ولادتي في مستشفى الولادة والأطفال الدمام

مرحبا

الحمدلله ولدت بالسلامة قبل اسبوعين يوم الجمعة 29 محرم 1431
15-1-2010
ورزقنا الله ولد سميناه " محمد "

قبل ولادتي بفترة كنت ابحث وادور عن تجارب للولادة بمستشفى الولادة والاطفال المبنى الجديد في الدمام لكن كالعاده ناس
تذم وناس تمدح الين لقيت موضوع بمنتدى ثاني للاخت اخر العنقود وماشاء الله عليها موضوعها كان شامل
عن ايجابيات وسلبيات المستشفى وارتحت لموضوعها وطمني تقريباً للمستشفى وقررت اولد فيه

مااطول عليكم في المقدمة بس كنت ناوية اكتب تجربتي في المستشفى علشان اللي ناوية تولد فيه تستفيد من موضوعي
وتدعي لي وتكون عارفة كيف نظام المستشفى وكيف راح يتعاملون معاها وماتروح مثلي على عماها :35:

كان مقرر تاريخ ولادتي 1-1-2010 الموافق 14 محرم 1431 وكانت متابعتي في مستوصف

وجى التاريخ المحدد ولاولدت وقبلها بأسبوع وقفت مااروح متابعة فكنت احاتي ومتخوفة مرة وبعدها بأسبوع رحت المستشفى قسم الطوارئ علشان اسوي اشعة واتطمن والحمدلله قالوا لي كل شي طبيعي وسالوني اذا ابغى اتنوم ويعطوني طلق صناعي طبعاً انا قلت لا مادام كل شي طبيعي باانتظر الين تجيني ولادة وطلعت على مسؤليتي
ومر الاسبوع الثاني ولا فيه اي بوادر ولادة وتعرفون كيف اللي تعدي موعدها تتأزم نفسيتها وقررت استخدم خلطة قريتها هنا بالقسم " حليب - قرفة - عسل - زيت السمسم " وصرت اشربها كل ليلة بالاضافة الى منقوع الزعفران

ويوم الجمعة صحيت الصباح على الم خفيف بس قلت يمكن مثل الالام المعتادة اللي تجيني ورجعت نمت بس كانت تصحيني كل مرة تجي فقلت يمكن ولادة خلني اقوم اسبح اضمن لي و7 ونص قمت وسبحت وتنظفت وجهزت باقي الاغراض في شنطتي واغراض ولدي وجلست اكل تمر واقرأ قرآن وكانت التقلصات منتظمة كل 6 دقايق ولما زاد الألم الساعة 9 صحيت زوجي وانا الألم عندي منتظم وعادي يحتمل وهو يقول لي تبين تروحين المستشفى

وانا اقول لا ماابي اروح بدري اكيد ماباولد الا الظهر << واثقة :35:

مع العلم ان هذا حملي الثاني ,, و 9 ونص فجأة زاد الألم وحسيت بضغط شديد وكأن البيبي خلاص نزل تحت بالحوض
وخفت مرة وكنت بااتهور وباروح مستشفى خاص جنب بيتي بس قلت لا المشوار للمستشفى كله ربع ساعه اكيد ماباولد بالسيارة :hahaha:
وطلعنا وديت ولدي بيت اهلي وطيران للمستشفى وزوجي خايف كل ماشافني اصرخ من الألم زاد السرعة وشغل الخطر وحتى الاشارات قطعها :icon33:

وصلنا مستشفى الولادة والأطفال قسم الاسعاف ومعاي زوجي الا مكتوب على الباب ممنوع دخول الرجال

وبغيت اصيح اني بااكون لوحدي :44:

وعلى فكرة اللي ناوية تولد فيه وماعندها هناك ملف ضرووووري تاخذ نسخة من بطاقة العائلة

