ولادتي ببكري وتجربتي لابره الظهر..مستشفى دله بالرياض

الحمل والإنجاب

السلام عليكم ياحلا كروشات..........


تاريخ 20 \6 يوم الخميس ربي فرجها علي والحمدلله وجبت عبودي بكري لبى عيونه...

عقبال كل حامل يارب......

كان يماكان هههههههههههههه امزح امزح المهم انا لي اسبوعين بتاسع وكنت متوقعه اني باخذ من العاشر كم اسبوع لان بطني كان صغير وكنت مره خفيفه يعني ماني حاسه بثقل
يوم جاء يوم الاربعاء العصر كنت طفشاااااااااااااااااااااااااااانه مره قلت لزوجي ابي اروح لاهلي قالي اوكي مافيه مشكله بس بشرط نوم هناك مافيه قلت اوكي رحت لاهلي وجلست مع امي
اذن العشاء قلت لمي وش رايك نتعشى برا ونروح السوق احس اني طفشاااااااااااااانه قالت اوكي دخل ابوي علينا قلت تروح معنا قال اوكي طلعنا نتمشى ونتعشى >>>حلوه نتمشى ونتعشى هههههههههههه
المهم جت الساعه 12 ونص ونزلوني اهلي بيت اهل زوجي لاني ساكنه معهم المهم وادخل غرفتي ونمت جت الساعه 4 ونص الفجر واقوم من النوم والاقي ملابسي فيها مويه خفت قلت وش ذا طبعا
انا عارفه ومتاكده انها ولاده بس جلست اكذب على نفسي اقول لالا مويه انكبت علي من السقف خخخخخخخخخخخ والله ارحم واقوم الحمام اغير ملابسي طبعا المويه مو كثيره لا يعني
مو مثل ماتخيلت كانه صنبور مفتوح لااااااااا اقليل مره واطلع من الحمام واصحي زوجي واقوله قام زوجي قال يالله على المستشفى يوم قاله بكيت انا هنا رحمت نفسي تدرون وش الشعور
شفتي اول مادرستي الابتدائي اول يوم داومتي صح بطنك وقلبك يوجعك نفس الاحساس المهم يوم صحت قال زوجي خلاص بعطيك فرصه بروح الحمام اغير ملابسي واجي >>>امحق فرصه
عاد الرجال وش يفكرون الولاده انه على طول يطلع مافيه تفاهم مافيه تعذيب ..لبست عبايتي وطلع من غرفتي وجزمتي بيدي مابي احد يسمع صوتي والله وانزل من الدرج الا تطلع اخت زوجي
عاد اهي حامل متوحمه وجت عند اهلها قالت وش فيك علمتها قالت بروح معك انا بصراحه عييت لاني مابي تروح وتشوف ولادتي وتخاف عاد اهي بكريه مثلي قالت لا بروح معك قلت يالله
ونركب السياره وطيرااااان على مستشفى دله دخلت على الطوارى كانت الساعه5 تقريبا وادخل وسدحوني على ذاك السرير ودخلت علي دكتوره مصريه اسمها ايه الله لايوفقها قولو امين
قامت دخلت يدها بغيت اموت والله احس روحي طلعت قمت اصيح ودفيتها قامت تهاوش وتطلع من الغرفه وتقول دلوعه اوي قامو خذو مسحه عشان يتاكدون اهو المويه الي نزلت ولالا
قالت لاخت زوجي بس واحد سانتي مفتوح طلعوني على غرفتي فوق وجلسنا انا وزوجي واخته على التلفزيون قامو حطو علي جهاز نبض الجنين ياكرهيله ياهو ممل ودي اقوم واكسره فوق روسوهم
وشوي دخلت على دكتوره باكستانيه قالت لازم اكشف عليك انا هنا جلست اصيح صياح قام زوجي قال معليش اخر مره بس هلمره وخلاص قلت طيب والله لبى قلبها ياناس دخلت يدها ولا حسيت ابدا
يوم خلصت شافت الجهاز النبض تغييييير وجهها وطلعت ماقالت شي ونادت زوجي انا هنا بغيت انهبل قلت اكيد البيبي مات شوي دخلت على ممرضه وشالت الاجهزه قالت يالله روح فوق غرفه ولاده
سالت زوجي قلت وش فيه قال لا بس الجنين نبضاته تنزل وتطلع بس تراها عادي كل الناس كذا الا اصلا وجهه اسووود اناخفت مره خلاص كنت اقول يارب اموت وافتك
ودوني غرفت الولاده وحطو الجهاز ثاني مره ولا النبضات رجعت طبيعيه صارت المشكله من نومتي عشاني انام على ضهري واذا نمت على ضهري تنزل النبضات المفروض انام على جنبي
الايسر بعدين جت ممرضه فلبينيه كشفت على قالت 2 سانتي مفتوح وطلعت طلبت دكتورتي على طول لاني ماحبيت احد من الموجودين شوي واحس بالام الام يموووووووت
احس نفسي ينقطع جلست اصرخ ابي اتحمله ماقدرت والي يقولون مثل الم الدوره كذااااااااابين وين فرق كبير بعدها تذكرت اني ابي ابره الظهر واقول لزوجي ابي ابره الظهر
قال طيب وتدخل اخت زوجي تقول تكفين لاتاخذينها والله انها تخوف الابره قمت اصيح قلت لا لا ماقدر بموت هذا حدي وين اصبر لعشره سانتي بموت قالت خلاص
وشوي ويدخل زوجي ودكتور مصري مره حبوب ويده خفيفه اعطاني الابره وهو يعطيني اياها قال لاتتحركين ابدا قلت طيب شوي وتجيني طلقه واتحرك واصيح قام
سحب الابره واعطاني اياها مره ثانيه قام قالي انتي اكثر حاله شفقت عليها انتي خوافه عاد بعدها طلع وانام نومه ماحسيت الا الساعه 11 الظهر تصحيني دكتورتي ايه السودانيه لبى روحها سلمت علي وقالت يالله ابي اكشف
قلت لاتكفين مابي لاني كنت متوقعه اتالم زي اول قالتلي والله ماتحسي خلاص مافيه الم الابره بنجتك ماتحسين قلت خلاص وكشفت قامت تصرخ تقول الراس قرب يطلع
ولانتي حاسه يالله يالله ولاده ولاده غرفت الولاده ودخلوني غرفه الولاده شوي التفت وراي الى زوجي داخل واثق انه بيدخل بعد بالولاده قلت وين ياحلو برا لو سمحت قال
لا بدخل يانا ياختي اما انتي لحالك لا قلت طيب يالله اختك تدخل بس انت لا ودخلت اخته معي وجلست تقرا علي عاد بعدها قالو يالله ادفعي طبعا بما اني مبنجه كنت ادفع
ولا احس بشي ابدااااااااا قامت الدكتوره ساعدتني لين طلع احلى عبودي وكان وزنه صغير شوي 2كيلو ونص.....

