ولدت بس عقب ماطلعت عيني... تعالو بقول لكم اشصار

السلام عليكم ورحمة الله وبركاته

ولدت بحمد الله وفضله وجبت احلى بنوته

بس قبلها كانت في قصة معاناة بدت من شهرين

كنت اتابع في مستشفى حمد وكنت من اروح لموعد يلقون الزلال زايد عندي اعزكم الله في البول بعد اربع زيارات قالولي بندخلج عندنا عشان نراقب الزلال رفضت رفض قاطع لان ولدي كان تعبان وخايفة يقررون له عملية والله ستر وعطوني بعدها موعد بعد اسبوع وقالو بنخليج تروحين لان ضغطج اوكي مستقر

ومن شهر تقريبا جاتني صخونة قوية طيحتني وقمت احس بالام مثل الطلق وقالت لي امي روحي المستشفى شيكي على نفسج

فعلا رحت الطوارئ وسوولي فحص داخلي قالو واحد سم وهذي شي عادي روحي واشربي سوائل دافية واكلي بندول

وذيك الليلة مانمت من الم ظهري الا الصبح

وبعدها بكم يوم اصبحت على الم فضيع في راسي كلت بندول وحاولت انام ماقدرت وعلى العصر كلمت زوجي عشان يوديني الطوارئ وفعلا رحت الطوارئ وكان ضغطي مرتفع والزلال زايد عندي ودخلوني واعتدل الضغط وطول ما انا موجودة وهم حاطين علي جهاز التخطيط وعلى الليل ارتفعت حرارتي وزات معاها نبض الجنين وعطوني بندول ينزل حرارتي وقعدت عندهم 3 ايام وعقب طلعوني على موعد عقبها بيوم

جيت الموعد واتفقت مع الدكتورة والاستشاري على ولادة طبيعية على اساس ان وزن البيبي صغير 2كيلو و600 جرام وان خطر علي القيصري بسبب الوزن الزايد ووقعنا على الطبيعي

هالكلام كان يوم الثلاثاءتاريخ 24\3...........................يوم الخميس يوم الاكشن

سوري.. ليلتها رحنا انا وزوجي اللاند مارك وشرالي باستا كان خاطري فيها من يوم حملت

اصبحت الساعة اربع الا ربع الفجر حاسة ان فيني شي مو طبيعي... وقام زوجي معاي سويت له فطور وافطرنا وراح يصلي ورجع قالي وجهج مش طبيعي فيج شي؟ قلت لا (وانا حاسة بشي غريب بس مهب عارفة شنو) قال تحسين بالم؟ قلت لا وانا كنت احس بالم بس مادري ليش قلت لا وفجاة جاني الم وقالي بعد تقولين لا ماتحسين بالم قلت لا هذي يمكن شي عارض

المهم خمس ونص قالي تبغين اوديج المستشفى قلت لا وجاني الم قالي قومي قبل ما اطلع الدوام قلت لا تو الناس مهب الحين اروح انتضر لين صار الالم كل خمس دقايق وعيالك ما يقصرون تطلع روحي لين يجيني الالم كل خمس دقايق ... راح الرجال ودخلت اتسبح قلت خلني اسوي سكراب وحركات قبل ماربي

الساعة ست ونص اتصل وقالي تقدرين تنتظرين لين ارجع من الشغل قلت اي وبنتغدى والعصر يمكن اقولك المستشفى... قال اكيييييييييييييد قلت اي قال والله ويهج يقول الحين مهب العصر قلت لا انا بودي عبادي الروضة وبرجع بنام شوي

وديت ولدي الروضة وانا فيني كحة خفيفة قلت بشتريلي دوا من الصيدلية... وانا في طريقي للصيدلية اتصلت علي ام حمد القطرية وتسال عني وانا وقتها ماحس بالطلق المهم وصلت الصيدلية واول مانزلت الا شي ينقط مني... انحرجت جدام الصيدلاني بس ماكانت الكمية كبيرة حتى مادري ان كان نقط شي على الارض ولا بس في ملابسي

المهم على طول خذت الدوا ورجعت البيت وكلمتني ام زوجي مادري اشلون رديت عليها مسكينة ومنحرجة من السايق

نزلت وقلت له عقب شوي بروح المستشفى وعلى طول دخلت بدلت ملابسي وكلمت ام زوجي قلت لها ينزل علي ماي قالت روحي انتي من قبل ولدتي قيصري روحي لا يصير فيج شي ولا في الجنين... وكلمت امي وقلت لها انا رايحة الطواري الحين كيت وكيت قالت انا جاية الحين ... امي وصلت قبلي وقعدت تدورني مسكينة

