عزيزاتي و احبائي و اخواتي في عالم حواء ..يارب تكونوا كلكم بخير ..الصراحة انا كنت متردده اني اكتب موضوع ولادتي ..بس قلت طالما عندي من النصائح كتير لازم اشارك حبايبي هنا علشان الكل يستفيد
انا الحمد لله حملت بعد معاناه وانتظار 3 سنين و كنت مقيمة في قسم تأخر الحمل.. ربنا يرزق اخواتنا هناك كلهم الحمل السليم المعافي..امين
انا من اول حملي والبيبي مستعجل عاوز ينزل ههههه سبحان الله ...في اول الشهور كنت مهدده بالسقط واضطريت اني انام علي ظهري مده طويلة وطبعا اخد المسبتات..المهم عدو الشهور بسرعه ووصلت لأخر الشهر السادس .. و من وقتها وانا احس ألم يجي علي فترات ويروح لحد نص الشهر الثامن الالم بقي قوي و بيزيد و لما رحت للدكتورة للمتابعه كشفت عليا و قالت الوضع سليم جدا و الرحم مقفول والبيبي مش نازل الحوض...اهم حاجة اني ارتاح واخد الادويه اللي هي كاتبتها ليا علشان توقف الطلق...وقالتلي تعالي بعد اسبوعين..المهم فات اسبوع والالم مازال موجود ومقدرتش اتحمل..اتصلنا بالدكتورة قالت متستنوش وتعالوا بكره ضروري..روحت والدكتورة خدتني اعمل تخطيط الطلق وبعدين سونار(التراساوند) كله كان تمام لحد ماروحنا لدكتور السونار كان وجه زي ما يكون مش مبسوط..وقال ان ماية البيبي قليلة و الحبل السري باين رفيع والبيبي صغيرة ده غير انها بوضع مقعدي ..وقال ان لازم اتحجز تحت الملاحظة لمدة 5 ايام.. وقعد يطمني ان كل شيء هايكون كويس ( ان شاء الله) واتحجزت فعلا لـ 5 ايام ..و الـ 5 ايام بقوا 7 و الـ7 بقوا 10. والحمد لله في اخر الـ 10 ايام قالولي ان البيبي الحمد لله وزنها اتعدل و المية بقيت كويسة بس لسه راسها فوق وان احتمال القيصري بيزيد خصوصا ان الحوض عندي ضيق..المهم سلمت امري لله وروحت البيت و كنت الحمد لله كويسة...لكن تاني يوم بدأ نفس الموال ...تعب و الم ..وكنت وقتها في اول اسبوع في التاسع وعلي اخر الاسبوع ده رحت لدكتورة الولاده علشان تتابع معايا لحد وقت الولادة كشفت عليا وقالت كله تمام..والرحم لسه مقفول والبيبي مش في الحوض ..تعالي بعد اسبوع..بعد اسبوع رحتلها وبعد ما كشفت قالت الرحم مازال مقفول بس عنق الرحم رقيق جدا و ان الطلق اللي فيا ده شئ عادي علشان الرحم بيستعد للولاده.. كنت ساعتها في الاسبوع 38..والدكتورة قالت طالما الوضع مستقر خلاص يبقي نستني اسبوع كمان ومعلش استحملي..هانت...وقالتلي اخد الدواء اللي بيوقف الطلق ضرور لان غلط كتر الطلق عليا و علي البيبي خصوصا واني خلاص مقرر ليا قيصري..وقالت نستني ليوم 16 ونعمل العملية..قلت ماشي ..خلاص الخيرة فيما اختاره الله..روحت البيت و بعد اليومين بدأ الجد..الالم كان مختلف..الم في بطني و الم في ظهري ..والم في كل حته فيييييا ..مكنتش بنام وفقدت شهيتي و بطني حسيت انها نزلت لتحت ..اتصلنا بالدكتورة وقالت لازم نروح المستشفي حالا..كان يوم الربعاء 11 نوفمبر وكنا وقتها بالليل ..استقبلتني دكتورة الطوارئ وملت الاوراق و امرت بحقنه مسكنه علشان اعرف انام لحد ما دكتورتي تجي بكره... طلعت الاوضه وجت الممرضة واعطتني الحقنه..و ساعاتها حسيت بالم غريب..مع ان المفروض انها مسكن إلا اني حسيت العكس....