(وعزتي وجلالي لأنصرنك ولو بعد حين)امنت بك ياربي فرأيت نصري بعيني

بسم الله الرحمن الرحيم



الى اخواتي الحوائيات الى من اكتوت بنار الظلم والقهر والخيانه


الى من طعنت بظهرها من قريبه او من بعيده



اكتب لك قصتي لعلك تجدين في طياتها مايشفي غليلك


واعلمي انه مهما زاد ظلام الليل الحالك لابد من بزوغ فجر جديد تؤمني فيه ان القدام اجمل واحلى من كل التوقعات



اذا تمسكتي برب العباد واقنتي حق اليقين ان ربي لن يخذلك



سكتب قصتي وستاخذ مني صفحات يعلم الله اني لا اريد منها التشويق ولا اريد جمع اكبر عدد من الردود اكتفي بقراءة قصتي من غير رد ان شئتي ولكن احتاج منك دعوه بظهر الغيب

ساكتبها كما استطيع لانها نزف سنين الله يعلم حجم الالم الذي ذقته ولاني اكتب لكم بالمنتدى مباشرة ولا تجبروني ان اكتبه في مستند ثم انسخه لان الجهاز مشترك بيني وبين زوجي ولاسباب سوف تعرفونها فيما بعد لما لااكتبها ثم انسخها اسال الله ان يعينني وان يفتح ع قلبي فتح مبينا..


دعواتك ان يحقق الله مااتمناها فالله اني اتمى بقلبي ماتتمناها كل انثى ع وجه الارض ومادعى به الانبياء قبلي لحاجه فطرها الله فينا اسال الله بمنه وكرمه ان يرزقني انا ومن تتمناها ع وجه الارض وان يقر عيننا بهم



قبل اسرد قصتي اعلمو ان لا احلل ولا ابيح من تنقل قصتي لاي منتدى اخر اشهد الله ان من تنقلها لمنتدى او تتداولها برسائل الاميل او البلاك بيري فهي خصيمتي يوم القيامه اللهم من نسخت قصتي ونقلتها لاي مكان كان فافضح سرها بين الملأ <<اعذروني لم ادعو بهذا الدعاء الا لاني وجدت بعض ضعيفات النفوس كتبت صحابة القصه انها لاتحلل من تنسخها ومع ذالك نجدها في المنتديات والايميلات وانا لا اريد الا الفائده لكم واحتسبي اجر الله

اللهم ان قصتي بين يديك وديعه اللهم اجعلها في ودائعك وحفظك من النسخ والنقل اللهم احفظها واكتمه بين طيات منتدى عالم حواء


انا لم اضعها الا للفائده لكل من اكتوت بنار الظلم والقهر والخيانه ..


كاي فتاه تحلم بالزواج كتب الله لي نصيب وتزوجت زوجي خطوبه وزواج تقليدي الحمدلله جمع زوجي صفات كنت اتمناه واحلم بها وفي نفس الوقت كان يتحلى بخصال اكرهها بل امقتها ولكني صبرت لانه نصيبي


حاولت اتخطى ماكرهه بزوجي بالنظر الى الجانب الايجابي فيه والحمدلله مشت الحياة معه بحلوها ومرها

كان زوجي مقل بل معدوم الا بشق الانفس ان يسمعني كلمة حب او رومنسيه وبطبعه لانه شمالي شرقي كنت اتمنى ان اسمع اي كلمه يطرب لها قلبي وانتشي من فرحتي ولكن هيهات هيهات ان قالها فاعلم انه كسر القاعده لكني كنت اتصبر واعلل انها شخصيته يكفي ان يترجم حبه لي عملي كان زوجي خجول جدا وهذا ايضا غفر له ولانه ايضا واثق بهذه النقطه لم يكلم فتاه ولا حتى يلمسها ولا حتى يعرف اعضاء النساء واشد من ذالك ستضحكون انا من شرح له الدوره وكيف هي وانها لاتصلي ولاتصوم اي نعم يعلم ان الدوره تاتي النساء لكنه لايعلم ماهية الدوره ولا ماذا تعني بمعنى اصح اقرب مايكون زوجي ابيض وجاهل بالنساء لان احتكاكه باخواته سطحي جدا



مضت الايام وليتها لم تمضي اتعلمون لماذا لاني كنت طيبه لابعد حد ساذجه غبيه او بالمعنى العام ع نياتي اعامل الناس ويعلم الله اني انظر لهم كانهم مثلي واشد بالطيبه


لاتستعجلون بالحكم سكمل لكم

لا اعلم هل لون الخط يناسبكم لاكمل به ام لا ؟؟




جزاكم الله كل خير ساكمل لكم بالعاميه انتظروني سااخرج للصلاه وكذالك اتصل علي زوجي يشهد لاخرج لمشوار ضروري اليوم باذن الله ساكتب لكم قصتي كامله انتظروني...

