وضعي معقد مع زوجي وعقلي مشتت ونفسيتي متذبذبة

السلام عليكم

مدري وش أقول بس ابي افضفض لكم واستشيركم ،،

اول شي انا امر بضغط نفسي عجيب بسبب مشاكل
صارت لي مع زوجي واكتشفت شي ورحت عند أهلي شهر ونص
لآني تعبت من الوضع زوجي متغير ولا عاد يحاسب ع كلامه  ونظامه مالك دخل وخليك ساكته
المهم رجعني من أسبوعين و شرط الرجعه ما نتكلم في الماضي وننسى
رجعت وانا ساكته وأحس موضوعي ما انحل
المهم وضعنا جداً بارد ما بيننا سوالف يعني مو قريبين من بعض علاقتنا رسميه
نتكلم في الأشياء الاساسية اللي تخص البيت وكذا
ومن هالناحيه مو مقصر اكل وشرب وفلوس بس في شي ناقص الموده والرحمة
فوق اننا مو قريبين من بعض يبي (حقه الشرعي)
خليته يأخذ حقه اكثر من مره ولاحظت مجرد ما يأخذ اللي يبي نرجع أصنام
وهالشي يجيب لي غصه أقوم بعدها ابكي مدري وش وضعي سبب لي صراع داخلي
نجي للمشكلة أمس طلعنا نتعشى برا برغبة منه جالسين بالمطعم سااااكتين
ولا كلمه ولا حرف الى ان رجعنا البيت ولما رجعنا جلس ع اللاب توب عنده شغل  بغرفه لحاله
الى الفجر
 وانا ما قولكم كيف جوي مكتئبه من الوضع قمت أخذت لأب توبي اخلص شغل عندي  
المهم جاء لقاني ع اللاب توب بغرفة النوم دخل هو بينام شلت قشي ع أساس اطلع عشان ينام لحقني يبي حقه الشرعي انا ذيك اللحظه كنت كارهه نفسي لان هالاسلوب يجيب الهم والله ،، (اعذروني على هالكلام) شافني مو متفاعلة معاه قال وش فيك قلت مافيني شي قال ما تبين انا سكتتتت قال ما تبين خلاص براحتك قالها بزعل ونام  .. لاحظوا انا ما رفضته ولا صديته بس ما تفاعلت معه ،،
ندمت وخفت من ربي قلت اصلح الموقف ،،
قربت منه وهو نائم وضميته قلت بنام بحضنك (موقف صعب بالنسبة لي لان ما عادت بيننا هالحركات بالقوة طلعت مني ) قال ظهري يعورني
طبعا على طول بعدت عنه ونمت وكنت منحرجه ودمي يغلي
وهو حاول ينام وبعدها طلع جلس برا الغرفه وراح لدوامه مواصل ،،
ندمت أني  أحرجت نفسي وبنفس الوقت  خايفه بعد هالموقف وضعنا يتعقد اكثر مو ناقصه السالفة  لا تقولون تقربي منه لان طول هالفتره ماكنا قراب من بعض،، مو عارفه كيف أتصرف عقلي مشتت