المهم معرفتش انام وطلع الصبح وجت الدكتورة بتاعت الولاده وكشفت عليا ..وساعتها بطني كان متحجر خالص ..قالتلي ان ا لدكتورة الاستشاريه جايه النهارده ولازم تكشف عليا علشان هي اللي لازم تمضي علي ورق العملية ..المهم جت و كشفت عليا و قالت ان حجمي ووزني مايستحملش الولاده الطبيعي ( وزني و حجمي صغيرين) ده غير ان البيبي بوضع مقعدي.. ومضت علي ورق العملية(علي انها تكون يوم 16) وامرت اني اعمل سونار و تخطيط علشان نتطمن علي البيبي..المهم التخطيط بين اني فيا طلق و عن السونار عرفت بعد كده من دكتورة المتابعه لما جت تزورني ان الحبل السري ملفوف حولين رقبه البيبي ..نفسيتي كانت خلاص في الارض ..الم وتعب و حموضه و عدم نوم وفقدان شهية وكمااااااااان الحبل السري حولين رقبه البيبي..قعدت ابكي لحد الليل ما دخل ( ده كان يوم 12)..وابديت احس بتقل اكتر والم ابتدي يوصل حتي لحد رجولي ..خصوصا رجلي اليمين ...وطول الليل راحه جايه علي الحمام...حاسه كأن شيء هايقع مني ...وطول ما انا ماشية ..ماسكة بطني بايدي ورافعها لفوق هههههه خايفه لاتوقع.....حاولت انام طول الليل لكن بدون فايده ..والصبح (يوم 13 )والممرضة بتقيس الضفط لاحظت ان ضغطي مرتفع ...وشكلي تعباااااااااان وعيوني منكسره ( اكيد طبعا ما انا بقالي اسبوع عيوني ما ذاقت طعم النوم ده غير الم الطلق اللي فيني) المهم سالتني ..انت بخير؟؟؟ ...ضغطك مرتفع و طول الليل مانمتي و راحه جايه في الممر !!!...اطلبلك الدكتورة؟...قلتلها لا...انا كويسة
دخلت الاوضه و علي الساعه 10 الصبح جت الدكتورة ولما شافت منظري ماكانتش مفجأة ..اصل الممرضه السوسه قالتلها هههههه:S_45:..كشفت علي بطني وكانت زي الحجر وقلتلها علي الالم اللي حسه بيه..قلتلي هاكتبلك علي حقنتين ..مسكن و الحقنة التانية علشان تنامي ولو شويه ..قالتلي معلش استحملي شويه..علشان حتي لو هانعمل العملية النهارده ..مش هاينفع دلوقتي لان في عمليتين شاغلين بالفعل تحت ..قالتلي حاولي تنامي دلوقت و بعد ساعه هاجي اشوفك ..ونقرر...المهم مشيت والممرضه اعطتيتني الحقنتين.. وهنا حسيت كان صاروخ ضرب في ظهر و رجولي وبطني....مسكن ده ياربي ولا معذب ؟؟ ..بعد ساعه حسيت بحد بيمشي ببطء في الاوضه..بصيت ..وكانت الدكتورة..جاية تشوفني..هههه وكانت فاكرني نايمة اول ما شافت وشي قالت...يالله..انتي لسه صاحية:024:؟؟؟ دا انتي واخدة حقنتين...!!! قلتلها انا حسه بأسوء من الاول...الم فالحوض ورجولي وظهري زي الشواكيش وعمال يزيد...قالتلي طب حاولي تنامي وهاجيلك بعد ساعه كمان.....هي مشيت من هنا وانا قمت من هنا ..فضلت راحة جاية في الاوضه..وافتكرت كل اخواتي هنا في المنتدي لما كانوا في وضع ولاده وقلت يارب هاونها عليا...المهم حسيت اني زهقت ..قلت خلاص ارح اشوفهم طابخين ايه في البوفيه النهارده:hahaha: ...هههههه جعانه يا ناس ..بقالي اسبوع ماكلتش.. رحت وجبت الطبق ..وقعدت علي السرير و لسه هاحط الشوكه في البطاطس لاقيت الدكتورة علي الباب ...بتعملي ايه؟؟؟؟؟؟؟؟؟؟؟...قلتلها....امممممم ولا حاجه ( انا حسيت اني عملت مصيبة وان مش داريه):huh:...جت و خدت الطبق مني بسرعه وقالتلي لالالالالا مفيش اكل طالما هاننزل عمليات ورجعت الطبق للبوفيه تاني :icon33:..