انا كنت مجهزتها مع اوراقي حق المتابعة والتحاليل

قالت لي موظفة الاستقبال انتظري الحين تجيك الممرضة حق تقيس الحرارة والضغط بس لما شافوني اتألم دخلوني على طول وجات دكتورة وكشفت
<< وترى كشفتهم يابنات مايألم ابد ماحسيت بألم يدها خفيفة ماشاء الله

الا تقول 8 سم

انا فتحت عيني مستغربة توقعت مفتوح 4 او 5 بس ماشاء الله الطلق كان حامي

وعلى طول نقلوني فوق غرفة الولادة وطبعاً كل وحده بغرفة لوحدها وعطوني لبس المستشفى واخذوا اغراضي وملابسي يحطوها في الامانات بس خليت جوالي معي

وحطوا لي جهاز تخطيط لنبضات البيبي وللطلق وكانت الساعه 10 تقريباً جات الدكتورة بعد فترة تكشف الا تقول مفتوح 9 سم

وكانت تقول لي لما يجيك الم تنفسي لا تصرخي وسبحان الله فعلاً الشهيق والزفير يخفف الألم كثير عكس لما الوحده تصرخ بيزيد عندها الالم فكنت اسمع صوت الجهاز لما يجي الطلق على طول اتنفس بالقوة حتى حسيت اني شفطت الهواء من الغرفة من الخوف هههههه :hahaha:

وقلت للدكتورة ابغى مسكن وعطوني ابرة مسكن في المغذي وخفف علي الم الطلق كثير وعطوني اكسجين بس مافيه مخدر

وكنت اقول للدكتورة لازم تسوون لي توسيع ؟ حاملة هم الخياطة بعدين ,, فقالت لي ايه الطفل الثاني لازم

وطبعاً مع كل طلقة تجي قالت لي الدكتورة اشد علشان ينزل البيبي وحطت لي ابرة مخدر موضعي علشان التوسيع
وشديت مرتين والثالثة طلع ولدي الحمدلله بالسلامة الساعه 11 الا عشر
وقمت اصيح بس ماادري ليش :icon33:
وعلى طول حطته على بطني ومسكته علشان تقص الحبل السري واخذته على جنب تنظفه وماادري شنو تسوي بعد لأن فيه ستارة مااشوف وش تسوي بس اسمع

اللي تعبني ان كانت قابلة وحده يعني اخذت البيبي وراحت وخلتني والمشيمة لسه داخل ورجلي تعبت وانا رافعتها وبما ان المشيمة موجودة فيكون فيه طلق بعد فخلتني تقريبا ثلث او نص ساعة وكنت أتألم مرة مع كل طلقة تجيني

بعدين جات وقالت لي اشد علشان تطلع المشيمة ولما طلعتها عطتني ابرة ثانية مخدر موضعي وبدت تخيط

بعدها بنص ساعة جابت لي ولدي علشان ارضعه ونقلوني غرفة ثانية يخلوني فيها الين ادخل الحمام واتبول - الله يعزكم - ولما يشوفون الوضع طبيعي خلاص ينقلوني لقسم التنويم

بس كان ذاك اليوم زحمة مرة ومافيه سرير فاضي فخلوني الين العصر وقت الزيارة ومانقلوني الا الساعة 5 العصر

وفي هذي الغرفة اللي نقلوني لها بعد الولادة فيه ممرضة مسؤلة كل شوي تجي وتغير المغذي وكانت مرة متعاونة وطيوبة حتى لما قلت لها باروح الحمام ساعدتني في قومتي من السرير ومسكتني لين وصلت الحمام وانا قلبي مكسور عليها لأنها حامل وشكل حملها متقدم الله يسهل عليها :)
واعطتني فوط صحية وانتظرتني الين طلعت من الحمام ورجعتني للسرير
والظهر جابوا لي الغداء ,, وفي هالغرفة كانوا معاي 2 بعد توهم والدات

