الله يرحمه ويغفر له

الله يرحمه ويغفر له طبعاً تتوزع على الاخوات والاخوان والام وافضل شيء إسألي شيخ .

للجميع جزاكم الله خير على دعواتكم الطيبه


والله يرحم امواتنا وامواتكم يارب


اختي بنت المشايخي عمره 35سنه




انا لليوم ماقدرت اروح المحكمه مع اخواني اسوي حصر ورثه لاني لازم بشوف بطاقته الشخصيه واسمه على سند ملكية الفيلا وسيارته وراتبه الي بيتوزع لان مالي قلب احس ان بناخذ شي مو لنا .... والله العظيم مالي قلب انا مادري كيف الناس يخلصون اجراءات ميتهم ..... ماينفطر قلبهم انهم بياخذون شي هو تعب وهم ياخذوه بالساهل ؟


اليوم اخوي الكبير جاب لي كرت المرحوم مال حسابه بالبنك الي ينزل عليه راتبه وبطاقة الصراف ماله يعطيني اياهم عادي كأنه مو لأخوه الميت انا طاح قلبي برجلي وانا امد ايدي استلمهم ومسويه عادي ... قلبي للحين يرجف ....... يقولي خبيهم عندك بنحتاجهم للمحكمه بيشوفون راتبه حق من


معقوله بناخذ حلاله ؟؟؟




يابنات بيته الفيلا الجديده توها مخلصه باقي بس دخول الكهربا باني بالحوش ملحق شار علي اخوي الكبير نأجره في ثوابه والكبير تسكن فيه امي لان بيتها قديم وللحين مابديت ببناء بيتها مع اني خلصت الخريطه الحمدلله

كنت اتمنى بيت كبير نجتمع فيه مع امي الي موراضيه تسكن عندي او عند اخواني والحين صار فيه بيت واكبر من الكبير فيلا دورين وملحق وحوش كبير حسب كلام عيالي لكبار انا ماشفته اخاف ينفطر قلبي


المشكله ....... وين لي قلب اسكن امي واجيها مع عيالي وهو مصمم كل زاويه بالبيت ؟ ماراح اتذكر ؟؟؟

فيكم حد مر بهالشي من قبل ؟ هل الحاله الي انا فيها مجرد ذكريات وبتعدي ؟

توفى ابوي وماصار لي هالحاله كنت ازور امي ببيته الله يرحمه بعد وفاته بشهر او شهرين بدينا ننسى ومشت

الحياه عادي ...... الله يسهلها علي وتمشي عادي هالمره لاني موقفه كل اموره الله يرحمه خوف من الذكريات




وبناتي الله يهديهم حفلات وعزايم لصديقاتهم لاتقدير لحزن ولا زياره لجدتهم الا كل شهر وزوجات اولادي لاهيين بحياتهم سفر وسياحه وسهر للصبح ونوم ولا كأنهم عايشين معاي بنفس البيت حتى ايام العزا كلها 3 أيام وماعدت شفتهم بين المعزين كأنه واجب وانتهى .....من حقي اطلب منهم يقعدون معاي لو نص ساعه باليوم ؟؟؟ اخاف اطلب شي مو من حقي ...... حاسه بوحده وخوف وشوي حزن على لخبطه بأفكاري

ودي اطلب منهم نخصص يوم بالاسبوع نروح جميع لأمي الي عايشه لحالها من بعده فهل هالشي من حقي ؟؟؟


خاصه اني قايمه فيهم اكثر من اهلهم مخصصه خداماتي لهم وجباتهم توصلهم يوميآ لغرفهم ويوميآ اراجع البلديه حتى ابني لهم شقتين بالحوش لكل واحد فيهم وتعرفون مراجعات البناء والبقاشيش والذل لين احصل موافقه

ولما انتظر بين هالزحمه في الدوائر واوراقي بيدي وهم نايمين الصباح والخادمه تجهز فطورهم اسأل نفس .... ليش مايحق لي شوية اهتمام منهم ؟؟؟ صحيح انا مش امهم بس اعتبرهم بناتي فليش مو من حق ام الزوج تطلب صداقة زوجة ولدها ؟؟؟


مره وحده شفتها بمناسبه هي كبيره بالسن سألتها وين زوجة ولدك ؟ قالت لي مو مجبوره تجي معاي هي بنت الناس ! كيف يعني بنت الناس ؟ رجعت البيت افكر بكلمتها ..... يعني مو من حقنا نتقرب منهم ؟

نفرح اولادنا بحبنا لزوجاتهم ؟ ايش هالدبلوماسيه في التعامل الي زهقني حياتي كأني بعبع او شريره


سامحوني شطحت عن موضوع اخوي افكاري فيها الف شغله وشغله


اعذروني

الله يرحمه ويغفرله ان شاء الله

الله يرحم اخوك ويغفر له يارب

الورث انتم الورثه له وهذا شرع الله

لكن انتوا اتفقوا بينكم انكم تحطون له صدقه جاريه

حاس ان موت اخوك محزنك وحاسه انك وحيده بدنيا الكل لاهي فيها الاانتي غارقه بحزنك

مالومك اذا تشتت افكارك

الله يرحم اخوك يارب