ههههه المهم هي حست ان نفسي صعبت عليا..قعدت تحضني وتقولي متاخفيش ..كله هايبقي تمام ..وخدتني علشان تكشف عليا ..ويادووووب انا طلعت علي كرسي الكشف وقبل ما الدكتورة تحط ايدها...كيس الميه اتفتح و الميه كلها وقعت علي ايد الدكتورة ...الحمد لله...اصلي نسيت اقولكم ان الدكتورة كانت قايله لي لو الرحم مافتحش قبل الولاده..هاديكي طلق صناعي لمده ساعه قبل العملية علشان الرحم يفتح...علشان بعد العملية الرحم ينضف نفسه بنفسه كما لو كنت والده طبيعي
المهم ..قالت للممرضه توضبني علشان العمليه..وعلي الساعة 3 ونص نزلت عمليات...وقعدت الممرضه توضب فيا وجه دكتور التخدير و خدت حقنة الظهر الحمد لله وبدأو العمليه الساعه 4 وانا كنت بنام واقوم من الدوخة( معذوره بقالي اسبوع مانمتش..وكمان استنشقت اكسجين علشان صعوبة التنفس)و فجأة صحيت علي صوت دكتور التخدير والممرضه العالي...سمعتي؟؟؟ سمعتي؟؟؟....وانا...لا...في ايه:32:؟؟..وبعدها سمعت....واااااااااااااء ..واااااااااااااء.... الساعه 4 و 9 دقائق جت احلي مريم في الدنيا ..كانت 2 كيلو و 800 جرام..اه يا قلبي فرحه لا توصف..ياااااااااااااارب ماتحرم حد الفرحه دي ابدا
معلش طولت عليكم اووووووووي ..بس زي ما قلت انا في غربه وحبيت افضفض معاكم
دلوقتي بقي نجي لاهم حاجه..والنصايح ديه لو مشيتو عليها والله ثم والله راح تشوفوا ازاي ان من اول اسبوع بطنكم راح تختفي ( الكرشه)..دا غير ان الغازات راح تكون قليله..والصحه راح تكون عال
اولا لازم يكون عندك الكورسيه المخصوص لما بعد العمليات القيصيريه..ولازم تلبسيه علي قد ما تقدري طول الوقت..
ده النوع اللي عندي واللي انا استعملته
ده نوع تاني ..برده من نفس الماركه
Orlett
بالنسبه للاكل والشرب
اول ما يسمح لك الطبيب بالشرب...اشربي ماء دافئ علي دفعات و بكميه قليله وحذااااااري انك تشربي كميه كبيرة مرة واحده
من تاني يوم العمليه..كلي الاتي فقط...
شوربه فراخ ( الميه بس) بدون خضار + صدور الفراخ المسلوقه ..والافضل لو شربه ديك رومي..صحية جدااااااااااااااا
زبادي سادة..بدون فواكه
لبن رايب....ام اللبن العادي ممنوع
تفاح اخضر مسلوق ومهروس...اكرر ..تفاح اخضر ..مش اي نوع اخر
عصير تفاح احضر...او عصير توت متنوع ..بس لازم يكون طبيعي ( في البيت اي حد يغلي شوية توت مشكلين ..بدون سكر او عسل..ويصفيهم ..ويجيبلك عصيرهم ).. مفيد جدا هو والتفاح
من رابع يوم كلي اللي تحبيه بس احذري ي ي ي ي من اكل المخبوزات والدهون...والسكر يكون قليل ..والافضل يكون عسل ...الخضراوات والفاكهة بعد اسبوع من الولاده ويكونوا بكميه معقوله
احذري ..الخيار من الممكن ان يجعل براز طفلك مائل للون الاخضر...وكتر الفاكهه يسبب الغازات لك ولطفلك..اكلك للشكولاتة والموز يسبب مغص لطفلك فتجنبيهم
نصيحة اخري ..شرب الشاي بالحليب له مفعول السحر في زيادة لبن الام و كذالك الماااااااااااااء ..اعلمي ان اكتر من نسبة 88% من لبن الام هو ماء
يـــــــــــــــــــــــــــــــــــــارب اكون افدتكم ..
واي سؤال انا في الخدمة.
الله يخلي لك مريم وتشوفيها عروسه
ماشالله عقبالنا
عجبني اهتمام دكتورتك___ نادره في هذي الايام