اعتذر منكم لتاخري بالرد يعلم اني خرجت لمشوار ضروري مع زوجي لاهله


اكمل لكم مابدات



بعد سنتين من زواجي تزوجت احدى زميلاتي وسكنت في نفس مدينتي <للعلم هي زميله وليست صديقه كان احتكاكي بها جدا سطحي سابقا حتى تكونو في الصوره فيما بعد



فرحت بها اشد الفرح لعدة اسباب

اولا لانها قريبه من سني حتى وان كانت اكبر مني المهم قرب سنها مني وتفكيرها


كذالك لاني اعاني من الوحده ولا اعرف احد في مدينتي



فاعتبرتها اخت وصديقه وكل شي يعني لي تعاملت معها كاختي بل اشد وستعلمون في طيات قصتي ماذا فعلت وماذا فعلت



اعتذر منكم ساكمل بالعاميه



ماانسى ذالك اليوم كنت اطبخ الغداء رن جوالي اناظر الاسم فلانه الفلاني <<بصراحه مية علامة تعجب ايش تبي بهالوقت ووش تبي فيني اصلا مره مالي علاقه فيها


رديت بعد السلام والسؤال عن الحال صدمتني فلانه انا تزوجت وسكنت عندك ب.... وبالحي الفلاني واخذت من عائلته<<كل هالامور اجاهلها اولا لاني مااعرف لا احياء هالمدينه ولا حتى عوائلها

وابيك تجيني والا اجيك ومن هالحكي


قلت طيب لاقام زوجي من النوم كلمته وارد لك خبر



طبعا زوجي مره شديد ومايبي اطلع شبر الا معي احد فكيف افتح سالفة ان وحده تزوجت من زميلاتي وسكنت هنا



لما قام استجمعت قوتي وطلبت من الله يفتح ع قلبه ويتقبل الموضوع وعلمته بالاول رفض وعقب وافق بشرط تجي البيت بالاول عقب يوديني لها


جتني وجيتها كلها ع بعضها ماتعدت ربع ساعه بحكم بتطلع هي وزوجها لمشوار بعيد


بعدها رحت لها تعرفت علي اهل زوجها


طبعا انا والله الحمد بشهادة الجميع حبوبه جدا اجتماعيه الي يشوفني ع طول يرتاح لي ويحبني جميله ولله الحمد الكل يمدحني بجمالي وشياكتي ولبسي واهتمامي بنفسي< ليش اقولكم هالكلام لان اهل زوجها من اول ماشافوني حبوني مره وتعلقو فيني حتى اقارب زوجها الي يجون عندها كنت صفحه بيضاء للكل فالكل كان يرتاح لي ويلجأ لي وع طول من اول جلسه يشكي لي همومه سبحان الله الله حط لي قبول

بس هي كانت تنبهني منهم وتطلب اكون سطيحه معاهم بس ماكنت اقدر اسوي هالشي لان مو من طبعي اطنش احد


مع الايام اروح لها وتجيني وبالغالب انا كنت اروح لها بطلب من اخوات زوجها لانهم مايقدرون يجوني ولان من الاصل زوجي كان رافض احد من طرفهم يجي بيتي يكره هالعائله مره مو عائلة زوجها لا العائله عامه فرافض اي احد بهالعائله يدخل بيتي فكنت اتهرب منها لاقالت بجي مع اخوات زوجي عشان لا احراجهم ولا يزعل مني زوجي



سبحان الله ماكتب لها قبول عند ام زوجها ولا بعض اخواته


فكانت مشاكل كبيره تصير بينهم وحتى بين زوجها توصل للضرب


طبعا عند اي مشكله تصير بينهم ع طول تتصل علي عشان اجيها



اول مره كان الظهر اذكر هالوقت زين كان عند زوجي رجال ع الغداء ودقت علي تطلبني اجيها ضروري


فهمت من كلامها صار بينها وبين زوجها شي


ناديت زوجي وكنت مرعوبه وخايفه عليها ولان مالها احد هنا مالها الا انا لازم اوقف معها


وداني زوجي لها وكنت اجلس في كل مره تتخاصم مع زوجها من العصر او المغرب الين 1 الليل لانها بحال يرثى لها


ولا كنت اخليها تسوي شي اجيب الحلا والفطاير والعشى اوصي زوجي يجيبه من طيب قلبي


لمدة سنتين وكل ماصار بينها وبين زوجها شي والا بينها وبين اهله شي لابست عباتي وطايره لها



طبعا كنت غبيه مو غبيه وبس الا كنت هبله وع نيتي انقل مشاكلهم وتصرفات زوجها واهله لزوجي بحكم ماعندي اي سوالف ولا اشوف احد الا هي

ولانها كنت اطلب اشاور زوجي ونطلب منه الحل< مو اقولكم كنت غبيه ومغمضه ولا عرفتها زين الا بعدين

ولاني اعرف زوجي زين مو حق لا خرابيط ولا حريم فمو مهتم لها بس يمكن كانت تكسر خاطره

