ولادتي وسفري المفاجيء

السلام عليكم
كيفكم يا بنات والكروشات اللي يقرون كلامي الله يهون عليكم
انا ما بكتب قصتي للتسلية وبعدين اقولكم توتة توتة خلصت الحتوتة لا انا ودي تستفيدون صدق ولا تبخلون علي بدعوة في ظهر الغيب

ليلة 5 يناير اخ حسيت بألم اسفل البطن وكأن فيه شيء يضغط لتحت طبعا هذا الجنين نزل للحوض
المهم مشيت الموضوع ونمت نوم العوافي رغم الالم

يوم 5 يناير الفجر رحت واتوضيت الا فيه الله يعزكم دم بسيط الله يستر معقولة بولد باقي اكثر من اسبوعين على كلام المستشفى تقريبا 18
بولدي الاول اخذت من العاشر ......>كل ولاده لها ظروفها مو شرط

المهم واروح اقول لزوجي عشان يعمل حسابه طبعا الرجال قام ينتفض مسكين (( داخل
معي بولادتي الاولة :) )) واحضر شنطتي (( توني شارية اغراض البيبي من يومين وما رتبتها ))....> لازم
تجهزون على الاقل بالسادس والسابع مو تكسلون زيي

واجهز
شنطتي واوراقي ... الخ ......> حتى الشنطة لازم تجهزينها من بدري عشان ما تنسين شيء اهم شيء موية زمزم المقري فيها توي امس قريت فيها ............>غلطة ثانية المفروض من بداية التاسع

الله يقطع الشغل يدقون علي منزعجين اني ماخذه اجازة يبوني اجي بأي طريقة رغم اني
ماخذه اجازة .........>وهذا احسن شيء سويته ضروري ببداية التاسع تاخذو اجازة تخيلي تجيك ولادة او تنزل الموية وانتي بالشغل فشله المشكلة عندي ودي اولد بالرياض وانا على بعد 300 كيلو
يا ربي المستشفى هنا مجزرة فيه خبر بالجريدة يقول ان عندهم طبيب ما معه الا دبلوم نساء وولادة وقاعد يسوي عمليات قيصرية ؟؟
غير كذا المستشفى كله رجال يا ربي استر علي يا ليتني جلست عند اهلي تصدقون توي جيت من يومين منهم
واروح استخير واكتب موضوع هنا اشوف اللي فيني ولادة والعالم تأكد انه بداية ولادة الساعة 9 قلت انام اشوي اريح جسمي اتاكد فيني ولادة
ولا لا ..الا يقوم ولدي علي عمره 3 سنوات تقرييبا اول مرة يسويها ويقوم ماما ابي الحمام (( ناقصة انا )) رح الشغالة
مصممم انا اللي اوديه طار النوم صرفته ورحت احاول انام غطت عيني شوي
الظهر جا زوجي وش قررتي قلت بروح الرياض استخرت خلاص
واجهز اغراضنا انطلقت الساعة 3 العصر بدا الم خفيف قطعنا 150 كيلو زاد الالم بس محتمل وتدق امي الله يطول بعمرها تقول وش قاعدة تسوين (( قلب الام الله يخليها لي ))قلت رايحة لصديقتي طبعا طول الطريق دعاء واذكار

ونوصل الساعة 6 ونروح اهل زوجي ما ابي امي تدري عني زاد الالم واتصبر وما حسستهم قلت عندي مراجعة بروح المستشفى واروح لغرفتي عندهم اصلي واكل تمر قلت خل اسوي لي من التمر عصير وانا واقفة هوب
اسمع صوت الموية على رجولي كنت احسب الموية خلاص خلصت واقول لزوجي يالله المستشفى مدري ليه الطلق خف وبرد وانا بالسيارة جاني طلق ونزل معه موية اوف
غرقت الدنيا يا ربي سترك وتغرق العباية ما جبت غيرها .......> نصيحة خذو على الاقل عباية احتياطية

