوة الا بالله

قالوا لي ممكن تخلين دكتور ثاني يشوفها

بس انا مابي الا دكتوري ما ارتاح الا له

مو متخيلة هالموقف

ادخل على طبيب ما شافني ولا شخصني من قبل ويصدمني بالنتيجة في وجهي

مو متخيلة اجر رجولي جر واقعد على الكرسي ويقول لي الدكتور اخذي تحويل وروحي لمستشفى الاورام

يااااه صعبة لحظات الانتظار


وما اقول الا انا لله وانا اليه راجعون

اللهم اجرني في مصيبتي واخلف لي خيرا منها


وياخوفي بعد كل هالانتظار يقولون العينة ماكانت مضبوطة ويطلبون عينة ثانية وانتظار ثاني لالالالالالالالالالالالالالا هنا صدق بستخف

لانها تصير كثير لو العينة المسحوبة كانت دم او ماكانت من الورم نفسه

وبنفس الوقت مو مستعدة اغامر في مستشفى ثاني وامر بلحظة ألم سحب العينة مرة ثانية والم الانتظار والم التعب النفسي

مدري ايش اسوي محتارة

اقعد وانتظر

ولا اروح مستشفى ثاني واكرر الخطوات

ولا اسافر

بس شلون اسافر

وانا مخبية كل شي عن اهلي

مابي اهلي يدرون باللي فيني مو مستعدة اعلمهم

قلت بكتم على الموضوع لين تطلع النتيجة وبعدين اقول لهم

يارب ارحمني برحمتك


كل شي بهالدنيا يهون الا المرض ما اصعبه

كل مصايب الدنيا تهون الا مصيبة الدين ومصيبة المرض

يارب لا توري احد فينا المرض وحرمة على جسد كل مسلم ومسلمة

بس حبيت افضفض لان ماعندي احد افضفض له من البشر