ولادة مبكرة والحمدلله على كل حال

السلام عليكم بنات كيف حالكم؟♥️ من زمان ما شاركت معكم من اول ما بديت علاج بالانابيب..
ماادري ليه جالسه اكتب لكم بس ودي اشارككم اللي صار معي يمكن احد يستفيد ويتفادى اللي صار لي ..
انا وزوجي قبل سنه بدينا بالأنابيب في مستشفى معروف ودكتور شاطر.. الحمدلله سويت سحب البويضات والارجاع كان بنفس الشهر.. بس كان قلبي مو مرتاح من مسألة ترجيع ٢ من الاجنه،، استخرت كثير وشاورت وسألت دكتوري اني متخوفه من هالشي بسبب وزني انه قليل ويمكن ما اتحمل وبالعكس شجعني اخذ هالخطوه وانه بإذن الله رزق وكل شي بيكون تمام..
توكلنا على الله وتم ارجاع ٢ من الاجنة وكان الوضع ممتاز لحد اسبوع تقريبا من بعد الارجاع وبدأت تطلع لي اعراض مثل انتفاااااخ وتحجر مخيييف بالبطن وتعب وألم لدرجة مااقدر أوقف بشكل مستقيم.. المهم لما رجعت لدكتوري صار معي فرط تنشيط وتنومت في المستشفى كذا يوم وسووا لي فتحة في بطني ودخلوا انبوب لسحب السوائل اللي كانت حوالين بطني وظهري .. بعدها الحمدلله تحسنت حالتي وبديت بالوحم والتعب حقه وعديته على خير وبديت افرح بحملي وانهم توأم الحمدلله♥️ كنت كل مراجعه احط يدي على قلبي اخاف يقولون لي ان الأجنه فيهم مشكله ( سبق لي الاجهاض بسبب مشكلة في الجنين) كنت قبل كل موعد اتوترررر و ادعي ربي يحفظهم من كل شر .. حتى اهلي كانت قلوبهم معي بكل موعد.. سويت عملية ربط لعنق الرحم كإجراء احترازي بما انهم توأم وعنق الرحم كان عندي قصير( خِلقة) على كلام الدكتور. كل شي مشى تمام لحد ما صرت نهاية الخامس.. صار عنق الرحم يقصر اكثر بس الدكتور كان يطمني انه بإذن الله وضعك زين لكن ارتاحي.. مراجعاتي كانت مره بالشهر.. في يوم صحيت الفجر وحسيت بشي نزل مني.. لما دخلت دورة المياه شفت نقطة دم .. رحت على الاسعاف على طووول وتنومت في المستشفى كذا يوم وكنت اخذ ابر مثبتة لحد ما كتب لي الدكتور خروج مع التزام الراحه.. طلعت للبيت ونمت ليلة ولما صحيت كان كل شي تمام الى العصر.. بلمح البصر كل شي تغير.. حسيت بشي ينزل مني مره ثانيه ولما شيكت صار افرازات غريبة اول مرة اشوفها.. بعدها بدقايق صار يجيني احساس اني ابي ادفع ( نفس وقت خروج البيبي وقت الولادة) كان احساس قوووي و غصب عني مااقدر اوقفه.. رحت بالاسعاف للمستشفى وبالطريق انفجرت المويه وخفت اكثر وعرفت انه ولادة اكيدة💔 كنت وقتها في الاسبوع ال٢٥ و ٤ ايام.. وصلت هناك وسووا لي التراساوند وشافوا ان المشيمة لواحد من الاجنه انفصلت.. على طول طلعوني فوق لغرفة العمليات وسووا لي القيصرية.. ولدت اثنين اولاد بأوزان مرة قليلة وعلى طول اخذوهم لعناية الخدج .. كانت اشكالهم تكسر الخاطر اجهزة وانابيب ومغذيات بجسمهم الصغير💔 وانا اشوفهم وما بيدي حيله الا اني ادعي ربي.. بعدها بيومين توفى ولدي الاول واليوم اللي بعده ولدي الثاني.. الله يجعلهم شفعاء يارب لي و لأبوهم ولا يذوق احد اللي ذقته..

احترت اكتب قصتي او لا.. بس قررت اقولها لأني اعرف احساس انتظار الوحدة للحمل وانها تصير ام وتشوفهم بصحه وعافيه.. واعرف التعب اللي نعيشه واحنا نعالج ونروح مواعيد ونعمل بالاسباب عشان هاللحظة..
قلتها ما ودي وحده يصير لها اللي صار لي.. ودي تتأكدون من كل شي قبل الحمل ووضع جسمكم وعنق الرحم و أهم شي تثقون بإحساسكم وتناقشونه مع الدكتور لحد ما تقتنعون..

يمكن كلامي يكون مخربط.. لاني كتبت كل شي مره وحدة بدون ما أرتبه بمخي قبل..
الله يعوض كل أم فقدت جنينها او طفلها بالعوض الجميل بالدنيا والأخرة..