السلام عليكم ورحمة الله ..
كيفكم ..
ومبروك على جميع اللي انقلبو بحافز .. والله يعوض اللي ماقبلوهم ويوسع لهم رزقهم ويغنيهم عن خلقه ..
شفت فرحة الجميع هنا اللي انقلبو بحافز ..
يستاهلون كل خير الحمدلله من قبل وبعد ..
لكن استوقفتني مواضيع كثيره وجلست اتفكر كيف ان المال احيانا يكون نقمه على اصحابه ,,
تصفحت مواضيع كثيره وردود اكثر وكلهم يقولون الناس حاطين عيونهم على حافز ..
اوك أنا معك إلا اذا تقصدين بهالناس أمك وابوك ..
سبحان الله يابنات البر بالوالدين ابدا مايضيع ومافيها شي اذا امك وابوك محتاجين تتقاسمين معهم هالمبلغ احتسابا للأجر وطمعا في رضا ربك اذا ارضيتيهم لان رضا ربك من رضا والديك ..
والله يابنات حزنت كثير من موضوع وحده تشاور هل هي غلطانه عشان ماتبي تعطي اهلها وهم محتاجين من حافز والبنات يايدونها ويحرشونها على اهلها رغم اني حسيت ان البنت ماعندها مانع تساعدهم بس الردود جدا حزت بخاطري ..
معقوله فلوس تفرق وتسبب زعل بين العيال واهلهم ؟!!
والله يابنات ثم والله انك لو انفقتي وعطيتي والديك بنيه طيب ان ربي يفتح لك رزق واسع من وظيفه او زوج او او ..
وهالكلام قاله اشرف الخلق : ( من أراد أن يبسط له في رزقه وينسأ له في أثره فليتق الله وليصل رحمه )
يعني لافرحتي ابوك وامك بهديه اذا هم مو محتاجين او قاسمتيهم المبلغ اذا ظروفهم الماديه متعسره وش بيضرك ؟!
بالعكس ربي بيبسط لك رزقك وماتدرين لو تجيك وظيفه ما احتسبتيها ..
وماتدرين لو واحد منهم يرفع كفه ويدعي لك دعوه تسعدين بها بدنياك واخرتك ..
الشي الثاني :
يابنات اللي ربي رزقكم وكتب لكم تكونون من المقبولات اشكري ربك على هذي النعمه اللي حرمها غيرك واعرفي ان هذا من فضل ربي ومنته عليك ويمكن عطاك ابتلاء لك يشوف تشكرين نعمته او تكفرينها ..
ومن شكر النعمه انك ماتتشمتين بخواتك اللي ماقبلوهم وانحرمو وانا ما اعمم لكن حبيت انبه لإني شفت ردود فيه استهزاء وتجريح واتهام بان خواتهم هنا مقهورت منهم عشان ما انقبلو !!
يابنات لازم نعرف كلنا انه بالشكر تدوم النعم ومن شكر ربي على هالنعمه انك ماتستخدمينها في ماحرم ربي ..
فلا تنفقين هالمال على شراء شي محرم سواء كانت اجهزه او ملابس او غيرها ..
ومن شكر ربي انك تتصدقين ولو بريال ولاتنسين دعاء الملك اللهم اعطي منفقا خلفا وممسكا تلفا ومانقص مال من صدقه ..
الصدقه بركه لك بدنياك واخرتك وبركه بهالمال اللي معك ..
ويمكن هالصدقه تكون سبب لفرج ربي او دفع بلاء عنك او عن احبابك ولا تدرين لو تكون مدخل خير لرزق واسع ..
الشي الثالث :
انتي ياللي ماقبلوك وربي حرمك وانتي مؤهله لاتحزنين واعرفي ان هذا ابتلاء ولك اجره وبيكفر فيه ربي من سيئاتك واحمدي ربك انك مظلومه ومنتي ظالمه واستغلي هالشي بالالتجاء لربك ادعيه والحي عليه قولي يارب ان الناس حرموني وان فضلك ورزقك اكرم فلا تحرمني يارب ووسع لي رزقي وادعيه باللي تتمنينه من وظيفه او غيره ..
وفتشي بنفسك ماتدرين لو ربي حرمك هالرزق بذنب اقترفتيه ( وإن العبد ليحرم الرزق بالذنب يصيبه )
وكلنا نذنب محد معصوم من الخطأ ويمكن ربي منع عنك حافز عشان يسمع صوتك بالدعاء والالتجاء له ..
وماننسى يابنات فضل الاستغفار في تكفير الذنوب والرزق الواسع وذكر ربي فضله في كتابه الكريم : ( فقلت استغفرور ربكم انه كان غفار يرسل السماء عليكم مدرارا ويمددكم بأموال وبنين ويجعل لكم جنات ويجعل لكم أنهارا )
وقول اشرف الخلق : ( من لزم الاستغفار جعل الله له من كل هم فرجا ومن كل ضيق مخرجا ورزقه منحيث لايحتسب )
واخيرا الله يبارك لك جميعا ويرزقكم الوظايف اللي تتمنونها ويسعدكم ..
واللي ماقبلو الله يفتح لهم باب رزق اوسع من حافز ويعوضهم ربي بوظيفه تغنيهم عن حافز وغيره ..
وأتمنى محد يزعل من كلامي ويتقبله الجميع بصدر رحب ..
دعواتكم لي بالصلاح والثبات وان ربي يرزقني بنوته حلوه :04:
لمووو بنت أبوها @lmooo_bnt_aboha
محررة فضية
يلزم عليك تسجيل الدخول أولًا لكتابة تعليق.
*الورده الناعمه*
•
جزاك ربي خير
الصفحة الأخيرة