ولادتي الاخيرة بالخامس

هلا بكم ، بما اني جالسة قلت خن أكتب لكم ، المرة الماضية كتبت لكم ولادتي لبنت (الله يشفعني بها) وهالمرة بكتب لكم ولادتي لولد الله يجعله شافع،،، خلونا نخش بالقصة دغري ههههه ، بيوم اني قررت احمل جمعنا فلوس وتوكلت على الله وبديت المشوار مع مواعيد الانابيب ،وبديت كشف وفحوصات وتحاليل كالعادة وادوية وثم بديت بالأدوية الى ماجا يوم الارجاع وقالوا لي عندك ٣ اجنه ممتازين ولله الحمد ، قلت رجعوا لي واحد بس(من الحرص قلت بس رجعوا جنين واحد ) ، قالوا لي تمام وتم الارجاع ولله الحمد لجنين واحد ، وأكيد أي وحدة مرجعه تعرف الاحساس اللي كل شوي ودها تحلل هههههه ، المهم واحلل بدري ويقولون حمل واحلل بعد يومين والهرمون يرتفع وماغير كل يومين اروح احلل ههههههههه أحس بوناسة لحد يضحك ، ولله كل مازاد الرقم انبسطت ، المهم ياجميلات ، وألزم الراحة التامه ومغذيات وابر سيولة ، وكل ما استفرغت ودي ازغرط من الفرحة هههههههه اقول اشوى استفرغ يعني الجنين بخير ، لأني متعودة قبل (ان الاستفراغ والوحام يعني ان الجنين بخير فيوم يوقف الوحام اعرف ان الجنين مو بخير) ، المهم وتمر الشهور واهلي مبسوطين وام زوجي متشققة من الفرحة ، وزوجي لو تشوفون ماغير يشوف بصور الاطفال ويختار الاسامي ، ونتناقر عالأسامي هههه هو يبي اسم وانا ابي اسم وام زوجي تبي اسم ، وماغير مقابلة المواقع واطلب بهالملابس واغراض البيبي ، لو الرضاعات شريتهم ،،،،،،،،،،،،، 🌺 المهم ويجي يوم وانا نايمة نهاية الرابع تقريبا ، واشوف حلم خلاني افز من نومي قبل الفجر ، وقمت اتعوذ من ابليس ، وسبحان الله انا حلومي صادقة دايم وحسيت ان فيه شي مو زين على جنيني ، وقمت ماعاد جاني النوم ، وأول ماجا الصبح رحت لمركز خاص قلت ابي سونار ابتطمن عالولد ، وسوت لي الدكتوره سونار واشوفه يتحرك واسمع قلبه ينبض وحمدت ربي وشكرته ، ورجعت لبيتي مبسوطة وابشر زوجي وأم زوجي وأهلي انه بخير ، من أحمل كلن على اعصابه هههههه حمل جماعي (كنهم يحملون معي) ويجي الليلة الثانية وكنت نايمة وزوجي نايم وأفز من نومي مرة ثانية ، شفتوا اللي تقوم كن أحد يقومها بقوة، كذا أنا قمت ، قمت بخفقان شديد ، وأنفاسي صارت تخبص ، اتنفس شهيق بدون زفير ثم شوي زفير بدون شهيق ، للأمانه حسبت اني اموت فقمت أتشهد واحاول اتشهد وربي يابنات انه بوقت قطع النفس( التشهد يكون صعب) ، زوجي حس فيني وقام ، يحاول يمسكني وخاف مرررة يوم شافني مكتومة ، المهم بهالوقت هذا حسيت بحركة قويه للجنين ، وهنا راحت الكتمة ، اقول لزوجي سبحان الله شف الولد قام يتحرك كنه يبي يطمني عليه انه بخير ، قال الحمد لله ، قال قومي للمستشفى الحين ،قلت لا ولله دام الولد يتحرك مايحتاج كمل نومك وموعدي الصبح مع المستشفى ، يعني كم ساعه ويجي موعدي نم بس وباذن الله خير ، شربت مويه ونمت (كني بمسلسل مصري ههههه) المهم ويجي الصبح واروح اول وحدة للمستشفى يمكن ، الساعه ٧ وانا هناك ، متواجدة قبل الجميع ههههه مستعجلة ، انبسط يوم اروح اسوي اشعه واشوف الولد ، المهم وادخل للاشعه اول وحدة ، الاشعه الكبيرة ، والموظفة الدكتورة حقت الاشعة سعودية تجنن ، ونفسيتها عسل ، المهم تسولف معي وانا كاشخه كالعادة واستشوار من اول الصبح هههههه وروج ومسكرة (ليتني ماحطيت مسكرة ) وتشوفني وتبتسم قالت يلله نبدا قلت يلله ، شافتني متحمسة وتسولف معي واعطيها قصة حياتي هههه ، قلت لها ياشيخه ذا حمل عزيز يعني طفل انابيب وان زوجي وأهله وأهلي كانوا بيجون معي من شدة ماعم متحمسين ، وزوجي