المهم وصلت ودخلوني وقالو واحد سم وجهاز التخطيط وحالة وقال باين عندج الطلق بس عنق الرحم ما توسع على ال سم بنصعدج فوق لين يصير التوسع

وصعدوني وقالولينتوقع قبل المغرب تولدين دام نزل الماي وفيج طلق..... استانست بس تذكرت عقب الشباب وطلقهم البارد

المهم جينا العصر وجينا المغرب وجينا العشا والرحم فاتح 3 سم وبسسسسسسسسس

وجهاز التخطيط اللي كان مبين الطلق بقدرة قادر صار الطلق عندي صفر تهاوشت مع السسترات اقول لهم جهازكم خربان انا فيني طلق وهذي ما يطلع الطلق وغيروه مرتين ولا في فايدة والماي ينزل لين صار بطني جني مهب حامل

وتعشيت وانا اقول في خاطري لاااا محتاجة اكل يقويني وكلت لي تمر...

المهم جات الساعة عشر ونص وجهاز التخطيط محطوط على بطني وانا منقهرة ومحترة ولا اسمع صوت غريب يطلع منه... وادق جرس على السسترات عشان يجون ويشيلونه لاني طفشت منه الا هم جايين يركضون ويشيلون ورقة التخطيط ويركضون بها الا هم جايبين ملفي والدكتورة جاية تفحصني الا تقول 3 سم قلت لها خلاص شيلو الجهاز قالت اوكي بس خل يجي الاستشاري يشوفه الا هو جاي ويسالها عن التوسع و قال قيصري

الا تقولي بنزلج قيصري قلت ليش قالت لان نبض الجنين صاير فيه توتر والجنين بيتعب قلبه اكثر ان خليناج واذا بننتظر الولادة الطبيعية بيروح منا الجنين

وكلت امري لله وما اشوف الا السسترات يركضون يمين ويسار حتى ابرة الجلكوز دخلوها غلط وعاد الفشيلة

ادور جوالي مالقيته والمشكلة اني مسكرته

نزلوني العمليات الا الدكتور جايني مال التخدير قلت اي تخدير بتعطوني الا يقول ابرة الظهر لانج متعشية الساعة سبع مستحيل نعطيج بنج كامل

المهم يوم خدروني وجاو بيحطون القسطرة الا هم يلقون جوالي في حظني

:06: وااااااااااء فشيلة يتكلمون بالانجليزي وعارفة شيقولون وانا منحرجة ... يقولون كانت تدور الجوال وما لقته والحين نبي نحط القسطرة الا هو في حظنها والستاف يضحك وانا مهب قادرة اخش ويهي

المهم شقو بطني وطلعو العسولة وانا طول الوت استودع نفسي وجنيني الله الذي لا تضيع ودائعه وما سمعت لها صوت

قلت اجرها عند ربي ماعطاني اياها الا لسبب وما خذاها الا لسبب الا دكتور التخدير يقولي الحمدلله على السلامة مبروك بنوتة حلوة وصغيرة... قلت في خاطري ادري انها صغيرة

شوي الا اسمع صوت الحلوة تصيح ويدوووووبه ينسمع وجابوها لي وحبيتها فدييييييييييييييييييتها نتوفه نتوفة صغيرونة الا يقولون لي ليش صغيرة وايد قلت اشدراني انتو الدكاترة انتو قولولي ليش ماكبرت

وجاو يخيطون الجرح وااااااااااااااااي هلكت احسهم يقشعون شي من صدري ومن بطني مت وحييت وهم يخيطون

وطلعت الا امي عندي فديتها الا هي تحبني وتمسح دموعها وتقولي بنيه اشحلوها تشبهج وصغييييييرة جنها اياج يوم اجيبج

عاد استانست قلت بتطلع نسخة مني (اتلزق في بنتي):hahaha:

وجابوها لي وشفتها والله انها عسل ونتفة وطلع وزنها 2 كيلو و450 جرام (لله الحمد والمنة)

وطلعوني على الاستراحة ويوم جات الساعة خمس الصبح قمت اطرش مسجات حق خواتي... الا هم يباركون لي ويقولون عندنا خبر من امس.........................:16:

وسميتها على ام زوجي

وماتم احد ما بارك لي من اهل زوجي وبنات ملف قطر فديتهم والكل فرحان لفرحتي

سواء بالزيارة او بالتلفون او بالمسجات والرسايل

وتوتة توتة خلصت الحتوتة على قلة عيالي حتوتة حتوتة