مساءكم ورد وجوري
هذا أيضاًموضوع قديم لي أهديه للمهتمات بالأنماط(النمط الجنوبي الغربي)...
بعد كتابتي لموضوع (حوار صحفي مع شمالي شرقي)..أشاروا بعض العضوات علي اجراء حوار مع الجنوبي الغربي..ولكن من باب التغيير ووجود الخيال الواسع الذي لاينتهي...غيرت الديزاين وقلت بلاش حوار بأقلبها قصة!!(من غير أجزاء موقف بس)..
كان ياما كان..في هذا الزمان حرمة متزوجة واسمها (إلهام)..
وعندها أخ اسمه مازن وزوجته اسمها وفاء..
تصير بينهم هواشات حالهم حال أي زوجين فينقلب عش الزوجية إلى عِشة دجاج وناقر ونقير!:22:
في يوم اتصل مازن على أخته إلهام وقال لها إنه يبغى يزورها هو وزوجته..رحبت إلهام فيهم وماهي إلا سويعات وباب البيت يدق وحضروا مازن ووفاء..
لا حظت إلهام إن الصمت يسود بينهم والتوتر يعم الأجواء والوجوه مكفهرة..فقطعت حبل الصمت..
الهام:وَحـِــــــــدُوه!!
مازن:لا إله إلا الله..
أما وفاء ظلت محتفظة بصمتها..
مازن(بعصبية يكلم وفاء):وَحِدي الله.. وإلا انتي هذا طبعك لايمكن تتكلمين بشي مفيد؟ماعندك إلا نقار وصريخ؟!
وفاء:وأنا ليش صرت أصارخ؟ من زود ماأشوف ياحظي!!
إلهام:ياجماعة الخير..علموني وش السالفة؟
وفاء:السالفة..أخوك هالجنوبي الغربي جاب لي الضغط والسكري!
إلهام:ياشيخة احمدي الله ماعندك شمالي شرقي مثل اللي عندي!!!
مازن(وهو فاغر فمه):قطع الله أباليسكم من نسوان! وشهو اللي شمالي شرقي جنوبي غربي؟!سويتونا خرايط وقسمتونا؟!احتلال هو والا استعمار؟!
إلهام:لا ياخوي المسألة ومافيها أنماط..عشان نفهمكم أكثر..
وفاء:وليتنا فهمناهم!الواحد فيهم مو فاهم نفسه أصلاً عشان نفهمه إحنا!:eek:
مازن:انتي تحطين لسانك بحلقك وتنطمين!
إلهام:لاحول ولاقوة إلا بالله..بطريقتكم هذي عمرنا ماراح نفهم شي..يلا علميني ياوفاء اش مزعلك بـ مازن؟!
بدأت وفاء تتكلم وقاطعها مازن..
إلهام:بس يامازن!جايك الدور..ذا ليدي إز ذا فيرست!!كملي ياوفاء..
وفاء:أخوك المصون بصريح العبارة أستاذ في التسويف والتأجيل وماجستير في المماطلة والاتكالية!
مازن:وشفيها؟الدنيا موب طايرة!إنتي اللي بسم الله علينا مشفوحة ومستعجلة بكل شي!!
وفاء:لا..والأدهى والأمر البرود اللي ذابحني فيه..ماخذ الدنيا سهالة ماعنده احساس بالمسئولية كل ماطلبت منه طلب قال:خلي أهلك يودونك..خل أخوانك يجيبونك!ملزومين فيني هم؟أجل ليش ماخذة رجال أنا؟ظِل حيطة؟!!!
مازن:ويعني ماخذة رجال..أحد قال لك إني سواق؟!
وفاء:هاه؟أجل أخواني السواقين؟
مازن:وأنا مو من حقي أرتاح؟أنا لو أطاوعك أصلاً كان مانمتي بالبيت ماغير تفرفر بالشوارع!!
وفاء:لاياشيخ؟اللهُ أكبر عليك!أنا وين ووين لاطلبت منك شي لأني أدري إنك عجَّاز ومابتنفعني!
مازن:أنا عجَّاز وماأنفعك بـ شي؟متى يالكذوب؟
وفاء:هيا حط عيني بعينك..لمبة الحمَّام لها شهر مختربة صلحتها؟!وحمام الضيوف محتاج سِباكة ضبطته؟!والنت انتهى اشتراكه من 3أشهر جددته؟!وفواتير التليفون متكومة عندنا سددتها؟كم له مقطوع إلى الآن؟!ومكيف الصالة يبخ هواء حار وذبحنا الحر صلحته؟!!