كل خمس دقايق يتصل وهي تضحك عالحماس ، المهم حطت الجل على بطني وتحرك يمين ويسار وتحرك وتحرك ، انا شفت وجهها بدا يتغير 😰 قلت لها وش فيك دكتورة ، قالت الجهاز جديد وانا اول مرة استخدمه 😰قلت دكتورة كيف ، قالت وش فيك انت شوفي الجنين قدامك هذا هو بس اصبري بنادي اللي تعرف للجهاز ، وتروح شوي وانا استغفر ، وشوي تجيني فلبينية قالت كيف حالك مدام ، قلت الحمد لله ياجميلة ، انا اذا شفتكم اكون بخير ، قالت يلله نبدا وبسم الله ، وتحط جل مرة ثانية وتحرك ، انا انتظر صوت بوم بوم بوم ، انتظر صوت نبض يابنات ، مافيه صوت ، وتحرك وتحرك ، وتقوم تجيب جهاز من غرفة ثانية وتحط على بطني ، قلت لها يادكتورة انا مو سامعه نبض ، قالت مقصر للجهاز ، وتحرك وتحرك اشوف الجنين بمكانه ثابت ولا حركة ، هنا هي وقفت ، طلعوا برا عند الباب ، انا جاني الخبر من وجيههم ، دخلت السعودية قلت لها تراي متعودة لاتخافين علميني ، الولد مات ، وهي ساكته وغرغرت دمعتها لأنه قبل عطيتها قصة حياتي ، وتجيني الفلبينية وتضمني ، قالت مدام انت كويسة اهم شي ، وبيبي اذا راح يجي بيبي ثاني ماتزعلين ، قلت يعني مات قالت ايوه ام سوري ، انا تنهدت تنهيدة قووويه ، ومابقى دعاء وذكر ماذكرته ، لا اله الا الله واللهم اجرني في مصيبتي ، ولله مدري وش دعيت وقتها ، المهم تمالكت نفسي ما احب احد يشوفني ضعيفة (ابو الطبع المخيس) واقوم وابتسم والبس ملابسي ، واطلع من عند الاشعه ، واروح برا المستشفى ، واجلس عالارض وأبكي وأبكي وأبكي وأفكر وش بقول لزوجي وش بقول لاهلي وابوي وام زوجي ، ياربي كيف بضيق صدورهم علي ،، واتمالك نفسي ويجيني مدري مين رجال يقومني يا اختي تشكين شي ، قلت لا بقوم الحين ، ويروح ينادي لي ممرضة ، وجوني الممرضات قلت وخروا عني انا زينه بس ما افطرت ، قمت قلت لازم ابكي لحالي قبل ارجع ههههههه ( وربي اني نقدت نفسي عقب ) واطلع وامشي وابكي الى ماحسيت قلبي هدا شوي ، وافتح جوالي والقى عشرات المكالمات لم يرد عليها ، اختي وزوجي وامه والكل ينتظرني خايفين علي ، رديت على زوجي قلت هلا ، قال وش فيه صوتك قلت مدري ولله بس الدكتورة ضيقت صدري تقول الجنين ضعيف مرررة ، وينهبل وشلون وكيف ، خل ينومونك ويعطونك مغذيات ، قلت لا برجع للبيت لاتكلمني تكفى ، قال فيه شي ، سكتت ، وهنا عرف ان الولد مات ، قلت الله يعوضنا خير ، الحمد لله ، قلت تكفى امك لايضيق صدرها ، واروح اكلم ابوي قلت له الحمد لله انا بخير لاتاكل همي ، من اتصالي بالصبح عرف اني موب صاحية هههههه ، قال وش ، الله يعوضك خير يابنتي ، وارجع لبيت اهلي ، وداخل عليهم ساكته واسولف واتقهوى واضحك ، وشوي جاني مغص وافجر بكاء ، وتبدا المعاناة حق شلون بيطلع الجنين 😩 أكره لحظة جعل ما احد يعيشها ، هالمرة الجنين اصغر ، ورحت للمستشفى قالوا ولا تطلعين قلت تكفون خلوه بكرة ههههههه حضرتي فيه عزيمة وودي احضرها ، ورحت من بكرة للمستشفى وعطوني طلق صناعي ، وولدت الحمد لله ورفضت اشوف الولد مع انه توه صغير مرة ، يوم طلع تحتي صديت عنه غصب ، وعقبه سويت عملية تنظيف الحمد لله وطلعت بالسلامة ، المهم كم يوم ويجيني تعب شديد جدددا وحرارة وشي تعب غريب ، واروح للمستشفى وتصير حمى نفاس تخيلوا ، ياربي ياشينها يابنات ، والحمد لله كم يوم وطبت ورجعت لحياتي الطبيعية وكل شي ، متفاءلة بما عند الله من خير ، ايه صح نسيت اقول لكم هههههههه يوم اني بروح للمستشفى كالعادة رحت سويت استشوار وبوديكير ههههههههه ، ياربي هل فيه احد مثلي افكر انه لازم اذا قمت اصير مرتبة