وانبه كل وحده متزوجه اصحي تحكي لزوجك عن اخواتك صديقاتك قرايبك اي احد اصحي الشيطان مامات باي لحظه يزينها بعينه


طبعا لاني اشوف نص الكاس مو كله فاحطها دايم المظلومه وهم الظالمين


مع الايام اكتشفت قد ماهم ظالمين قد ماهي غلطانه بتصرفها وحلها للامور لانها كانت تعقدها بدال ماتحلها


بكل هالفتره علاقتنا حريم وبس زوجها وزوجي مالهم علاقه ولا حتى حرصت لان زوجها مو اهل يتصاحب ومع الايام فعلا نظرتي فيه كانت صح مو خطا



المهم انا زوجي كان يحبني ويظهر لي هالشي بالذات مع زيادة عمر زواجنا


يرسل لي يتصل علي يسمعني اغاني رومنسيه تعبر عن حبه لي بحكم انه مايتكلم ابد بس يعبر بطريقه عمليه او بالاغاني بس



مايرفض لي طلب ابد ويجيب لي هدايا والي اتمنى


اذكرو الله يابنات دوام الحل من المحال زوجي تغير مع مو كثير بس تغير وبعلمكم وش التغيرات بس صبركم



وكان زوجي وحتى وانا عندها يتصل يسمعني ويقفل وكانت العيون تنفتح علي وش يقولك وليش ساكته بس ماكنت اقول طبيعي مااحب احد يتدخل بيني وبين زوجي




طبعا علاقتنا كانت احيانا اسبوعيا واحيانا كل شهر واحيانا بالشهور ماادري عنها لانها تقطع وماعاد ادري عنها الا اذا صار لها مصيبه فما كنت احرص بحكم انها مو صديقتي زميله فقط والعلاقه من اول رسميه جدا او اقدر اقول سطحيه



الين جت هالسنه الي اسال الله ان يمحيها من ذاكرتي وتكون ذكرى منسيه وماعاد اطريه



والحمدلله الحمدلله ان ربي ربط ع قلبي ونصرني وبرد علي احمده من قبل ومن بعد..

بيوم من الايام طلبت مني زوجي يتعرف ع زوجها ونطلع سوا منها ينصحه ويعلمه وان زوجي عاقل ومن هالحكي

طلبت من زوجي يتعرف ع زوجها مع اني ماكنت متحمسه لهاشي ولا مرتاحه
بس كنت ابي زوجي ينصح زوجها ويعدله

فيوم عزمناهم للبر وطلعنا جميع
تعرف زوجي عليه وقالي بالحرف الواحد زوجها مره مره تقدر تمشيه ع مزاجها بس هي ماعرفت له

طبعا زوجي كان افضل من زوجها بالف مره من حيث الماده ومن حيث العمل بس زوجي ماكان عنده هالخرابيط

فزوجها كان يتعامل مع زوجي باحترام وتقدير قوي لمكانة زوجي بالعمل ومع كذا كان زوجي يزعل منه ويطلبه يعامله عادي

زوجي فيه صفه طيب مررررررره وحنون وبسرعه ينكسر ومتواضع ويحن ع الناس مايحب يشوف احتاج محتاج لازم يفزع له


المهم هم ردو لنا الطلعه بس كانت رحله 3 ايام ووالله فلوس الحجز وتكاليف المطاعم اغلبها ع زوجي والحمدلله كانت وقتها ع قلبي مثل العسل اهم شي ننبسط

المهم صرنا نطلع اسواق ومطاعم مع بعض واحيانا بسياره وحده واحيانا كل واحد بسيارته

اول مره شافت زوجي قالت من شفته ذكرني باخوي..!!!

استغربت وش هالشبه قالت لا بس من ورى يذكرني باخوي..؟؟؟ّ!!

المشكله قالت لزوجها ولا قالها شي والله شكيت ان مافيه غيرة الرجال بصراحه اتوقع لو اقولها لزوجي طلع عيوني من مكانها عشان اعرف اناظر

المهم طلعنا مره بمطعم وهالطلعه صدمتني فيها هالمطعم مافيه حواجز بين العوائل لا الكل جالس مع بعض وكل عائله جنب الثانيه الي بتكشف تكشف والي بتتغطى تتغطى
المهم اخذنا طاولتين ورى بعض جلست انا وهي بطاوله وزوجي وزوجها بطاوله

كان زوجي معطينا ظهره وانا وهي معطين زوجي ظهرنا وزوجها معطينا وجهه

ايش صار زوجي قام يجيب لنا عصير وزوجها ماكان فيه
فجلس زوجي ع الكرسي
ونادني يعطيني العصير اخذت اول كاسه وتوني بالف مره ثانيه ع زوجي باخذ الكاسه الثانيه لقيتها بكل جراءه اخذت من زوجي الكاس ..!!!

