السلام عليكم بنات اخباركم
ان شاء الله بخير
انا قررت بعد تفكير عمييق اني اكتب سالفتي او قصتي عن النصيب والاقدار اللي مكتوبه للانسان
بعد ماشفت كذا موضوع للبنات متضايقين من اللي يصير لهم
البــــدايه
من وصل عمري تقريبا 16 سنه جاتني بنت خالتي وقالت لي ان فلان يبيك زوجه تقصد اخوها طبعا انا ماصدقت خبر
وطرت من الفرحه لانه كان اجمل شباب العائله ومافكرت بشئ ثاني لاني بوقتها كنت صغيره ماهمني غير الشكل
فقلت لها اذا خلصت دراستي ان شاء الله وتكون اختي اللي اكبر مني قد تزوجت وسكت انا وهي عن الموضوع
لبعد الدراسه وكل ها الفتره كل مارحت لبيت خالتي كنت احس انه بيصير بيتي واذا جيت ارقى مع الدرج اقول
في نفسي هاذي بتكون غرفتي ان شاء الله مع فلان واذا جاء لبيتنا انا اللي اسوي الشاهي والقهوه والعشاء وكل
شئ طبعا لازم اسويها لزوج المستقبل
ومن ها الاحلام وصلت لثاني ثانوي وتزوجت اختي بعدها
على طول جاء ناس خطبوني لولدهم قالت لهم امي البنت توها تدرس وانا كنت مااتوقع اني اتزوج واحد غير ابد
وكنت واثقه ان اهلي ماراح يعترضون وماراح يجبروني على شئ انا مابيه وكنت اشد حيلي با الدراسه بهاالفتره
انا ماعاد سمعت عنه اي خبر وابتعدت شوي عن بنت خالتي وعن بيتهم لنفسيتي من بعد زواج اختي المهم
في يوم من الايام صحيت من النوم وكان يوم خميس على طول دخلت علة امي المطبخ بساعدها في الغداء
وجلست اسولف معها قالت لي خالتك تسلم عليك وفلانه تسلم عليك اللي هي بنت خالتي ((طبعا امي ماتدري
ان ولد خالتي يبيني)) قلت لها من متصل قالت ان فلانه متصله وسئلت عنك واني قلت لها انها نايمه قلت خلاص
بعدين اكلمها وكملنا سواليف انا وامي ومن بين السواليف قالت تعرفين فلانه الفلاني قلت مين قالت هذيك البنت
اللي شفنها ببيت خالتك قلت ايه وش فيها قالت انها مسويه علاقه غراميه مع فلان ((اللي هو ولد خالتي)) وان فيه
ناس شافوه عند بيتهم وشافوها طالعه وركبت معه قلت بوقتها مااستوعبت اي شئ من اللي قالته امي حسيت
بمويه حاره انكبت علي من راسي الى اصابع رجولي صارت كلها نار تغلي قلت لامي متأكده فلان قالت ايه قلت انتي
من قالك السالفه قالت خالتك اللي هي امه متصله تشتكي وان ولدها انفضح وتدعي عى اللي فضحه انا خلاص
مادري بوقتها وشلون كنت واقفه وكلم امي ((بس انا قويه وماابين شعوري)) مرت ثلاثه ايام تقريبا ورجعت بنت خالتي
اتصلت علي وتكلمني واكلمها انا عااااادي ولاكن صاير شئ((مسويه ثقيله)) وانا اغلي من جوى ابيها تختصر كلامها
وتعلمني السالفه وتقولي صح واغلط حلم والا حقيقه اللي سمعته هي تسولف وانا احاول اتسمع ابي اشوف فيه
احد بجنبها مهتم يبي يعرف اخباري بس للأسف ماكان عندها احد
المهم بعد ماخلصت سوالف قالت لي ماسمعتي شئ قلت وشو قالت السالفه اللي منتشره قلت اللي عن فلان
قالت وصلك الخبر قلت ايه وانتي ماتبين يوصلني الخبر والاكيف قالت لابس معي رساله شفهيه لكي قلت وشي
قالت انه يقول(وسوسة شيطان نزوه وان شاء الله ماتتكرر) قلت لها طيب هي اول مره يصير كذا قالت مالي دخل
ماقدر اجاوبك الابعد مااسئله قلت يعني صايره قبل كذا ((اخته هاذي كانت مستودع اسراره)) قالت انتي الاصل
والباقي تسليه قلت اللي يسوي ها الاشياء مستحيل يتركها واللي بيتسللى ببنات الناس يجي له يوم لبناته
والحين السالفه صارت فضيحه مو شئ بيني وبينك
