وصلت مرحلة ما ابي منه شيء. انا طبيعية؟؟

انا موظفة وزوجي وضعه المادي تمام الحمدلله. يقهرني انه من بداية زواجنا ما كان يبادر يشتري لي شيء وحتى من اول شهر اذا رحنا للسوق كان يختفي اذا جيت احاسب يخاف اقول له حاسب عني. وهذاك الوقت كنت طالبة ما عندي الا مكافئة!


اليوم بعد الوظيفة تعبني اكثر واكثر. شايلة مصاريفي من الى واحيانا حتى اجيب اغراض للبيت من فلوسي مثلا ديكور او اشياء تخزين للمطبخ او مواد تنظيف ومكانس. ما يبادر بالاشياء هذي على انها مهمة لكن ما يجيبها.
اللي يقهر انه اذا جاء اخر الشهر وما معاه فلوس يجي يقول هذا كله منك ،، تخيلوا ! طبعا هو مبذذر درجة اولى بس ما يصرف علي شيء غير مقاضي البيت والباقي انا اجيبه.


اذا طلعنا واشترى لي مثلا قهوة ب١٠ ريال يجي بعدها يقول يله وش بتعشينا !!
واذا طلعنا مره ثانية يقول قهوينا يله ! صرت بنات حتى اذا جاء بينزل يشتري قهوة او شيء ارفض اقول شكرا ما ابي لا تجيب لي شيء
صرت اذا بيجيب اي شيء على حسابه ارفض. حتى مقاضي البيت اذا سويت شيء منها لي لحالي احس تجيني غصة وانا آكل.
صرت حتى كل ما اشوف وحدة تصور طلعاتها هي وزوجها اقول بنفسي هل كوب القهوة هذا بيطلع من عينها وتغص فيه؟
اذا انضغطت مرره بالشهر ولا قدرت اسوي غداء اطلب على حسابي لانه اذا قلت له يجيب معه غداء ب٢٠ ريال يجي آخر الشهر يقول خلصتي راتبي بطلبيات المطاعم. ما ابي منه اي شيء !
ولا يقدر اني شايلة عنه حمل ابدا مدري وش يبي 💔
مجرد فضفضة لان ما ودي اشكي لامي واضيق صدرها.