وعلى كُل ماكتب لنا ، الحمدلله !

السلام عليكم ورحمة الله وبركاته ،
عضوه جديده في عالم حواء , غرضي من الكتابه فضفضه ودعاء منكم في ظهر الغيب ❤،
اولاً اعرف بنفسي عمري 21سنه بداية قصتي انخطبت من قرابة بعيده لمده 4 سنوات وبعدها ملكة وزواج ولله الحمد رجال يعجز لساني عن وصف اخلاقه وحنانه واحترامه لي ، والله ماجرحني عمره بكلمه ولا غلط علي ولا قلل من قيمتي طول حياتي معاه كنت بسعاده وتفاصيل ايامنا حلوه هو عسكري ووظيفته اساساً على الحد الجنوبي من قبل الحرب والظروف الي صارت ، سافرنا قبل ماتبداء المشاكل واستانسنا كثير كثير ، وقطعت علينا السفره اتصالهم من العمل ب انه لازم يستلم لحد غير معلوم ، رجعنا ديرتنا ورحت عند اهلي ومن ذيك اللحظه لا ليلي ليل ولانهاري نهار طول الوقت شايله هم وافتح ع الاخبار والجوال بيدي واصحى من عز نومي عشان اتطمن لو برساله واغلب الوقت الشبكه معدومه عنده ، جاني بعد 21 يوم فكوه لمده 24 ساعه ومشوار حتى يوصلني ممكن 3 ساعات وياحلوها من مفاجاءه لما جاء حسيت روحي ردت لي حسيت بمعنى الراحه والحياه ، حضنته وياطهارة حضنه وهو جاييني بالبدله حامي الوطن وبعز التعب يدور راحته فيني ، كان يفهمني من عيوني اذا حزينه او فرحانه عوضني عن كل شي ممكن انا خسرته ف الحياه ، محظوظه جداً لانه شاركني الحياه ولاني كتبت من نصيبه ، وانا افنيت كل روحي وكل جهدي عشان اسعده وهو ماقصر سوالي كل شي يقدر عليه عشان يسعدني والله كان نعم الرجل اعجز اني اوصفه ، استمر دوامه اسبوعين استلام واسبوع يسلم يجيني كان دوامه يوميا 12 ساعه يعلم الله قد ايش تعب وينام ويصحى على القنابل والطلق كان يريح 12 ساعه ويقطعها 3 ساعات جاي عندي و3 ساعات عشان يرجع بس لانه مشتاق لي ويروح سهران ويكمل استلامه ، حزن ع صاحبه الي استشهد كثير ف رمضان الي فات قعد يفضفض لي عن حزنه على فراقه ، واستمر هذا الوضع 7 شهور وبعدها رزقني الله وحملت بعد سنه وشهرين زواج وكان حملي الشي الوحيد الي ناقصني وتكتمل حياتي ، فرح كثير كان ف نفس الليله بيطلع يداوم الفجر ، مانام من كثر الفرحه واحنا جايين من المستشفى صدم ب السياره من الفرحه كنت اقوله بشويش خفف سرعه الحين انا حامل ضحك وقال خليه يطلع رجال واربيه ، سهرت ذاك اليوم ماجاني نوم معاه وعلى الفجر جهزت اغراضه وحضنته وجلست اوصيه مايغامر بنفسه ويهتم ف نفسه ويلبس اللبس الي ضد الرصاص لانه مايسمع الكلام ودايما مغامر بنفسه ، وهو يضححك ويقولي طيب ، ماكنت احسبه الوداع الاخير بيننا ولا اليوم الاخير معاه ، بعد 4 ايام بالضبط وانا ف الكليه دقت امي تقول جايه ابي البنك وبمر عليك انا واخوك وكل شوي تتصل ، اخوي يتصل ، ابوي يتصل قلت بخلص اختبار وبطلع قفلت الجوال وقلت لصديقتي كان مصيبه صايره ، جلست ادق ع زوجي مايرد اخر رساله لي 9 الصباح يدعي لي بالتوفيق وانا مداومه ، طلعت ل اهلي الساعه 1 وكان اخوي وامي وابوي جلس قلبي مقبوض وابكي وانا ساكته وامي تقولي اشبك اقولها زوجي مات ! قالت احد قلك شي؟ انا هنا تجمدت الي كنت خايفه منه طلع صدق ، سالتها ي امي استشهد والا مصاب ؟ قالت مدري وتبكي بصوتها كله قلت لاتأمليني انه مصاب قولي لي الصدق قالي ابوي اذكري الله وقولي لااله الا الله والله اني ودعته ووجهه كانه البدر قلت طيب كيف مات حكى لي ايش صار وانه ب الاسعاف ورانا رايحين لبيت اهله ، تبلدت ماعرفت ابكي حسيت اني بحلم قلت اننا لله وانا اليه راجعون تذكرت ان الصبر عند الصدمه الاولى والحمدلله صبرت ومسكت نفسي لما وصلت عند اهله حضنتهم وانهرت كلهم يدرون من بدري حتى صديقات الجامعه الا انا لانه استشهد 10 الصباح وخلوني لما اختبر الساعه 1 ورجعت كلهم منتظريني ، ودعته وكل الي قلته الله يصبرني ع فراقك وبكيت وحضنته وابوي خرجني ، وجهه كان بياض مو طبيعي وواضح مرتاح لدرجة ربي ربط على قلبي رغم صعوبة الموقف اودع زوجي ب الكفن وانا اتوحم ولكن الحمدلله ان الله ماينسى عباده ، تحملت ظروف العده 9 شهور كملت دراستي رغم صعوبتها وصعوبة النقل للكليه ، كان جنيني يتغذى من دمي ويقويني للحياه ، الحمددلله ولدت ورزقت بولد ، نسخة من ابوه والله يجعله على ابوه بكل شي يارب ويعوضني فيه ويجمعني انا وابوه بالجنه وتكتمل افراحنا فيها ، اخيراً لاتنسون رجل الدين والوطن من دعائكم ❤❤