ولادة غير متوقعة لبكرية..

بسم الله الرحمن الرحيم

يمكن ماحد يعرفني كثير في هذا القسم لكني كنت متابعة جيدة ليكم ولمواضيعكم ومستفيدة من خبراتكم الواسعة لأني بكرية ومسالة الحمل جديدة عليا كلياً..:)

عموماً في موضوعي هذا بقولكم قصتي مع حملي وولادتي الله لا يوريكم اللي شفته وحسيته..
بدأت قصتي بعد شهر من زواجي لما حسيت بتعب وارهاق واللي فسرناه انا وزوجي ببرد وتغيير جو وبعد نصيحة خالتي بعمل اختبار الحمل المنزلي تأكدنا انه تعبي بداية حمل وتأكدنا من الخبر عند الدكتورة وفرحت كثير بدخولي مرحلة جديدة في حياتي مرت الايام والشهور وعرفت انه معايا نقص في الحديد والدم عندي 8 كنت أشتكي من دوخة وتعب بعد اي جهد خاصة في رمضان كنت في شهري السابع وكنت بأتعب وادوخ من اقل حركة خاصة اني كنت ارجع من دوام الكلية ويادوب ارتاح شوية وابداء تحضير للفطور..
المهم في بداية الشهر الثامن بطني كبرت فجأة وبشكل مو طبيعي وصارت حركة البيبي مو طبيعية وزايدة مرة وصرت احس بتعب وارهاق وخمول شديد , اهل الخبر فسروها بأنها (تحاسيس) بما اني بكرية احس فيها كل شوية مثل اعراض الطلق بس على خفيف مرة..
وفي اليوم الخامس من شهري الثامن يوم السبت 22-10 في الصباح وانا جالسة في المحاضرة في امان الله حسيت بالآم شديدة اسفل البطن وماقدرت استحملها استأذنت على اساس اروح بيت اهلي ارتاح عندهم بما اني تعبت من درج بيتي المتعب لكن من شدة الألم رحت لمستشفى الولادة وكشفت عليا الدكتورة وصدمتني بخبر ان عندي تهديد بولادة مبكرة..!!
واني لازم اترقد واخذ ابر مثبته للحمل عشان اولد في التاسع لكني رفضت وقلت اروح المستشفى العسكري عشان اتأكد..
ورحت للعسكري بالليل الساعة 9 وكشفوا عليا الدكاترة وقالو ان المشيمة امامية بسبب الحركة الكثيرة وطلوع الدرج ونزوله(مع العلم اني كنت اطلع الدرج الدور الثالث اكثر من 4 مرات باليوم في الكلية والبيت) وانه كان لازم ارتاح راحة تامة..
المهم حطو جهاز فيه صوت عشان يشوفو تخطيط دقات قلب البيبي وقالو ان الرحم مفتوح واحد سم..
الساعة وحدة بالتمام جا الدكتور ومعاه القابلة ودكتورتين وقالي بالحرف:
انتي ما فيك ولادة الحين وضعك طبيعي 100% لكن البيبي تعبان ومو مطمنين على وضعه فيه احتمال تكون مشكلة بقلبه واذا تبغي تولدي في التاسع راح اطلعه منك ميت..فلازم اخرجه منك الحييييييييييين عشان نقدر نتابع وضعه..
بكيت من قلبي اول ما سمعت هالكلام لاني كنت لوحدي ما معايا احد وكنت مرعوبة وخايفة من الولادة وخايفة اكثر على اللي في بطني خصوصا انه صار قطعة مني وما ابغى اخسره في اي حال ..
سألوني هااا موافقة نخرّج البيبي قلت ايوة وانا قاعدة اشهق من البكا وعلى طول وبلمح البصر لقيت الممرضات حواليا وحدة دقتني ابرة في فخذي والثانية غيرت ملابسي والثالثة قاعدة تبصمني على اوراق واخر شي غطو وجهي ومشوني بالممرات بالسرير وانا تحت البطانية ابكي واقول ساعدني يارب واحس ان قلبي بيطلع مني من كثر الخوف والرعب..واخيراً وقفت الممرضات عن دف السرير كشفو وجهي ولقيت نفسي في غرفة العمليات ودكتور لابس لبس العمليات فوق راسي ..!!!!
قلتله على طول وانا مستمرة بالبكى : انا حأولد كيف؟؟؟؟؟ قالي عملية وكنت حأموت لما قالي عملية حسيت انها نهايتي وانهرت من البكا :icon33: وقالي وكلي امرك لله واقري المعوذات..
وصارت العملية وفقت من البنج وكنت مرة بردانه سألت عن البيبي قالو بنت حلوة مثل القمر لكنها تعبانه شوية ووديناها العناية..
مر اليوم الاول وانا مشتاقة اشوفها خاصة ان ابوها كل شوية يروح يشوفها ويقولي ما احلاها والله قمر يعني اتشوقت اشوفها اكثر..
وفي اليوم الثاني في الليل صرت اسمع اصوات الاطفال اللي جنب امهاتهم يبكو في اخر الليل حسيت بغيرة وبكيت قهر وقلت خليها تبكي طول اليوم خليها تزعجني وتدوشي ما اقول شي بس اهم شي تكون جنبي وعندي وبين يدي .. حمدت ربي على كل حال واكيد انها خيرة من ربنا الكريم.. وثالث يوم شفتها مع زوجي في العناية وكانت مثل الملاك نايمة والاجهزة كثيرة عليها جهاز التنفس في فمها وجهاز في أنفها والمغذي في يدها مع جهاز القلب وعلى رجلها (القدم )شاش لما سألت الدكتور قالي من هنا ناخذ التحاليل ..واكتشفوا انه كان عندها نقص اكسجين وهي في بطني وبسبب كذا صار قلبها ضعيف او علميا ضخ الدم للقب ضعيف..
طلعت من المستشفى وبنتي باقية في العناية مستودعاها عند ربي وواثقة بكرم ربنا ولطفه بأنه حيطلعها بالسلامة ان شاء واراد..
اليوم ليا 6 ايام والدة وانا مو حاسة بفرحة الولادة وفرحة اني صرت ام..الحمدلله..
ومشكلتي اني مو قادرة ارضعها او حتى المسها , شعور صعب ومر الله لا يحسسه لمسلمة وخايفة الحليب ينشف في صدري قبل لا اشوفها خاصة انها حتطول في المستشفى ..

ادعو لبنتي بالشفاء العاجل ..
وسامحوني اذا طولت بالكلام لكني محتاجة احد يطمني ويقولي انه وضعها طبيعي ومر على اطفال كثير..