وبينه الحين وصلت للبيوت كلها قالت الوقت ان شاء الله بينسيك قلت مااتوقع
مرت الايام ونجحت من ثاني ثانوي الى ثالث ثانوي وفي يوم كنا جالسين نتقهوى انا وامي وابوي واختي الل متزوجه
كان ابوي يتكلم يقول اذا تزوجت رموشها بسوي قلت يابوي لاتجيب طاري الزواج الا بعد مااشوف اسمي في الجريده
وناجحه وقتها سوى اللي تبي قالت امي وهي تضحك واللي يبي يتزوجك وبيخليك تدرسين انا تفاجئت من كلام امي
قلت ومن هذا قالت فلان وخالتك تقول بنخليها تدرس ومالها اي شغل في البيت ((مااكذب عليكم وقتها طار قلبي من
الفرحه ومانمت ساعتها من كثر التفكير )) قلت يايمه اذا تخرجت من الثانوي كلميني انا ماتعجبني فكرة زواج ودراسه
قال ابوي الله يكتب لك اللي فيه الخير((قلت في نفسي أأأأأأأأأأأأمين))
تخرجت من الثانوي بنسبه حلوه وقدمت على الكليه وكان يوم في الاجازه وكنا سهرانين في بيت خالتي وكنا احنا
البنات جالسين مع بعض وامي وخالاتي والاولاد مع بعض وفجأه دخلت علينا خالتي اللي هي امه وقال لبناتها
ان فلان عطاكم الضوء الاخضر انكم تدورون له على عروس ((قرر يتزوج)) بنت خالتي على طول ناظرتني وضحكت
انا بوقتها امتزج شعوري فرحه بخوف بتردد مادري وصار لي بوقتها ((مادري انا المقصوده او وحده غيري))بعدها تقريبا شهر كلموا امي وكلموني مره ثانيه ووافقت وقلت خير الخطائين التوابين يمكن تاب وعقل واكيد هو
شاريني والا كان ماجلس ينتظرني الى ماتخرجت من الثانوي اللي صار طبعا خطببه عاديه مابعد جاء ابوه ولاشئ
بس كلمت خالتي امي وامي كلمت ابوي واخذوا رايي ووافقت
بس ربي ماكتبه من نصيبي مره كنت اناوهلي عندهم بالبيت ((بحكم نتجمع كل اسبوع ببيت وحده من خالاتي ))
قالوا خلونا نشوف شريط الكشته اللي طلعوها واكنت مسحوبه من الكاميرا على شريط فيديو قالت اخته الكبيره
يالله معي نجيب الفيديو من فوق رحت انا واختي وبنت خالتي نجيب الفيديو وكان بغرفته ويوم دخلنا لقيت على
درع مكتوب عليه عبارات حب وغزل وعلى جنب مكتوب اسم بنت ((البنت نفسها اللي انفضح معها)) سكت وطلعت
والحمدالله مااحد انتبه اني شفتها لاني بوقتها قررت على طول اني انساه
وبعد مارجعت امي وفتحت معي الموضوع قلت يمه انا استخرت ومابيه خلاص ((والى بكره ماحد يدري ليش انا هونت))قلت لهم مابي اتزوج من الاقارب وماحد غصبني وخلوني على راحتي
عشت حياتي ودخلت الكليه وولدت اختي جابت ولد عسل مثلها وسمعت كلام ان فلان يبي يتزوج وان اهله يدورون له
عروس وانهم لقوا له وحده بيضاء وحلوه ((سويت نفسي اني مو مهتمه)) واالي يمرض زياده صارت العروس تدرس
معي في نفس الثانويه اللي درست فيها تجهزت لزواجه وفصلت الفستان ورحت الكوافيره وتكشخت اخر كشخه
ورحت ورقصت وفليتها((بي من داخلي اموت عشرين مرره واقول ممكن اني اكون انا العروس)) وخلص الزواج ورجعت
للبيت وغيرت ملابسي ونمت وصحتني امي الظهر وقالت لي فيه عشلء ببيت خالتك قومي اذا بتتجهزين ((طبعا نمت
وانا متضايقه ومابكيت ولاصارخت وضغطت على نفسي وفرحت)) صحيت وانا حرارتي مرتفعه مررررره ومااقدر اتكلم
حسيت ان اللوز بتطلع من حلقي من كثر ماهي متورمه قالت امي خلاص خذي علاج وراجعي نامي قلا لابروح
((خفت يقولون ايه تبيه وندمت علشان كذا غارت وماجات تشوف العروس)) بالعكس قمت واخذت علاج ولبست