اتمنيت لحظتها تنشق الارض وتبلعني ولا انحطيت بهالموقف طبعا بان ع وجه زوجي انه مستحي ومرتبك

لحظتها ماكلمتها مره تضايقت منها ولما ركبت السياره عتبت ع زوجي قالي وش اسوي مدت يدها ويمكن فعلا تعتبرني اخوها

خاصمته ونبهته ماتتكرر لاني ماابي احسسه بشي

نسيت اقولكم لاني كنت غبيه وع نيتي قلت لزوجي قبلها بيوم مسكينه من شافتك تقول تذكرت اخوها فيك شبه منه حتى زوجها يقول فعلا< لا ولعلمكم مو بس انا الي كنت غبيه حتى زوجها قاله لزوجي ان زوجتي من شافتك تذكرت اخوها

انا كان قصدي لانها مسكينه وبمشاكل ماابيه يتاخر باي لحظه تحتاج لنا بحكم ماعندها احد وزوجي كان يستثقل روحتي لها

وخلال ذيك الايام والله كنت انزل السوق اشتري لي والي يعجبني اجيبه لها والله لو يكلفني الي يكلف وكل من الماركات


اشتري لها اغراض للمطبخ للبيت ولا اسال بكم شريته ماهمني بقدر مايهمني اسعدها واعوضها المشاكل الي هي فيها ونكد وبعد اهلها ماكنت ابي احسسها بالغربه

مع الايام لاحظتها ننزل السوق تراقب زوجي < زوجي طبعه بالسوق اي مكان لازم يلتفت لي اذا كنا مع احد اختي اخته امه اي احد طبعه يتاكد منا مو عدم ثقه لا بس مايحب الحرمه تنصف الطريق
احب عليه نمشي يم الجدار
ويخاف احد يتعرض لنا او شي

فلازم يناظرنا كذا مره ونظرته لي


وتتكلم قدام اهل زوجها واقاربهم ومعارفها الي يجونها ان بس زوجي يجلس يطالعنا قلت عمرك شفتيه ناظرك انتي تتحجج وتلف الكلام وبالاخير تعترف انه ماناظرها بس يناظرنا < ماادري كيف تجي ذي الا تبي تشككني فيه

وبيوم طلعنا واحنا جالسين جاني زوجي يناديني من بعيد ورحت له كلمته وبعد مارجعت وجلسنا نسولف
قالت لي بكل سعة وجه
ماادري ليش احب اناظر زوجك< تقولها وهي منحرجه<<انا لحظتها جتني مثل الصدمه ربطة لساني ماتوقعتها توصل لهالمستوى من الوقاحه
من قهري ماادري من برودي قلت لها عليك بالعافيه ناظريه الين تشبعي مين منعك مو مشكلتي اذا ذي تربية اهلك
وسكتنا وجلست احاول اسوي اي شي بحيث مااسولف معها وان سولفت سطحي خلاص كش قلبي منها

نادني زوجي وطلب نقوم نمشي وفعلا قمت امشي معه وانا خلاص خانقتني العبره منها

وبيوم من الايام كنت انا وزوجي جالسين الصبح وهو قاعد ع الابتوب فتحت جواله بشوف صور صورها زوجي واحنا بالطلعه وماادري وش جاني فتحت البريد الوارد

اه يابنات حسيت الدنيا تدور فيني مستحيل الي اقرأ مستحيل
تخُونْ اليُومْ عِشْرَتْنا .. وتِبَدِّلْ فرْحِنا بأحزان
ويِطُولْ اللِّيلْ في عِيني وأقولْ : الشَمسْ خوَّانه
سِمَا .. وقلبي مِثلْ طيرٍ يطيرْ وفَارِدْ الجنحان
وبَعَدْ مَا طَار لِكْ قلبي تِكَسِّر ليه جنحانه..!
زِمَنْ غيَّر وفا قلبك وخلاكْ الزِمَنْ خوَّان
وأنا اللِّي أحْسِبَه قلبكْ يصُونْ القلبْ لو خانه
أصدِّقْ وإلا ما أصَدِّقْ .. أخافْ إنِّي أنا حلمان
تدُور الدنيا في عِيني وإلاَّ عِيني نعسانه..!

انصدمت صدمه وبان بوجهي وانا اقرأ حس زوجي فيني وخطف الجوال بسرعه من يدي
وقوم الدنيا ولا قعدها ليش افتح جواله ولا فتحته الا بشوره بس ماتوقع ادخل للرسايل

حاولت بزوجي يعطيني الجوال ورفض طلبته ترجيته مارضى
اخذ الجوال وماعاد ادري وين راح هالجوال
دورت له مالقيته

جاني العصر قالي يلا نطلع البر اهل يبون البر< آه وش سعة هالوجه تبي بر وقلبي مشتب نار
رفضت وقلت مااطلع الا اشوف الجوال قالي اذا طلعنا عطيتك بالبر قلت لا الحين وحلف وقلب السالفه علي

طلعت معهم البر وانا نار بقلبي والله من قوة الصدمه ومن الي قريت مو قادره لا استوعب ولا تنزل دمعه من عيني

هو مسوي نفسه زعلان لاني فتحت جواله < اعور ويناقر
وانا بموت قهر من الي قريت وعجزت استوعبه لان من صدمتي بلي اقرأ صرت اناقز الكلمات بنهي الرساله

حاولت بشتى الطرق وهو رافض
قلت خير الخبر بيجي الين حدي
طبعا وش يسوي زوجي عشان يقلب الطاوله علي قالي قشي اغراضك كلها وع بيت اهلك وورقتك بتاصلك< عجب والله كاني انا الخيانه
ي سنيني!
............ وش كثر ضحيت لأجله !
وف النهاية
........... ضحى ... فيني !
ااآه ياعمري حسافه . .
قلت روحي :
وهاك شوية جروحي
واعذريني حيل والله
على قلة الكلافه ..!