وصلت المستشفى(( دله )) بعد الزحمة الساعة 8 والله شكلي يفشل كني طالعة من مسبح لا وازيدكم من الشعر بيت موية زمزم المقرية انكب ثلاث ارباعها في الكيس
وتكشف الدكتورة
الرحم مفتوح بس 2 سم :( بغيت اصيح كل هالالم يا ربي ارحمني لا واقول للدكتورة وكانت سودانية الظاهر اسمها سامية
بس اثنين سم :( قالت لا اقل بعد قسما بالله حسيت نفسي راسبه .....> لازم تحطين ببالك ان الرحم ممكن يكون مسكر وحتى لو فيه طلق عشان ما تنصدمين وتصابين بخيبة أمل
خذالي زوجي غرفة ,,,وودى عبايتي لمغسلة قريبة مستعجل وتخطيط قلب للجنين شوي جت الدكتورة الساعة 12 وهات يا كشف (( مدري متى يتطورون ويلقون طريقة متحضرة اكثر
الرحم 3 ونصف مفتوح يالله غرفة الولادة رحت لها مشي يحاولون فيني بعربية بس انا رفضت كنت ابغى امشي اطول فترة ممكنة امشي كم خطوة وبعدين اوقف مع الطلق ...>المشي يحفز الطلق

وصلت الساعة 1 وتستقبلني ممرضة الحمد لله وجهها سمح ومبتسمة 1 ونص وتجي الدكتورة تكشف
اخ اربعة سم وتكلم الممرضة طلق صناعي بالانقلش وتقول ماراح تولد قبل الساعة 4 تو مشت وتحط الطلق الصناعي
الله وكيلكم جاني الم ما اتوقع احد في هالدنيا يتحمله وترجع تحط جرعة ثانية وتقولي هذا مسكن بس على مين واشدها من صدرها انتي وش
حطيتي لي حسبي الله عليك
وهي عيب مدام ما يصلح بس الحق ينقال انها محترمة ومؤدبة لو انا منها كف على وجهي وتنادي زوجي تقول تعال شف وش مسوية
وانا اخبط براسي في السرير
ويجي ويقرا علي شوي وانا اصيح ابي ابره ظهر خلاص بموت الغرفة كانت صغيرة وحس زوجي انه ما يقدر يجلس بسوي زحمة طلع (( سألته بعدين وين رحت قال رحت دورة المياة :hahaha:))
..... نصيحة خل معك مرافق تثقين فيه وقلبه قوي اذا كان نظام المستشفى يسمح
واكدي عليك يقولك تمارين التنفس ويصبرك ويهديك
ولا احس شيء بيطلع مني حسيت بدفع وتكشف الممرضة قالت ولاااااااده نامي على جنب وتركض للدكتورة تناديها واولد الساعة 2
يعني بين الاربعة سم والولادة نصف ساعة بس اكيد الالم يذبح والله ان الطلق الطبيعي رحمة من رب العالمين مدري ليه المستشفيات يستعجلون يبون يفتكون ..... ودفعة وحده ويطلع كتكوتي الصغنطوط .وزنه كيلوين وسبعمئة الله يصلحة ويجعله عبد صالح ....... >نسيت ادعي وقت طلعة الراس الدكتورة ما ذكرتني
بولدي الاول الدكتوره الله يجزاها خير ذكرتني ودعيت لابوي كان وقتها مريض فيه جلطة ومرض بالقلب والحمد لله الحين صحته زينه الله يخليه لنا غير دعاوي ثانية ........> خلي المرافق او اطلبي من الدكتوره اذا امكن من قبل تذكرك بالدعاء واكتبي الاشياء اللي ودك تدعينها
والله انها فرصة العمر أول ما حطو البيبي على بطني سميت عليه و قلت اللهم اني اعيذه بك وذريته من الشيطان الرجيم .....>لا تنسين سبحان الله يهدأ الطفل
بعد ما ولدت قامت الممرضة والدكتورة ينكتن علي تبين ابرة ظهر ... والممرضة تقول ان شاء الله المرة الجاية تجيبين بنت
طبعا انا غطيت راسي تحت اللحاف كني نعامة :) :04:
وتوتة توتة خلصت الحتوتة