وقفو أمام مستقبلي

قصتي هي اني عشت مع عائله شديدة الخوف على البنات
لما كنت بالمدرسه كنت مجتهده ومن الأوائل ماشاء الله وكانو البنات والمعلمات يتوقعون اني بكون شي مهم بالمجتمع
تخرجت و دخلت الجامعه
تخرجت من الجامعه وكان عندي حماس قوي للوظيفه لدرجة اني قدمت على أول وظيفه قبل ماتخلص الوثيقه من الجامعه
رحت المقابله في شركه بكل ثقه
وقالو لي وانا طالعه ننتظر ردك لأنا قبلناك
فرحت من كل قلبي لكن إلي كسر فرحتي رفض امي لهذي الوظيفه كونها فيها اختلاط
وخالتي كلمت امي وقالت لها لاتوقفين في طريق بنتك لكن للأسف طارت مني الوظيفه وندمت اني سمعت كلامها 😞
بعد مرور فتره بسيطه قدمت في شركه أخرى وتم قبولي والوظيفه كانت كول سنتر بدون اختلاط لكن المكالمات رح تكون من رجال ونساء
لكن هالمره الرفض جا من ابوي واخواني وطاااارت الوظيفه
اهلي كانو يقولون قدمي في وظائف الروضات لكني ماعندي رغبه فيها اولا لأن تخصصي ماله دخل بتدريس الأطفال ماعندي خبره بهالشي وثانيا الرواتب للأسف ماتتعدا ١٥٠٠ وهذا ظلم لي كوني جامعيه تعبت وانا ادرس
انا الآن اعيش حالة ندم على الفرص إلي ضاعت
وبنفس الوقت نظرات وكلام الناس الي مايعرفون بحالي شي يقهر عبالهم اني كسوله وابي النوم والتسدح ويتسائلون ليش ماتوظفتي البنات إلي درسو معك بالجامعه كلهم توظفو !!
والي يقهر اكثرر لاخلوني اتوظف ولا يعطوني مصروف رغم وضع اهلي المادي الممتاز وفوقها مايبون اتعلم السياقه
انا حاليا دخلي المادي الوحيد من حساب المواطن والسبب تحطيم أهلي