هو قال هالكلمه ماخليت ولا فتفوته بالبيت الا شلتها خلاص عازمه ع بيت اهلي ماعاد اجلس

وحلفت له مااقعد مهما يكون

وكان عنده عمل اخر الليل انا ماعاد تكلمت معه ابد

لانه وعدني اشوف بعدها ماطل بالسالفه ولا عطاني اقرأ ع الاقل ابرد ع قلبي

سحب جوالاتي مني ولا عطاني اياها وراح للعمل وهي معه

انا ماعاد دورت فيه لان خلاص كرهته لحظتها

وانا قاعده الم اغراضي وابكي قهر وظلم وطعنه الي جتني منها

سمعت باب البيت فتح وكنت مطنشه اغسل مواعين بالمطبخ اخر مابقى لي والا ملابسي اوراقي كتبي كل شي قشيته ماعاد لي شي

دخل وجاني المطبخ وطلعت من المطبخ ورحت لغرفة النوم اقش الي باقي بالتسريحه

لحقني الغرفه ومسكني من كتوفي وجلسني ع السرير
تكلم وليته ماتكلم مو قادره اسمع صوته من قوة البكى الي يبكيه
ناظرته وجهه اسود ويبكي عند رجولي ويطلبني اسامحه ومااتركه
طيب اسامحك ع ايش والا ايش قولي فهمني وش السالفه مارضى يتكلم واحتضني وبكى ويسلم ع رجولي بس اسامحه ولااتركه< والله تذكرت الي صار وبكيت
سالته ليش سويت فيني كذا< رد والله ماادري سامحني انا والله ماسويت شي وانا والله ماافرط فيك ولما قالت لك بوديك بيت اهلك وبطلقك مو من قلبي بس انتي قهرتيني باسلوبك يوم تشكين فيني< عجب والله ماادري شافني عمياء والا هبله
صار يبكي ويطلبني اسامحه ونزل يبوس رجلي ورفعته وصرت ابكي واشهق من قوة الجرح الي احسه ويسالني سامحتيني والله ماارجع عملي الا وانتي مسامحتني وانا اهز راسي اني سامحته خلاص والا بداخلي الم مايعلمه الا ربي
سامحتُكَ علَى كُل شَيئ ،
و غفرتُ لكَ أن تكُون كَاذِب ، جاحد أو حتّى بخِيل فِي مشاعرك تجاهِي ..

كُنتُ لكَ وحدكَ ! رغم ذلك قبلتُ أن تشاركنِي بكَ نِصف الدنيا ،
إلا !

منذُ أن وصلنِي نبأهَا و أنَا ألعَن قلبِي حينَ يحاول مسامحتكَ بها ،
و أعجَز عَن تقبّل صدمَة ضِيق عَين روحكَ ..
ربّمَا لأن عَين عمري كَانت قَد إمتلَأتْ بِكَ وكنتُ أظنّ أنّكَ مثلِي !
لَا أن أكُون فِي إحدَى يديكَ بينمَا تبحث اليد الأخرَى عَن غيري ..
سامحتُكَ علَى كُل شَيئ ،
إلاّ أمر إستغفَال قلبِي ! ليسَ بيدِي أن أسامحكَ عليه ،
أو أَن لَا أشعُر بعده أنّك غرِيب عنّي ..


اليوم الثاني تدق طول الوقت وحتى نفس اليوم بس مارديت عليها لاني كارهتها لان في اشياء كثيره ماعجبتني فيه عباتها وطريقة نقابها وكحلها وعطرها الي اشمه من بعيد وياما نصحتها

رديت اخر الليل بعد اصرار منها قالت جتني رساله كذا وكذا نفس الي قريتها اول بجوال زوجي
قلت عطيني الرقم قالت صبر دقيقه وقفلت بوجهي <<!!
حاولت ادق ماترد <بزعم حطيتها ع الصامت
اليوم الثاني الصبح دقيت عليها
عطيني الرقم قالت زوجي مسح الرقم وخزنه عنده ...
قلت دقي زوجك وجيبي الرقم
واحنا نسولف جاها اتصال فقفلت
رجعت دقت قالت واحد قال فلانه وصوته غريب وقفلت بوجهه ..!! رجع ارسل لها رساله ردي يا.... ابيك بموضوع ضروري تكفين... رجع دق وردت وبعد ماخلصت رجعت كلمتني طبعا قبل ترد عليه عطتني بدايه الرقم وعرفته بس يوم رجعت لي

قالت ذا اخوي قلت كيف اخوك ولا عرفتي صوته ..!!!!