مازن:ياحرمة غثيتيني..قلنالك بنصلح كل شي!
وفاء:متى؟لاخمجنا أنا وعيالي بالشقة؟اتقي الله فينا خِسنا بـ ذا الحر!:angry2:
إلهام(وهي تبغى تهدي الجو):يمكن الله يهديك ماتختارين أوقات مناسبة تكلمينه فيها؟!
وفاء:أي أوقات وأي خرابيط؟كل ماقلت له شي يقول دبري نفسك!!
مازن:وأنا صادق.ليه ماتدبرين نفسك؟كل شي ترمينه بظهري أنا؟
وفاء:ياشيخ حرام عليك صرت مضحكة للي يسوى واللي مايسوى!تدري خواتي لاشافوا سواق زميلتي يوديني ويجيبني والحارس يجيب لي المقاضي من البقالة وش يقولون؟!
مازن(بـ تذمر):وش يقولون؟!
وفاء:يقولون لي..وش هذولا متزوجتهم مسيار؟!!
إلهام:هههههههه:hahaha:
طالع فيها مازن بنظرة صارمة!!!
إلهام:استغفر الله!!!
وفاء:وبصراحة يامازن انت شخص مو طموح!
مازن:ليش؟وشهو الطموح بنظرك؟
وفاء:يعني خذ نظرة على اللي حواليك..يطورون نفسهم بأشغالهم يفكرون بمستقبلهم يسوون شي لبكرة..لكن إنت أبد يومك عيدك تحب تستمتع باللحظة اللي إنت عايشها بس..وبكرة؟خَلَفَ الله على بكرة!!
مازن:ماقلت لك إنك حرمة مشفوحة طايرة على الدنيا؟هالحين إحنا عايشين اليوم نفكر ببكرة ليش؟!يالله حسن الختام من عندك!
وفاء:مو هذا اللي جايبك وراء!! لين هالساعة ماتعرف تتخذ قرار حاسم بحياتك دايماً متردد..تنتظر مني أسوي كل شي!
مازن:ياشيخة طِيري!أنا لو متكل عليك كان ضعت من زمان!الحمدلله اللي سخر لي ربع يفهموني ويحبوني!
وفاء:آهااا..كِلش ولاربعك اللي جايبين لي الهم والغم بحياتي..لاطلبت منك مشوار تتسدح وتتبطح وتقول أنا تعبان..بس هم أول مايتصلون عليك ويقولون تعال.تطقك النخوة و تقوم مثل الذيب!!
مازن:صدق إنك صغيرة عقل!هالحين تغيرين من رِجال بشنبات؟إنتي طلعاتك كلها أداء واجبات اجتماعية أومقاضي ..لكن أصحابي غير..كل جمعاتهم فلة ووناسة وضحك وفرفشة..أما انتي طالعي بروحك ماعندك غير هاللسان اللي يقطر سُم!
وفاء:أنا لساني يقطر سم؟أساساً انت تتكلم معاي؟كل طاقتك موفرها لـ ربعك تثرثر وتسولف أما أنا تتجنب الكلام معاي!
مازن:طبيعي..إنت كل كلامك نقاش وجدال وأنا ماأحبه..
وفاء:وماسألت نفسك ليش إنت تكره الجدال والنقاش؟
إلهام:ليش؟
وفاء:لأنه يكره المواجهة يحب يتهرب من الواقع..ويدري زين إن النقاش معاه بيوضح له نتيجة تصرفاته وهو عاد مسوي نفسه ملك مايحب أحد ينتقده!
وارتفع صوت أذان العشاء والنقاش محتدم!
مازن(بعصبية):عن إذنكم أنا بأروح المسجد أصلي العشاء..
وخرج وكملوا إلهام ووفاء النقاش..
إلهام:يختي حرام عليك..بالهداوة على زوجك ماخليتي فيه حسنة!
وفاء:يستاهل!من حر مافيني..تصدقين ياإلهام إن أخوك هالبارد جايب لي البلا في البيت هو مزبلة متنقلة وأنا ماغير أشتغل له مكنسة متحركة؟!!
