ولادتي واجتهادي الله يكتب الاجر

السلام عليكم ورحمه الله...

حبيباتي استفدت كثير منكم وحابه اذكر تجربتي عشان تستفيدو


قبل كل شي نصيحه الولاده وتيسيرها من الله لاتفكيرين كثير
وتتعبين نفسك اسالي مجربه.


انا الحمد لله صارلي 25 يوم من ولدت
الاولى كانت قيصريه وكنت ابي اولد طبيعي واتفقت مع الدكتور
وكان الوضع الحمد لله اوكي خصوصا اني اخذت وقت طويل بين الحملين اربع سنوات. واجتهدت والحمد لله لكل مجتهد نصيب
بذكر الاشياء اللي استعملتها ومحاولاتي عشان اولد طبيعي

*بديت في الشهر السابع رياضه طبعا خاصه بالحمل

* استخدمت خلطه الحليب والقرنفل وزيت السمسم بعد مادخلت التاسع
وكنت اشربها مرتين بالاسبوع.

* اشرب كمون كل صبح من الشهر الثامن.

* لما انزلت السداده في الاسبوع التاسع والثلاثين من الحمل نهار يوم خميس

اخذت حقنه شرجيه من الصيدليه اخذتها بالليل والجمعه الصبح . عقبها بدا الطلق معي وكان شديد وقلت لا لا بصبر
مابي اروح للمستشفى الا وانا خلاااص لان بالبكر استعجلت.
استمر الطلق معي من الصبح وكل ماشد علي نمت وخليت الشغاله
تدلك جسمي بزيت سمسم عشان ارخي العضلات وارتاح ساعه انام واصحى على الالم صح الالم كان شديد بس شعور الفرحه اني بديت اطلق وان البيبي بيطلع يهون علي.
العصر تحممت واستشورت شعري وجهزت اغراضي لاحظو كل هذا وانا اطلق وينزل معي دم خفيف اكيد بتقولون في حال استشوار!!
بس حبيت ارتب شكلي لان بعد الولاده بتبهذل ومنها اقزر وقت.
المغرب حسيت بتعب فضيييع وناديت الشغاله وتدليك لين نمت صحيت بعد ساعه الم شديد وصار كل ربع سااعه واصبري يابنت الحلال
تعشيت وجت الساعه عشره زاد الطلق وانتظم على عشر دقايق ربع ساعه
خبرت زوجي طبعا طول اليوم احاول اخبي عنه لانه خوااف بياخذني بدري للمستشفى. رحت لمستوصف قريب من البيت سويت كشف للرحم
قالت فاتح سانتي واحد وطلقك حامي امشي امشي امشي ولا تستني في البيت اكثر من ثلاث ساعات
واطلع على الممشى وامشي سااعه كامله مع ان الجو بارد
ونرجع للبيت ويسالني زوجي قلت خلاص راح الالم وانا بمووت من الالم بس اتصبر ..
جت الساعه وحده ونص خلاااص كل خمس دقايق ومنتظم واصحيه وطيرااان للمستشفى وكشفت الدكتور وقالت ماشاء الله فاتح الرحم سبع سانتي يلا ولاده.. وبكيت من الفرحه بولد اخيرا الحمد لله وطبيعي.
وادخل غرفه الولاده وانتظر الى ست الصبح وتكشف قالت الجنين نزل
لكن لاف راسه !!!
قلت والسواااه قالت عمليه !!!
وابكي مابي عمليه لا
وتجي دكتوره ثانيه وثالثه يحاولون اقناعي وانا رافضه
بعد هالتعب كله عمليه! معليش بصبر زياده يمكن يتعدل
استدعو استشاريه وكان اسلوبها جدا مقنع
قالت لاتحطين بذمتك حياه طفلك في خطر لو جربنا الولاده الطبيعيه
وانتي عندك عمليه من اول ومن هالكلام لين لينت راسي وطارو فيني
على العمليات قبل اغير رائي. لاني وقعت بعدها رفضت
دخلت غرفه العمليات سبع الصبح وطلعت بالسلامه انا وطفلي ولله الحمد والشكر



((انت تريد وانا اريد والله يفعل مايريد))
والحمد لله لاتعبون انفسكم بالتفكير بالولاده كل شي مقدر و مكتوب

بس بصراحه استفدت من التمارين جدا ونفعتني بعد الولاده
ماترهل جسمي كثير انصحكم فيها لان فرق جسمي عن حملي الاول
كنت اتسدح لا رياضه ولا حركه.

بالنسبه للعمليه كنت احافظ عليها من الرطوبه واغسلها بصابون واجففها بعد اسبوع استعملت العسل احطه على الجرح لمده نصف ساعه مرتين باليوم لمده خمس ايام والحمد لله مابرزت ولونها خفيف.

هذي قصتي اتمنى انكم لقيتو مايفيدكم