قالت ايه كان توه صاحي من النوم

طبعا انا عرفت الرقم رقم كان للنت حقنا نستخدمه للكونكت
ومخزن عندي

قفلنا ع السالفه بيني وبين زوجي لانه حلف ودعى ع نفسه وامه وابوه ماكلمها ولا خاني ابد
فوكلته للي عينه ومره يقولي اعتبريني واحد طاح وانكسرت رجله خلاص ماتتجبر لازم يقعد طول عمره يعرج عشان ترتاحين ؟؟!!!


يعني لاطلعت معاه لا بحق ولاباطل ومدامه دعى وحلف بوقت الاذان انه ماخاني فخلاص طنشت ولا حاولت احسسه انه خاني ولا شي بالعكس احاول اوضح له انها هي تحول تصورك بعيني لعاب وخاين ع بالها يوم زوجها يخونها ان كل الرجال خونه عشان اعطيه الامان والا بداخلي نار يعلمها ربي وحاسه باحساس كل انثى ان فيه ان بس مطنشه بمزاجي

صرت بارده مع زوجي دايم سرحانه ساكته حتى نطلع يحاول يتكلم
يطلبني افضفض اطلع الي بقلبي
اقوله وش فيني
بس اقوله مافيه شي
تغيرت مع زوجي سكوتي وعزلتي عنه كثرت مو بالاهتمام والدلع لا كنت كما انا بس تصريحي له بمقدار حبي قل
يطلبني الي اتمنى اقوله ويجيبه اذا ابي نقطعهم نقطعهم بس ارجع مثل ماكنت

بس ماقدرت ارجع حتى لو انعزل عن نص اهل الارض لان عمق الجرح اكبر من اي احساس اوصفه

وبنفس الوقت قالي نقطعهم قلت لا
لاتسالوني ليش
سبحان الله حكمت الله كانت اقوى الا بيوريني نصري بعيني سبحان ياربي مااعدلك


صرت انزل السوق وكل الي ابي اشتريه ولا اهتم كم يدفع ماصرت اقصر ع نفسي اي مكان اعرف فيه سعادتي اروح له حتى لو زوجي مايبي ااهم شي انا انبسط

هي كانت حريصه ع ادق اخبارنا حتى بالف..... اتمنى فهمتو

وبيوم من الايام قمت الصبح ونظفت بيتي وطبخت وخلاص مابقى شي وباقي فتره ع جيت زوجي من عمله

لقيت بالكومدينه حقته الجهاز الاول مو قديم لا ايام المشاكل فتحته وليتني مافتحته لقيت بالمحفوظات رساله محفوظه بدون رقم والرساله واضح مكتوبه لبنت مو رجال((محتوى الرساله بموضوع كان خاص طلبته هي ))

يارب رحمتك فيني من الي اقراه خلاص هذا الدليل القوي وقريته مو مره ولا مرتين ياناس اتوقع الف مره قريته

صح مو مرسله ولا مستلمه محفوظه بالرسايل ولا واضح لمين بس الصيغه لانثى

بكيت من كل قلبي حسيت بحراره القهر تغلي بقلبي الطعنه حركات كل مشاعر الكره لهم صرت ادعي وابكي حسبي الله ونعم الوكيل حسبي الله فيك

حَتى إنتْ
كنت أظنك غير والله !
بس / خنتــ !
وهان قلبي عندك إنت
والله كنت أظنك غيرهم
كنت أظنِّك كلِّهم !
وبعت إنتــ !
يعني ما فكرَّت فيني؟
إرخصَتْ أحلى سنيني ؟
وضاع عمري ..
وإنت / إنت !
كنت أظنِّك غير والله
كنت أظنِّك خير والله
طيِّبــ
وقلبي اللي حبك ؟
والعيون اللي سهرت لك ؟
والشفاه اللي ندهت لك ؟
والأيادي اللي دعت لك !
كلها كانت سرابــ !
وآخر الرحلهـ إغتراب؟
هذا إنتــ !!