والعصر نقلوني للغرفة وغرف التنويم يكون فيها 2 بس والغرف حجمها كويس ونظيفة مرة وعاملات النظافة يجوون ينظفون الغرفة والحمام كثير باليوم يعني اكثر من 5 مرات

ويعطوني فوط صحية وحفاظات للبيبي ولبس لي بس ,, يعني اللي بتروح تولد فيه لازم تاخذ معاها كل احتياجاتها من ملابس وصابون وشامبو ومناشف وحتى الفوط الصحية لأن اللي بالمستشفى ماعجبتني حجمها صغير ماتنفع لبعد الولادة مباشرة اتوقعها تسرب

وبالغرفة فيه مثل الجهاز علشان تنادي به الممرضة وبدل ماتجي لك تقدر تتكلم معاك من هذا الجهاز وتسألك وش تبين

انا بعد ولادتي جاتني الام مثل الطلق خصوصاً لما ارضع ولدي يقولون هذي تقلصات علشان الرحم يرجع لوضعه الطبيعي فكنت كل شوي اناديهم اطلب مسكن ويجيبون لي حبة بروفين وحبة ادول

يوم ثاني الصباح جاتني دكتورة تشوف الخياطة وكيف الوضع وتجي بعد دكتورة اطفال تشوف البيبي
وجات بعد اخصائية رضاعة طبيعية تتكلم عن الرضاعة وتعطي نصائح وجات اخصائية تثقيف صحي اعطتني ورقة فيها تمارين بعد الولادة وتتكلم عن التغذية وعن العناية بالجرح والعناية بالطفل

وجات مندوبة مبيعات اعطتني عينات من جونسون وكريم سودو وديتول وحفاظات بامبرز

طبعاً البيبي يكون عندي على طول وماياخذونه الحضانة الا اوقات الزيارة ,, بس ياخذونه كل يوم الصبح علشان السباحة

بالنسبة للأكل مو منتظمين في مواعيدهم يعني احيانا يجيبون الفطور الساعة 6 واحيانا الساعة 8 , والأكل بارد على الاقل يجيبون حليب ساخن او شاي وقت الفطور وبعد الفطور بساعتين تقريباً او 3 يجيبون وجبة خفيفة كيكة وعصير وتمر
والغداء الساعه 2 والعشاء الساعة 8
ومايسألون الوحده اذا فيها امراض او شي علشان يشوفون الاكلات اللي تناسبها يعني مثلا مرتين جابوا لي فول على الفطور وفاصوليا على الغداء وانا معاي انيميا الفول وممنوعة منه :35:

من الايجابيات في المستشفى اهتمامهم لو كان في الطفل او الام مرض او مشكلة ,, ولدي كانوا شاكين ان معاه مشكلة في القلب فعلى طول حولوه يسوون له اشعة وخلونا يوم اضافي بالمستشفى علشان يوم ثاني يسوون له اشعة التراساوند وفعلا يوم ثاني جات اخصائية امراض القلب بنفسها ومعاها جهاز الاشعة وسوت لولدي الاشعة عندي بالغرفة والحمدلله طمنتني ان مافيه شي وقلبه سليم

من سلبيات المستشفى ان اذا كان المولود ذكر مايطهرونه بنفس الوقت لازم بعد مااطلع نروح ناخذ موعد من الطبيب الجراح في العيادات الخارجية ولما رحنا لهم بعد ولادتي باسبوع تقريباً قالوا مافيه موعد الا بعد شهرين :mad:

هذي تجربتي في المستشفى والحمدلله ارتحت فيه وانصح اللي تفكر تولد بحكومي ان تولد فيه

واسمحوا لي الموضوع شوي ملخبط بس لأني كتبته في ملف وورد على اجزاء وكل يوم اكتب شوي لما يصير عندي وقت

واللي عندها اي سؤال بخصوص المستشفى او نقطة ماذكرتها لا تتردد في مراسلتي على الخاص او ذكرها هنا على العام

تحياتي للجميع