اما عن المستشفى """
1- نظاااااااااااااااافه فضيعه وحلوه..
2- اهتمام مره حلو
3- دكاترتهم مره حلوين
بالعربي كل شي حلو اتعب وانا اقول حلوووووووووووو
اما الابره الظهر الحمدلله بعد الولاده بساعه رجعت طبيعيه ورجع احساسي ولا الم ولا صداع ولا شي الحمدلله هذا من فضل ربي...

واي سؤال انا موجوده******

67
9K

يلزم عليك تسجيل الدخول أولًا لكتابة تعليق.

تسجيل دخول

دمعة امي
دمعة امي
الحمد الله على سلامتك

والف مبروووووكـ


عقبااااااااالي وكل مسلمة ياااااااااااااااااارب
الجمال انا موجزه
الله يسلمك

الله بفرجها عليك وكل الحوامل....
فراشـ حواء ـة
فراشـ حواء ـة
الحمدلله على سلامتك يتربى العريس بعزكم يارب
دعواتك يرزقني الولد الصالح كامل الخلق والخلقه ويسهل حمله وولادته
نونو_الكويت
نونو_الكويت
الحمـــــــد للـــــــه علـى سلامتـــــــج
ميمة خالد
ميمة خالد
الحمدلله على سلالالالالالالالالالالامتك
ويتربى بعزك