قفلت الجوال ورجعته مكانه

اشوي بعدها جلست افكر

وكتبت لها رساله

حسبي الله ونعم الوكيل فيك فتحت لك بيتي وقفت معاك وقفات ماتوقفها الاخت لاختها امنتك ع بيتي واخرتها تطعنيني بظهري
لكن اسال الله العلي القدير من كل وعزتي وجلالي لانصرنك ولو بعد حين ان ينصرني عليك ويذيقك حر ماذقته منك بحول من الله وقوه

اتصلت كثير بعد الرساله
ارسلت
حاولت تبرر موقفها مو لسواد عيني بل لان من قرأ رسالتي زوجها وليس هي

وصمت جوالي لان زوجي جاني قبل نهايه العمل يطلبني اتجهز نروح نتمشى رفضت ولما ابين له اصر علي وانا رافضه

لاني حاسه الغصه فيني بنفجر فيه بس حاولت امسك نفسي
زوجها ارسل الرساله لزوجي وطلب يقابله
جاني زوجي معصب بيفهم مني ليش هالحركه
قلت كذا بكيفي وصارت مشاكل كبيره بيني وبين زوجي طبعا لملمت الموضوع عشان زوجها لايطلقها ولان بنفس الوقت ماابي تتطلق وتتفرغ لزوجي ويمكن تنقلب علي السالفه ويعاندني وتزوجها < ذي الافكار الي جتني مع ان اثق مليون بالميه هالاشكال مايفكر فيها زوجي

كبرت الفجوه بيننا وكرهته

ماصار يهتم فيني قاسي علي مايسال فيني لو اموت لاهي طالع مو داري عن هو داري
يجرحني بالكلام ويتعمد الاهانه بل والله وصلت للضرب عشانهم
شَدّ حِيَلكْ فَيّ " جِرّوحيُ ~
. . . خَلْ هَذآ الجَرحُ | يَكبرّ ..
إجَتهدّ ؛. . . عَذّبَ ليّ رَوحيّ . . !
طِيحّ
. . . مَنّ هَـ العَينْ اكَثرّ ’

نفسيتي انقلبت مو لشي بس لاني ماقصرت لا معه ولا معها
احساس الظلم دمرني وطعنة الظهر فقدتني الثقه بكل الي حولي



هو يحلف ماخاني
وانا باحساس الانثى واثقه ولان اتحلم باحلام كثيره تحذرني منهم وافسرها ان وحده تحاول تلف ع زوجي وان زوجي مايبي بس من الحلم ان كاسره خاطره
يعني مايبيها ولا يفكر فيها كحب لا كاسره خاطره ويحزن عليها<<مو قلت لكم كنت غبيه لما احكي له عن مشاكلها ولان زوجي حنون جدا جدا حن عليها لما شافني اقسى عليها وكان دايم يذكرني بالله واحتسب اجر فيها اذا احتاجتني

بس لاني كرهتها من قلب ماعاد ابيها كانت تجي بيتي ومن تشف شي يعجبها تنادي زوجها توريه عشان يجيب لها مثله والا تطلبني بكل قوة عين اجيب لها والا توصي زوجي يقول لزوجي ويجيب لهم حتى لو هو غالي..!!!
مرت الايام وبكل جمعه مع اهل زوجها تشككني بزوجي وتسب زوجي قدام الكل وتقول زوجك من تحت لتحت بس انا نايمه عنه <لاتعليق
كنت ارد عليها اقولها خليه من تحت لتحت اقلها احسن من الي يخون زوجته بكل قوة عين ولا مهتم فيها

مع الايام كرهت روحتي لها ومره مره قللتها

طبعا من بدات الازمه ومن اول من انكشفت السالفه لجأت للركن الشديد اصلي اخر الليل قبل الفجر بساعه اقوم وانطرح بين يد ربي وابكي بكاء مرير
اقسم لكم بالله كنت اسولف ع ربي وانا ساجده زي مااسولف لكم اشكي له همي وابكي وادعي عليها ان الله لايميتها الا قد ذاقت حر ماذوقتني من غير زياده ولا نقصان واشوفه بعيني هالنصر

كنت اقرأ سورة البقره يوميا وادعي ربي كثير واستغفر بكل وقت واتحرى اوقات الاجابه حافظت ع الاذكار والسنن الرواتب وصلاة الضحى وادعي بكل حزه وانا ابكي واطلب اشوف نصري قريب ويفرق بيننا وبينهم كما فرق بين المشرق والمغرب

وادعي ربي مثل مااحرقت قلبي ان الله يحرق قلبها

لانها بجلسه قالت لي ليش ترسلين هالرساله لي انتي ع بالك انا اخونك مع زوجك<ياقوة العين قلت لا اعوذ بالله انتي عندك زوج استغفر الله وش هالهباله <سبحان الله ربي عطاني صبر وبرود قدام الكل

بس بيني وبين نفسي ابكي بكاء الطفل وادعي واستغفر لان حجم الالم كبير ومايعرفه الا الي ذاقته
طبعا علاقتنا مره تذبذبت

تدق الف مره ولا ارد وبعد رسايل وترجي ارد تطلب اجيها واعتذر باي شي

الين جاء يوم
وانا اصلا كنت احلم كثير فيها
بس الاحلام تكررت فكنت اقول اكيد شكلها فيها شي ويمكن تدق قريب
سبحان الله بعدها بيوم دقت واصرا ارد رديت وقلت لها حلمت فيك تبين تعلميني شي بس قمت قبل اعرفه

استغربت من كلمي وقالت فعلا زوجي صدته يخوني وصارت مشكله وطلقني
بس بالليل اعتذر ورجعني
لا اله الا الله مااعدله بكثر ماحسيت بنصر ربي بكثر ماكسرت خاطري

