وضعي مع زوجي ومرته الثانية انصحوني لاني تعبت..

السلام عليكم ورحمة الله وبركاته
اكيد الكل بعرف قصتي هلا انه زوجي تزوج علي مشان الاطفال بعد 10 سنين زواج وغربة وشقا وتعب شغل. المهم ملخص الحديث انا شقيت وتعبت معاه وبلشنا من الصفر وكان بعرف وضعي من قبل ما تزوجني انه عندي مشاكل للحمل ونسبة حملي ضعيفة ولكنه اراد طفل وراح تزوج بعد ما قلتله روح تزوج عشان ابري حالي من خطيته ولانه آخرفترة صارت حياتنا لا تطاق بدو ولد . المهم تزوج وصار عنده ولد .
زوجي من الاول كان بدو تكون علاقتي منيحة مع مرته وانه نحكي سوا عشان نكون عيلة وحدة . انا في بلد وهية في بلد باخر الدنيا وكل فترة وفترة بنزل.. وهلا في رمضان بدو ينزل شهر ويتركني لحالي عادة كل سفراته اسبوعين بس هالمرة نازل 4 اسابيع قال نفسه يعيش رمضان مع اهله مع انه بحياته ما فكر في هالشي من قبل بس طبعا هوة عشان ابنه وبرضه اكيد عشان مرته ومش هامه ابدا كيف انا راح بكون لوحدي اشتغل في المحلات ورمضان . عادي ما بفكر المهم نفسه .وكل ما اعترض بحكيلي بدك تحرميني من اشوف ابني .
بنات انا لا اخفي عليكم هوة كتير تغير كل شي وعدني اياه وكل ما احكي شي بحكيلي انا مقهورة وغيرانة وحسودة .في كلام بجرح المرة العقيم اكتر من هيك ..
انا بعترفلكم كنت اعمل مشاكل كتيرة انه مع مين بتحكي وليش بطولوا بالحكي وشو بتحكوا ونكد ومشاكل بس والله ما بايدي والله .. يعني مش مستوعبة وقسما بالله انها صدمة العمر صح انا اللي حكتله تزوج بس ما توقعته يتزوج خلال 3 اسابيع.
ولما بتقاتل معاه بحسه ما بصدق فيها ما بصالحني ولا شي وطبعا كانه في بديل هلا خلاص
زمان كان يصالحني بنفس اليوم حتى لو انا اللي غلطانة ..وهلا لا ابدا
هلا بخصوص مرته منيحة وبنت عالم وناس كل فترة وفترة بتلاقوني ماسحة رقمها من الباب للطاقة وبرد برجعه ومرات بكون مش طايقاها ومرات برجع بندم . لحد مبارح حكتله بتحكي لمرتك انه تبطل تبعتلي اشي لاني بديش أتعرف عليها برجع اليوم برد احفظ رقمها من جديد وابعتلها . تعبت يا بنات.شكلي اخدت مقلب في حالي اني راح بكون الكل بالكل قال والاولى وبعرفش شو بس طلعت بجد صفرررر عالشمال . بنات مرته محترمة ومنيحة بس برضه حسيتها تغيرت بعد ما جابت الولد واشتغلت .قبل كانت بس بدها انه علاقتنا تكون ممتازة وتحاول تسايرني وتخفف عني هلا ولا فارقة عندها حكينا ما حكينا.
حسيت حالي دايما بنكسر انه هوة مش فارقة عنده ولا هية عايشين حياتهم. كنت بفكر انه دايما راح اكون بينهم في كل شي واعرف كل شي
اولها اه بس برضه كنت اتنكد بس هلا ولا بعرف اشي عاساس اني ام الولد متلها متلي..
معقول من الوحدة والفراغ ولا من كسرة القلب ولا من المقلب اللي اكلته ..
انا بظلمهم ولا همة ظالميني ولا شو
انا ضد اللي بحكوا انه التانية هية مو منيحة وشريرة هية زوجته متلها متلي بس انه دايما بصير فيه نقرات ومشاكل حسب الانسان طبعا وكل باخلاقه.
انا استشرت وحدة من المشرفات الافاضل وما قصرت . بس بدي من المجربات الاولى او التانية وحتى الرابعة .
انا تعبت ومليت حاسة حالي خدامة اله والها بشتغل 9 ساعات عوقفة وحدة ومتغربة باخر الدنيا عن اهلي .
اما هية عند اهلها وفي بلدها وعندها ابنها وفعليا ما فارقة زوجها اجاها مرة ولا مرتين ولا 3 في السنة منها حكتلي ..
بدي نظام امشي عليه عشان اقدر اعيش باقي سنين غربتي
بدي ابطل ضعيف وانساهم
ساعدوني يا بنات ..