إلهام:هههه وش يعني؟
وفاء:أقول لك ماعنده إحساس يرمي بملابسه هنا وهناك وينثر أوراقه بكل مكان وضايع مايعرف الترتيب..كل دقيقة وأنا ألقط وراه..ويوووه من كلامه..كلامه أكثر من أفعاله!هو لو يشتغل قد مايتكلم كان إحنا بخير!
إلهام:معقول كل هالعيوب بأخوي؟!مو يقولون الرجل الجنوبي رجل السلام والتواصل؟!
وفاء:إلا رجل البرود والتواكل!
إلهام:ياشيخة شي أهون من شي..انتي لو عايشة مع شمالي شرقي واش كنتي بتسوين؟ماغير بيسلكك بلسانه وانتقاداته ليل بنهار!!
وفاء:على الأقل الشمالي الشرقي رجل يتحمل المسئولية..مو أناني ويحب نفسه مثل الأستاذ مازن!!
إلهام:صدقيني..مافي إنسان كله كامل ولافيه إنسان كله عيوب..الناس مزيج بين هذا وذاك..انتي بس حاولي تعصرين مخك شوي وتطلعين حسناته..
وفاء:شوفي الحق ينقال..أنا مابأظلمه..هو رومانسي وحنون وعاطفي وهادي بس تراه مزاجي..مايحب الحرمة تلزق فيه يحب هو يجري وراها ويموت بالمدح!
إلهام:زين استغلي هالفرصة وامدحيه ليــن راسه ينطح السقف!
وفاء:وليش النفاق عاد؟!ماأحب أمدحه إلا إن كان يستاهل!!!
إلهام:بس؟ هي هذي ايجابياته؟
وفاء:لا هو ماشاء الله زعله بطيء ورضاه سريع..بس يقهر لما يكون عنده ضغوط أسرية أو بالعمل تلاقينه يعصب علينا من أتفه شي..وإن زعل الله لايوريك لايمكن يعتذر حتى لو هو غلطان فيه مكابرة عجيبة!!
إلهام:ياشيخة..أغلب الرجال كذا!
وفاء:بس والله يفقع مرارتي أحياناً يحب ينكِت ويستخف دمه وأنا معصبة!وأصحابه الله ياخذهم حاطهم بالمقام الأول!يعشق يسافر معاهم ولو أقول له خذني..قال:خذاك الموت انثبري ببيت أهلك!
المهم لحظات ورجع مازن..ودق الجرس فتحوا له الأطفال ودخل على أخته وزوجته..
مازن:خير؟انتوا مازلتوا على نفس الموضوع؟جاوبوا يامكفرات العشير؟
إلهام:استهدي بالله واقعد..أبيك تصارحني..اش الأشياء اللي تتمناها من زوجتك؟!
مازن:أولاً:أنا ماأحب النكد ولاالصراخ ولاالصوت العالي..
ثانياً:النقاشات الطويلة والمجادلة ماأبغاها أبد..
ثالثاً:ماتتدخل في صداقاتي وعلاقاتي وحبي للسفر والاستمتاع بكل شي..
رابعاً:ماتعتمد علي بكل شي وتحل أمورها بنفسها..
خامساً:تمدحني وتشكرني على كل كبيرة وصغيرة أقدمها لها!
إلهام:وانتي ياوفاء؟اش تطلبين منه؟
وفاء:أولاً:يترك التكاسل والاتكالية والتسويف والتأجيل..
ثانياً:يعطينا من وقته شوي ومو بس يفكر بنفسه..
ثالثاً:يتحمل مسئولية بيته بروحه..
رابعاً:يهتم بنظافته أكثر...
خامساً:يحاول يتخذ خطوات جادة بحياته مو لابدأ بشيء مايكمله..ويحطنا دوم قدام عيونه..
النهاية!!
ملحوظة:
مو شرط إن كل الصفات أعلاه تنطبق على الجنوبي الغربي..بس كثير منهم يكونون بهذه الطباع..
إذا عندكم سلبيات أو ايجابيات أكثر أتمنى تفيدونا فيها..
وسلامتكم
رماح ردينية @rmah_rdyny
محررة ماسية
يلزم عليك تسجيل الدخول أولًا لكتابة تعليق.
اعشق ارضك
•
الله يسعدك يابعدي..
الصفحة الأخيرة