وطلبت اجيها بيتهم من بكره بس اعتذرت لارتباطي مع اهل زوجي وع اساس بعدها بكم يوم اجي ع فضوتي

لان الي بغيته صار الرجال انفصلو وذا كان اهم شي عندي
لان زوجها ضرني بعد

قاعد ورى زوجي يزين له الشات والخرابيط بالنت
وبعدها جاب لزوجي ارقام بنات ويعطي زوجي جواله عشان يكلمهم
عطى زوجي رقم خطابه تزوجه شرعي والا مسيار
عرض وحده من خواته ع زوجي من غير مهر ولا شي...<<حاولت استوعب بلاويه مو عارفه وش بيني وبينه حسبي الله ع الرجال الي اشكاله

بس لاني كنت احلم احلام كثيره فيهم او بصراصير وكانت تتفسر ان فيه ناس حاسديني انا وزوجي ابعد عنهم

حتى اختي حلمت فيه وبنفس الشكل ووصفته لي بالاسم جاها بالحلم وفسرته انه حاسد لنا

المهم بعدها انقطعت عنها تقريبا شهرين
وبعدها اتصلت كثير واصرت طنشتها يومين وعقب رديت بس مااصرت ارد عليها بالرسايل

كلمتها وطلبت اجيها ضروري عندها مشكله وتبيني ضروري

رحت لها

وسبحان الله
كيف ربي كريم
نفس الاحداث ونفس الطعنه جتها من وحده كانت تدخلها بينتها وتامنها عليه وتدري عن مشاكلها مع زوجها وتشتكي لها عن خيانة زوجها
ومادرت انها هالانسانه الي امنتها ع بيتها هي الي عرفت زوجها ع البنت الي كان زوجها يخونها معها

لما جلست تعلمني وكيف انها تامنها ع زوجها وتعطيها من ملابسه وتتبادل معها اثرها سعت تعرف زوجها ع صديقتها
وتقول كنت اشكي لها ان زوجي يكلم وتقولي طنشيهم اهم شي صحتك ولا عليك منهم
مادريت انها صديقتها الي يكلمها زوجي وهي السبب الي عرفهم ببعض وتدري عن علاقتهم من الاول
طبعا هي درت بعد مافتشت جوال زوجها وكبرت المشكله ووصلت للهيئه البنت اعترفت وزوجها بعد اعترف وطلبها تطلعه من هالورطه
وانا اسمع لها وللي صار لها واقول فعلا الدنيا دواره ماادري اتشمت واقوله كما تدين تدان والا اسكت وهي عارفه لاني قلت لها بعد ماقالت
سامحيني والله اقول زوجي كل الي صار لنا حوبة فلانه <تقصدني
قالت ليه انا وش دخلني بس شفتي كيف طعنة احد تثقين فيه وتدخلينه بيتك موجعه
وانا عندها وتسولف صارت مشكله كبيره وزوجها فيه وانفضح وانا اسمع باذني كلامهم ومشكلتهم

وبعدها اتصلت ع زوجي وركبت السياره واحس بنصر من ربي مو طبيعي وحمدت ربي وشكرته لانه نصرني وورني نصري

قلت لزوجي لانها قالت قولي لزوجك وشوفي وش موقفه< اصلا من غير ماتوصي
قلت له ولا علق بكلمه بس قلت له الحمدلله ربي ورني نصري ع من ظلمني قالي وش قصدك قلت ولاشي بس حرقت قلبي كثير وربي رجعها لها

الحمدلله مرت سنين ع القصه للحين احاول اتجاوزها وادعي الله يصرف عن زوجي النساء الضالات المضلات صويحبات يوسف عليه السلام استودع ربي دايم زوجي قلبه وبصره واذنه وتفكيره وشهوته ويديه ورجله من فتن الليل والنهار ومن اصحاب السوء والنساء ولايجعل له حظ ولا نصيبا

كرهتهم من كل قلبي
حاولت كثير ترجع المياه لمجاريها عن طريق صديقات يربطونا ببعض وانها مو عارفه ليش قطعتها بس ارد عليهم ماعاد ابيها ابعد ع الشر وغني له
ماعاد ابيه ولا ابي زوجها ماجاء من وراه الا المشاكل

الحمدلله حياتنا الحين للافضل باذن الله ولكن ينقصنا زينة الحياة الدنيا وكمان اتمنى تدعون ان يفرق بين زوجي واي احد من طرفها

انا كتمت كثير ماكتبته لكم واحداث كثيره جدا

اي استفسار انا حاضره..
دعواتكم ان يرزقني الله بمن يقر عيني من الذريه الطيبه حتى ارضى
وان يهدينا وان يبعد عن الحسد والحساد وان يشفيني انا وزوجي مما ابتلينا به
ولازلت اصر الله لايحلل من تنقلها او تنسخها الله يجعلها خصيمتي يوم االقيامه..