حياكم الله في سطحنا الكائن بحي البديعه ..
الذي صور بالاقمار الصناعيه
ونُزل لعيونكم من قوقل لعالم حواء ..عالم الثرثره ..والقرقره .. والبربره ..والزين كله
شرفتوا والله ونورتونا .. السطح ياسع الجميع ..والضيق بالقبر
في هذا السطح ياغالين جهزنا عدتنا ورقينا له ..اي طلعنا له
كانت كشتتنا البسيطه والرايقه (بسطه وفله ووناسه الله يديمها علينا وعليكم ) كل شي قريب
نسيتي ملح بلمح البصرماشاءالله تجبينه نسيتي سكر الشويهي انزلي للمطبخ وجيبيه لاهنتي
مهنا خساير وحسوفه ..
ولا وبعد تسدحي .. وتبطحي على كيف كيفك .. وعدي النجوم وش كثرها .. ياللي بقلبي كثرها
ونام .. القمر فـ وسادتك نام ... وصحى على كشتتنا يازينها كشتتنا ونبداها كشتتنا
::::::::::::::::::
طبعا بعد مافرشنا السطح وتكينا وتقهوينا ..ولعبنا كيرم انا وبعلي العزيز النصراوي المهزوم هع
ومن الحماس بالعب جالسين نقشم حب باجه ..
نص القشام يالعب معنا بالكيرم هع هع ..اووووف صرنا اردى من التكارنه بالفص فُص هع!
مع انو بناتي معنا بس اكبر غشاشين اذا لهيت اخذو عشره وعطوها ابوهم واذا قلت فيه شي ناقص هنا رجع خمسه
ومع هذا ..انا اللي فزت طبيعي هلاليه ..
ونبدا باسم الله ..
تتبيلة الدجاج المعروفه للشواء
واحد طماط .. واحد بصل وسط .. 3 فصوص ثوم ..3 حبات ماجي ..فنجال ماء ورد ..فنجال زيت زيتون
ذرة ملح .. ملعقة بهارات ..زعفران بودره ..فلفل اسود حسب الرغبه ( ودجاجتين حجم كبير مقطعه ارباع )
تخلط بالخلاط وتصبح تسذا
وهنيا الدجاج مقطع ومنظف..وذريت عليه شوية هيل مطحون
وهنيا يالمزيونات بعد ماتبلناه وخليته ساعتين
والحين حطيناهم ع المنقد طريقه معتاده للشواء يالبى قلب من يشويه
وبعد ماانتهينا من شواء الدجاج ابتدينا بالبطاطس ..هنيا صورة الدجاج
وهذا البطاطس .. نسيت صورته ع الفحم
اخذت حوالي 6 قطع نظفتها ونشفتها ومسحتها بالسمنه والملح
وبعدها لفيتها بالقصدير وشوينها ..رمينها بالمنقد بدون الشبك وقلبنها حوالي ثلث ساعه
وهنيا بعد اشواء <<< من الذ وافضل البطاطس عندي اللي هو المشوي "
مقاديرها :
علبتين زبادي ..ملعقتين ك.طحينه..فصين ثوم مبشوره ..ملح ..ملعقتين عصير لليمون ..ملعقتين ماء
تخلط الماقدير جيدا حتى يثخن القوام .. وتقدم
وبرضو .. عملت مخلل سريع
خياره مقطعه قطع طوليه وجزره مقطعه طوليه ..وتسلق لمدة خمس دقايق وثم تخلط بملح وخل ابيض
وتقطع بطاطس اصابع وتقلى وتخلط معه ثم نضع عليها مخلل المنجو مقدار ملعقه ..
ياهو حامض حمووضه يخلي الغدد اللعابيه تلعب لعب ..بس جنااااااان
على فكره برضو شوينا كباب .. بس كان جاهز مبرد من العثيم .. غمسته بنفس التتبيله ..وهذي صورته
وهنا صور السفره كامله بعد ماستانسنا بالسطح نزلنا نتعشا تحت ..
شوفوا الخبز شويناه بعد ..
تم والله الحمد والتوفيق ..
ولكم شكري على الاطلاع ولكم دعواتي على المشاركات ..