ولدت مبكر احس بالغبنة

مساء الخير اخواتي


حابة افضفض ما ادري اذا القسم مناسب لطرحي ولا لا


ولدت ولادة مبكرة في الاسبوع 29 من 38 يوم احس بالغبنة و الخيبة كل ما اتذكر يوم ولادتي :( كنت فرحانة بحملي لدرجة ما اقدر اوصفها بس الله ما كتب لي نصيب على تمام الحمل الين التاسع والحمدلله على كل حال
ولدي الحين في الحضانة الله يطلعه لي بالسلامة يارب

سبب الولادة كان نقص في السائل الامنيوسي ما بين ايش سبب النقص


كارهه نفسي و زوجي و حياتي و بيتي وكل شي


عايشة بالغربة و ساكنة لحالي ما عندي احد و من الشهر السادس وانا كان عندي نقص في السائل الامنيوسي
كنت اجهد نفسي في شغل البيت و زوجي ما اهتم لامري ولا ساعدني لدرجة كان يصحيني من النوم عشان اجهز له اكل حسبي الله :(


قالتلي الدكتورة نسبة المويا في الحد المعقول لو استمرت كدا راح اوصل الشهر التاسع على خير و اني الزم الراحة التامة و اهتم باكلي ما كان عندي احد يجهزلي ولا يطبخلي كنت انجبر اطبخ بنفسي و كنت اتعب و حسيت اني قاعده اجهد نفسي و طلبت من زوجي انه يساعدني لاني قمت اتعب و دا الشي مو كويس قولتله عدت سبعة شهور على خير مابقى الا شهرين واقوم بالسلامة ان شاءالله الين الشهرين اهتم فيني و ساعدني بشغل البيت و قوم بنفسك ولا تخليني اجهد نطبخ بكمية تكفي ليوم ولو شي سهل نحتفظه في الثلاجة و نسخنه و ناكله الين المسا و اغسل المواعين لان الحاجتين الضرورتين دولا و الشغلات التانية مو مهمة زي الغسيل و التكنيس الخ الخ مو لازم تسويه قال انا ما اعرف و مشغول ما عندي وقت لشغلات الحريم :(


و زيادة على عمايله قبل الولادة بيومين قالي امشي نطلع نغير جو دايماً كنت ارفض عشان المشي مو كويس كان يتناقر معي هالمرة وافقت و ياليتني ماوافقت اخدني لمشوار مشي لو كنت ادري انه بياخذني مشي ماكنت ارضى اروح :( قلتله في الطريق انت بتاخذني مشي قالي المكان الي رايحين له مو بعيد قد كدا اصلاً قطعنا نص المسافة صدقته والحين ندمانه اني مارجعت البيت حتى لو قطعنا نص المسافة وصلنا هناك قعدت وانا زعلانة قالي شفيك قولتله انت تبي تذبح الولد ولا كيف سامع باذنك الدكتوره لزمت ع الراحة التامة تتعمد تجهدني و تتعبني وتقولي شفيك قالي خلاص خلاص غلطت مره تانيه ما اعيدها جبتك على اساس تغيري جو لك فتره ما طلعتي من البيت و الرجعة نرجع بتاكسي واحنا راجعين ما حصلنا تاكسي واتناقرنا انعفس جوي اكتر :( كثر الله خيرك بس ياخي مو بدا الشكل تخليني اغير جو :,(


بعده بيومين كان عندي مراجعة روحت مراجعتي قالتلي الدكتورة مويا الجنين نقصت اقل من اللازم ولازم نولدك اذا ما ولدت واستمر الجنين بمويا بالنسبة القليلة راح اوصل لشهر التاسع بس ممكن يتعرض الجنين لنقص في الاكسجين ولا تشوهات في الاطراف واذا قلة المويا اكتر من كدا راح يموت :(


انجبرت اولد قيصري عشان الولد لا يصير فيه شي
والحين قاعده احس بكره لزوجي قاعده احس هو السبب في اللي صار و بسبب اهماله و تقصيره وصلنا على اللي احنا فيه لو انه ماخذ الموضوع جد من قبل لا اولد ممكن ما صار الي صار :( و اللي مكرهني فيه بزياده بعد ما ولدت في نص السابع صار يطبخ و يغسل و يكنس و يرتب و يسوي كل شي وينك من اول الحين ايش ينفعني ان اهملت ولا اهتميت بعد ما صار ولدي خديج


احس بخيبة امل كنت مستنية يوم ولادتي على نار واني اعيش اللحظة زي كل حامل قربت اخلص الاربعين وانا للحين ما عرفت احضن ولدي زي كل ام كل ماتذكرت الي صار قبل الولادة ولا بعده احس بالغبنة
تمنيت حملي يستمر طبيعي و اولد و ولدي يملي علي بيتي و حياتي اللي مالي بعد الله غيره في الغربة و الحين مو عارفة ايش يصير فيه ولا في مستقبله راح يكون مثل طفل طبيعي ولا لا لاني قريت مضاعفات المستقبلية للخداجة و خايفة على ولدي منها


اللهم اني استودعتك طفلي و صحته و عافيته يامن لا تضيع ودائعه
اللهم رد ابني لاحضاني و هو في اتم الصحة و العافية
اللهم لا تريني فيه بأساً يبكيني




ادري كل شي نصيب بس لازم نتوكل على الله و ناخذ بالاسباب و ناخذ الحذر في كل امورنا مو نقول انا متوكل على الله و نهمل و نستهتر والحمدلله على كل حال والحمدلله على قضاء الله و قدره

اعذروني كلامي ملخبط و طولت بالحكي
ولا تنسو ولدي من دعواتكم