ولادتي بالبيت

هلا بكم ، ابدا لكم على طول ههههه ، من كم سنه كنت حامل ووصلت للشهر السادس ومات اللي ببطني ، هنا بديت افكر وين اروح ووين أولد وكيف بولد أصلا لجنين متوفي ، كنت حامل ببنت الله يتقبلها ويجعلها شافعه لي ، المهم طلعت لمستشفى وما استقبلوني ، ورحت لثاني برضو ما استقبلوني ، المشكلة ان حالتي الصحية مو مرة فما اقدر اروح اي مستشفى امكانياته مو مرة ، المهم ياطويلات العمر صرت بهالبنية الميته جوا بطني ادور من مستشفى لمستشفى ومن يوم ليوم ، والكل يدري بي ان ببطني بنت ميته وقتها ويدعي لي اني اولدها بالسلامة ، الى ماجا يوم ويضيق خلقي واجلس بالبيت ولا اروح مكان ، وشربت شوي اعشاب العصر وجلست ، وثم شوي شوي تجيني طلوق خفيفة ورحت للمستشفى وطلعوني ، ورجعت للبيت وطلبت لي عشا اتعشى ومعي مغوص خفيفة ، كانت الساعه ١ الليل تقريبا ، وانسدحت على سريري وزوجي قال بطلع شوي قلت تمام ، زوجي طلع من هنا انا احس بشي فجر من تحتي ، اثاري موية الجنين نزلت ، انا وقفت خفت على سريري ههههه وخفت على نفسي ، قمت اركض للحمام وانتم بكرامة لأني مو مستوعبة بوقتها ان هالمويه اللي نزلت هي موية الجنين، قلت ياربي وش ذا ، الا يجيني ذاك الطلق القوي الحامي ، طلق الولادة ، وانا واقفة عند باب الحمام ، وشوي يابنات تبدأ المصيبة ، صرت أصب دم ، كأنه عرق انقطع ، بنات دم مااتخيلون قوته ، ويصب صب ، انا واقفة اتفرج على نفسي مو فاهمة ولا شي ، مو مستوعبة ، مدري مصدومة ، المهم شوي تجي طلقة قويه ثانية واصرخ واصرخ ، وشباك الحمام مفتوح ، انا للحين مو مستوعبة ان اللي فيني ولادة ، وسمعني السواق ، وقتها كنت لحالي بالبيت ، اصرخ اقول ياربييييييه أي احد يسمعني يلحقني ، واصرخ ، وسواقي عرف ان عندي مصيبة وعلى باله حرامي داخل للبيت وراح يركض واثاري الحمد لله زوجي بالشارع وشافه وقال مدام تصرخ اركض عندها حرامي ، قال طيب رح انا بدخل لحالي ، دخل زوجي يركض يدورني انا صوتي بدا يهدا من قوة الدم اللي ينزف معي ، شوي سبحان الله تجيني طلقة قويه بدخلة زوجي وتطلع البنت قدامي وقدامه 😭 صارت معلقة بيني وبين الارض بالحبل السري حقها تتمرجح بين رجولي ، انا اشوفها وهي تتروش بالدم واصرخ ، يوم شفت زوجي هجدت بلاي كنت خايفة لأني بلحالي وبالحمام ، ذا اللحظة زوجي جته مثل الدوخه من هول الموقف ، يطالعني قدامه والبنت وصلت للارض والمشيمة عالقة برحمي ، المهم انا شفت البنت ويكيت ماتحملت المنظر ، ولا اقدر يابنات انزل نفسي اسحبها من الدوخة ، هنا بديت افقد الوعي شوي والتركيز ، قلت لزوجي بسرعه جب فوطة ارفع البنت من الارض ، وهو يبكي قال مقدر ، وانا واقفة واقول تكفى رح جب فوطة صغيرة لف فيها البنت ، هو جلس عالارض اشوف دموعه ثم قام راح للمطبخ اسمع صوت طقطقة مواعين هههه اثاريه سحب لي الفوطة من تحت الصحون المغسولة ، وجاني وهو مغمض يناولني الفوطة قلت اسحب البنت شلها ، تخيلوا يابنات ولله ماقدر يمسكها ، هنا اضطريت انا اتمالك نفسي وانزل وسميت ومسكت البنت وسميت عليها ولفيتها بالفوطة ، واشوف اثاري الحبل السري لسه ما انقطع داخل رحمي ، ومن قل الوعي سحبت البنت واسحب الحبل بدون اي تفكير واثاريني قصيته غلط ويدخل الحبل جوا الرحم مع المشيمة ، هنا شالني زوجي انا والبنت لمستشفى مدينة فهد ، دخلت عليهم وانا مغمى علي ، فقدت الوعي من شدة النزيف ، دخلوني غرفة العمليات وسووا لي تنظيف الحمد لله ، قمت وهم ناقلين لي اكياس دم ، نقلوا لي دم كثير ، فعليا يابنات جسمي فضى مابقى يمكن ولا نقطة دم وحدة ، ودخلت للعناية يوم ، والحمد لله صحصحت من بعدها وطلعت نفاس ، اذكر شكل البنت اخر خبري بها وهي على حضني كنت ضامتها وانا بطريقي للمستشفى ، شالوها المستشفى مني طبعا وكشفوا عليها وقالوا سليمة جدا مافيها شي ، الحمد لله ربي اختارها تكون شافعه لي ولزوجي يوم القيامة باذن الله ، الله لايحرمني شفاعتها ، وعقبها قمت الحمد لله والشكر لله وثم حملت حمل ثاني قصته تحتاج موضوع جديد ههههههه ،، مايستفاد من القصة ، لاتاخذون اي اعشاب ممكن تعجل لكم بالولادة ، ان ربي كتب ووحدة نزل لها جنين قبل توصل للمستشفى لا تقطع الحبل السري الا اذا هي تعرف والا تنتظر المستشفى يقطعونه لها عشان المشيمة ماترقى فوق ..