وكشخت ورحنا لهم من العصر من بدري واجهز مع البنات القهوه والشاي والعصير ومسويه عاااااادي ((وانا الحراره
بتموتني)) ورقصت وضحكت مع العروس وجلست اسولف معها عن البنات ((معي بنفس الثانويه)) وخلص اليوم
مر على زواجه 7 شهور وصارن احداث كثير مابي اذكرها بس باختصار قالوا فلان طلق فلانه طيب ليش طلقها
قالوا انه يقول ماحبيتها يعني ماكملت معه الا سبع شهور ((والله العظيم زعلت عليها زعل كثيررر لانها بنت مؤدبه و
حبوبه و فرفوشه بس نصيبها انها خذت واحد مثل كذا)) كلمتني بعد طلاقها مرتين تقريبا وكانت تشتكي وتقول انه
يجلس يكلم بنات ويغازل وانا عنده واذا كلمته قال ينكر واني البس له واتكشخ والحركات وانه يعطيني ظهره وينام
((وعلى ذمتها تقول انا الى الحين بنت)) بعد سبعه شهووور
بعد طلاقه جلس سنتين وبعدها قرر يتزوج ورجعت بنت خالتي اللي هي اخته وقالت لي ((طاح من عيني من بعد
اللي سواه مع بنت الناس)) قلت اسفه مااخذ واحد مطلق قالت انتي تعرفيت الظروف قلت اسفه ماخذ واحد مطلق
بها الفتره كنت انخطب وبعد كم خطبه جاء نصيبي اللي هو زوجي الحين الله يخليه لي ويطول بعمره
وصارت الخطبه الرسميه بعدها بسبوعين سمعت ان فلان خطب فلانه وحده نعرفها اصغر منه ب15 سنه بس اسمها
مثل اسمي وتزوج بعدي بثلاث شهور والحين عنده ولد وزوجته احبهاااا مررره وطيوبه بس ماارتاحت معه تسولف معي
تقول انه مايعرفها الا كل اسبوعين مرره وانا عصبي وتقول اذا صاح ولدي شالني انا وهو للغرفه الثانيه وقفل عليه
الغرفه وزوجته مسكينه من يوم تزوجت وهي صايره عووود نحيفه مررررررره وتقول انه يزعل ويكشر بوجهي من دون
سبب واذا سئلتها صارخ بوجهي تقول اني اجلس اكلم خواتي وانا اصيح ((الله يهدي سرهم))
=========================================================
وانا الحمد الله مرتاحه ومبسوطه (( الحياه ماتمشي الا بمشاكل)) مع زوجي واحمد واشكره الف مره انه هو اللي كان
من نصيبي
اتخيل لو انا موافقه عليه ومتزوجته الحين وش صار لي يمكن اكون الزوجه الاولى اللي مطلقه ((يعني سببت تفرقه بين
امي وخالتي او اكون الزوجه الثانيه الغير مرتاحه ومستقره معه ))
ملاحظه انا تزوجت زوجي شبه مغصوبه عليه لاني ماكنت مقتنعه والحين ادعي لهم كل يوم لانهم ضغطوا علي
وتزوجته
الهدف من اني كتبتها ونزلتها هنا
لاتزعلين ووتضايقين اذا راح منك الشئ يكون فيه شئ احسن منه في الطريق
يمكن اللي انتي تبينه يكون لك شر ويمكن اللي انتي ماتبيه يكون لك خير من الف شئ
((وعسى ان تكرهوا شيئا وهو خير لكم)) تأملي في الايه جيدا
بنات اقسم بالله ان صدق وحقيقي وتركت احداث كثييره ماكتبتها
رموشهاظلال @rmoshhathlal
محررة
يلزم عليك تسجيل الدخول أولًا لكتابة تعليق.
صادقه والله :(
سبحان الله .. بس برضه النفس طماعه ما تحب اللي مصلحتها
وعلى بالنا تفكيرنا هو الصح ... وفعلاً. .. الله هو العالم الخير وينه ..!
صراحه حبيت اسلوبك في الكتابه وقصتك فيها عبر كثييييييييير
وربي عالم قد ايش اثرت فيني
جزاك الله عني الف خير
سبحان الله .. بس برضه النفس طماعه ما تحب اللي مصلحتها
وعلى بالنا تفكيرنا هو الصح ... وفعلاً. .. الله هو العالم الخير وينه ..!
صراحه حبيت اسلوبك في الكتابه وقصتك فيها عبر كثييييييييير
وربي عالم قد ايش اثرت فيني
جزاك الله عني الف خير
الصفحة الأخيرة
تسلمممممممممممممين ياقلبي:27: