(وفي السماء رزقكم وماتوعدون) قصة حملي

الســـــــــــــــــــلام عليـــــــكـم
اخواتي الغاليات ترددت كثير اكتب لكم قصة تاخري في الحمل ولكن لعلها تبعث الامل في نفوسكم اربع سنوات وبعدها اراد الرحمن الرحيم ان يحقق حلمي ويرزقني الحمل فله الحمد كما ينبغي لجلال وجهه وعظيم سلطانه
يااللـــــــــــــــه سبحانك مااكرمك مرت علي ايام اتصفح هذا القسم من المنتدى وافرح بقصص حمل اخواتي بعد تاخرهم لعدد من السنين فينبعث التفاؤل في قلبي وتدمع اعيني اذا منّ الله علي متاخره بالحمل ولان انا اسرد لكم قصتي اللهم كما ادخلت السرور على قلبي بحملي فلا تحرم اخواتي المتاخرات وارزقني واياهن الذرية الصالحة ولاتذرنا فردا وانت خير الوارثين
انا بدات اراجع المستشفيات بعد سنه وثلاثة اشهر من زواجي لان دورتي تلخبطت بعد الزواج و ماكان ببالي ان بيتاخر الحمل سنين سته اشهر بين مستشفيات خاصة وحكومية بدون فايده الى ان راجعت المستشفى العسكري فظهر بعد التحاليل ان عندي انخفاض في هرمون التبويض وضعف شديد وطلعت تحاليل زوجي ضعف في حركة الحيوانات المنويه وفضل يتعالج سنه كامله في هالوقت رفضوا يعالجوني الين يتحسن وضع زوجي ووصفوا لي جلوكوفاج استخدمته 3اشهر ونفسيتي يابنات في الحضيض كنت كل جمعه قبل المغرب بساعه امد سجادتي واصلي ركعتين وادعي ربي وابكي ياااااااه كم من الايات لما امر عليها في القرآن ابكي بحرقة مثل قوله تعالى في سورة البقرة( أمن يجيب المضطر إذا دعاه ويكشف السوء ويجعلكم خلفاء الأرض أإله مع الله قليلا ما تذكرون ( 62 ) ) .كم سالت دموعي وانا اسمع قوله تعالى على لسان نبينا موسى{ فَقَالَ رَبّ إِنِّي لِمَا أَنْزَلْت إِلَيَّ مِنْ خَيْر فَقِير } .القصص أية 24 ومره طلعت من مستشفى خاص كنت ابغى اسوي فيه تلقيح صناعي فقرر الدكتور ان اعمل لك عملية كي للمبايض ورفض زوجي وكانت خيره من الله لكن انا كانت لي هي املي في الحمل فخرجنا من المستشفى ودموعي تسيل من الحزن ومرينا بمسجد كان الامام يقرا في الصلاة قوله تعالى{وَأَيُّوبَ إِذْ نَادَى رَبَّهُ أَنِّي مَسَّنِيَ الضُّرُّ وَأَنتَ أَرْحَمُ الرَّاحِمِينَ * فَاسْتَجَبْنَا لَهُ فَكَشَفْنَا مَا بِهِ مِن ضُرٍّ وَآتَيْنَاهُ أَهْلَهُ وَمِثْلَهُم مَّعَهُمْ رَحْمَةً مِّنْ عِندِنَا وَذِكْرَى لِلْعَابِدِينَ }} الآنبياء 83 – 84
وبعد مرور السنه وتحسن زوجي بدأ كورس علاجي والتنشيط بالابر والكلوميد تفألت مر الشهر الاول مافيه حمل والثاني والثالث وقررت اروح لممرخه ورحت وياه تحملت قوة يدها وهي تمسدني وتخبط ظهري خبط مايتحمله كافر وانا دموعي تسيل وادعي يارب انا اتحمل هذا الالم واكشف ملابسي في مكان غريب امام حرمه غريبه فارحمني يارب ويسرلي الحمل واكرر حسبنا الله سيؤتينا الله من فضله انّا الى الله لراغبون وبعدها مر شهر ماصار حمل ولكن تحسن التبويض قررنا انا وزوجي انقدم عالهيئة الصحية عشان نتحول لتخصصي بالرياض عشان نعمل تلقيح صناعي اوطفل انابيب وخلال هالفترة شهرين كفلت يتيم وكنت اتابع يوتيوب الشيخ عبدالمحسن الاحمد الله يجزاه خير مثل اغنى فقير وكلامه عن الرضا والصبر وعرفت الخطأ اللي كنت اسويه كنت ادعي ربي واذا نزلت الدورة وماصار حمل ابكي وليش ربي مايستجيب لي وانا كم لي ادعى ولا يستجاب لي ومن بعدها صرت ادعي وانا موقنه ان الله سميع مجيب وان اذا كاتب لي هالشي بيصير والله العظيم ماهي الاشهرين ولاعلى بالي ان ممكن اكون حامل مرت الايام وانا ماتمر عشره ايام بعد التنشيط الا احلل عن الحمل الا هالمره مر عشرين يوم وقررنا نروح عمره فقلت بحلل عشان اتاكد اذا فيه حمل حتى مالوم نفسي لوصار شي وقمت صلاة الفجر صليت واخذت العلبة وحللت وطلع الخط الاول وبسرعة الخط الثاني هنا تجمدت مكاني يالله يمكن لسى نايمه اغسل وجهي وارجع ياللــــــــــــه انا حامل وطيران على زوجي ويشوف الخطين ويلا قوم نروح المستشفى انا بحلل دم مومصدقه يمكن الجهاز فيه شي وحللت دم واخذ زوجي النتيجه وناداني يوم شفت وجهه عرفت انه ايجابي فاللهم لك الحمد حتى ترضى ولك الحمد اذارضيت ولك الحمد بعد الرضا هالحين انا في نهاية الشهر الرابع ومرت الشهور الاولى واناعلى اعصابي خايفه من الاجهاض ادعولي يابنات ان الله يتمم لي على خير واشوفه بين يديني سليم معافى وسأدعو الله لكم ولاخواتي الثنتين ان يرزقكم بالذرية الصالحة واعذروني اذا طولتها عليكم ويارب تكون ايامكم كلها فرح وسعادة