وقفت الفيتامينز وحمض الفوليك وكل ابو شئ !

السلام عليكم

بنات تكفون ابي استشيركم

تعبت والله العظيم تعبت

أنا حامل وفي بداية الشهر الثالث , المشكلة اني تعبت معدتي مرة , وصرت ماتحمل اي شئ ,

في البداية عطتني الدكتورة حمض الفوليك وقالت لازم تداومين عليها , لكني صرت ارجـّع (وانتم بكرامة) استفرغ كل شئ .. لو اني ماكنت ماكلة شئ لازم كل عشر دقائق اروح الحمام ( اعزكم الله)

رحت لدكتورتي كذا مرة اشكي لها , منعتني مرة اوقف الحبوب , وعطتني كبسولات ضد الغثيان والقئ , وصرت اكلها بس ارجع استفرغها هي والفوليك , جلست ع هالحال ثلاث اسابيع من الشهر الثاني , وكل مارحت دكتورتي كتبت لي علاج عشان القئ من نوع ثاني ! وهكذا , جربت حوالي اربع انواع مافاد فيني شئ
تعبت نفسيتي , وساءت حالتي وربي جتني ايام صرت ادعي اني اموت خلاص مابي شئ من الدنيا ,

كنت في الدنيا وانا مو مع الدنيا , ما أحس بشئ ابدا , لا طعم ولا لون ولا ريحة , بس كان ودي انام وارتاح وحتى ماقدر , لاغفيت قمت ركض ع الحمام

المهم بعد مايئست من كل شئ , قررت اوقف كل الحبوب اللي تعطيني اياها بما فيها الفوليك , وقلت بشوف وش يصير معي

بعد ماوقفتها ثلاث أيام ارتحت مرة , ورجعت انسانة عايشة في الدنيا , آكل وأشرب واقدر ابتسم !

رحت لدكتورتي وقلت لها اني وقفت كل شئ وارتحت , قالت خلاص براحتك اذا مرتاحة كذا مابيدي اسوي لك شئ مع ان حمض الفوليك مهم مرة للبيبي !

جاء موعد مراجعتي بعد اسبوع تقريبا , يوم شافت الدكتورة صحتي انها تحسنت , قالت بتعطيني مجموعة فيتامينات عشان عندي نقص فيها , وعندي نقص في الكالسيوم ,

بديت فيها من يومين , ومن يوم بديت رجعت لي حالتي , والله العظيم اني اكتب لكم ع فترات , ( اروح الحمام استفرغ ) وارجع اكمل كتابة

بعد كل هذا , سألتكم بالله تساعدوني , مع العلم ان هذا اول حمل لي :(

حتى امي مستغربة تقول ماقد شفت وحم كذا شهرين !

اكيد بعضكم عندها خبرة وفاهمة , وفي دكتورات ماشاء الله , ياليت تقرون حالتي , والله لا ادعي لكم بصلاتي