اترككم مع الموضوع الظريف وهو يحكي وا قعنا !!
يوم كتبت موضوع عن المسيار وقلت فيه ان اصعب شيء على الكاتب ان يعرف المقربون منك اسمك الذي تكتب به لانهم وبصراحه يقعدون ينقدونك في الطالعه والنازله ... لكن وبصراحه انا اسحب كلامي واقول اصعب شي بالدنيا لا صرت متعرفط داخل سيارتك وباب السواق راص خشتك عند الدعاسه وكرسي السائق جاي فوقك ... والدعامية ساحبة الكبوت والمكينه وراصة على بطنك ... ورقبتك معلقه داخل السكان كنك صدام حسين على حبل المشنقه
... وانت بين الحيا والموت وما تملك غير لسانك تلهج به ان الله يسخر لك من ينقذك وتقعد وقتها تتشهد ويمر امامك شريط طوووووويل من البلاوي اللي كنت تسويها وتقعد تقول والندم ياكل قلبك ليتني ذاك اليوم ما سبيت فلان وليتني ذاك اليوم بدل ما اصلى ركعتين خليتها مية ركعه ... والمصيبه لا تكسرت سيارتك وصارت كوم حديد وابن الذين الوحيد اللي ما جاه شي ... تسألوني من هو ابن الذين ... اقلكم المسجل واغنيه طلال .. مرت ولا حتى تلتفت .. مرت وعن عيني اختفت ( نااااقصك انا ياخووويه ) ... تبعث في اجواء كوم الحديد الحزن ان يختم الله لمن هو في ذلك الموضع بما حرم الله 
... المشكله مو بهذا .. المشكله في السلنتح اللي يوقفون سياراتهم وتسمع دبيكهم وهم يركضون وانت تقول ياسلااااام هؤلاء هم ابناء بلدي راعين الفزعه ... هؤلاء هم شباب بلادي اللي يغيثون الملهوف وينقذون المعكوف في الدعاسه ... هؤلاء ابناء الجزيره حماة الوطن ورجال المستقبل ( ما عندي تعليق ) ... شوي الا وتسمع اللي يقولك خله يستاهل انا شايفه كنه طياره من سرعته ... واللي يقولك مااااات ولالالحين ؟؟؟ ( يخررررب بيتك ) ... لا وواحد فيهم يقول ان ما مات اسأل له ان يموت ويرتاح ولا يقعد طول عمره مشلول ( حسبي الله عليك يالرمه 
).... وتسمع من ينظر ومن يستنبط انه من اهل النار فصوت الموسيقى يصدح في ارجاء سيارته ... والاخر يقول والله انه من اهل الجنه ماتشمون رائحه دمه الزكيه ... (( يا اهبل هذي قاروره عطر كانت فوق الطبلون وانكسرت)) ... قال ايه رائحه دمه زكيه ... المشكله ما تلاقي احد يمد يده لينقذك بل ترى وجوه تتزاحم لتنظر الى خشتك بحزن مع ترديد لا حول ولا قوة الا بالله والله انه يحززززن
... وتسمع صرخات بعضهم خلوه خلوه لا احد يمسكه لين تجي الشرطه والا والله تروحون بداهيه ... هذي بعض العينات من الملاقيف اللي تلاقيهم اذا شافو حادث يكونو اول المصفطين وهروله واللي يشوفهم يقول وش هالنشامى وهم وربي رخوم 
رايحه تتفرج على الجثث والدماء دون ان يحركوا ساكناً ... واللي يقهرك ويفقع مرارتك اذا شفت يد تدخل عليك وانت عند الدعاسه مو عشان ينقذك لا الا عشان يصورك بالجوال ... وياخوفي بكره ينتشر الشريط ومعه صوت احد القراء وهو يتلو ايات العذاب وممكن من منتدى الى منتدى تزيد الاشاعات ويقولون هذه نهاية رجل كان مع صديقته 
... ولا نهاية مفحط الثقبه .. ولا يطلع واحد يسوي نفسه فاهم ويقول بل كان سكران فأنتقم الله منه ... وبصراحه يا جماعه المفروض ان يسن قانون لمن يقف بسيارته عند رؤيه حادث لمجرد الفرجه ان يؤخذ ويجلد بعصايه منقعه بملح ... وزيادة في تاديبه يفرض عليه ان يستثمر ويضارب في سوق الاسهم السعوديه والاسهم العقاريه عشان يتأدب صح من اللقافه .منقووول بتصرف .
كلامك صحيح